17°C , Partly sunny | Kigali-Rwanda

MINILAF itewe impungenge n’umurengera w’inkwi zikoreshwa

Yanditswe na MUKAGAHIZI ROSE

Ku ya 08-05-2018 saa 05:24:48

Minisiteri y’Ubutaka n’Amashyamba (MINILAF) iravuga ko itewe impungenge n’umurengera w’inkwi zikoreshwa n’inganda zitunganya icyayi hirya no hino mu gihugu.

Bakundukize Dismas, ushinzwe ishami ry’amashyamba mu kigo gishinzwe amazi n’amashyamba, avuga ko muri rusange, ingo zikoresha ibicanwa bikomoka ku mashyamba nk’inkwi n’amakara, zingana na 83%, mu gihe Leta y’u Rwanda ifite gahunda yo kugabanya uyu mubare kugera kuri 50% bitarenze mu 2020.

Bakundukize Dismas, ushinzwe ishami ry’amashyamba mu kigo gishinzwe amazi n’amashyamba (Ifoto Rose M)

Bakundukize avuga ko hakiri imbogamizi kuri gahunda ya leta yo kugabanya ibicanwa bikomoka ku mashyamba nk’amakara ndetse n’inkwi hagamijwe gusigasira amashyamba no kuyasarura atarera.

Mu kiganiro n’Imvaho Nshya, Hakuzimana Pierre Claver, ushinzwe amashyamba mu ruganda rw’icyayi Sorwathe ruherereye mu karere ka Rulindo mu Ntara y’Amajyaruguru ndetse na Manik Weeras Nshe, umwe mu bayobozi muri urwo ruganda, bavuga ko  ntacyo babikoraho kuko ngo kugeza ubu nta bundi bushakashatsi barakora  ku byunganira inkwi.

Manik yagize ati “Nta gahunda ya vuba dufite yo kugabanya ibi bicanwa bikomoka ku mashyamba”.

Bakundukize avuga ko usanga hirya no hino mu gihugu atari inganda z’icyayi gusa zikoresha inkwi nyinshi, kuko n’ibigo by’amashuri n’amagereza, na byo biza ku isonga mu gukoresha inkwi nyinshi, ikibazo gihangayikishije muri gahunda yo kubungabunga amashyamba.

Bakundukize akomeza avuga ko kuba inganda zitunganya icyayi zikoresha inkwi ku kigero cyo hejuru, ari urukuta rukomeye kuri gahunda ya MINILAF yo kugabanya ibicanwa bikomoka ku mashyamba.

Avuga ko bazakomeza gukora ubuvugizi ari nako bashishikariza abantu  gukora ubushakashatsi ku bindi bintu byakunganira inkwi.

MINILAF igaragaza ko toni imwe y’icyayi kugira ngo iboneke iba yatwaye  inkwi zingana n’amasiteri abiri n’ibice 88.

Ubuso buhinzeho amashyamba mu Rwanda, bungana na 29.6% by’ubutaka, ni mu gihe gahunda ya Leta igaragaza ko bugomba kwiyongera bukagera kuri 30% mu 2020.

 

TANGA IGITEKEREZO

Leave a Reply

Your email address will not be published. Required fields are marked *