21°C , Partly cloudy | Kigali-Rwanda
Urwunge rw'amashuri rwa Horezo ni rwo ruza ku isonga mu mashuri 895 yashyizwe mu byiciro

MINEDUC yashyize mu byiciro amashuri hagamijwe kunoza imikorere

Yanditswe na Mugisha Benigne

Ku ya 30-10-2018 saa 14:24:28

Amashuri 895 yashyizwe mu byiciro na Minisiteri y’Uburezi (MINEDUC) mu rwego rwo kumenyekanisha amashuri akora neza.

Minisitiri w’Uburezi, Dr Mutimura Eugene, avuga ko ari igikorwa kizahoraho hagamijwe kunoza imikorere y’amashuri.

Ibyo byiciro byakozwe nyuma y’ubugenzuzi n’ubukangurambaga bwakozwe na MINEDUC mu gihugu hose.

Kumenyekanisha amashuri akora neza bizajya bituma akora nabi ayareberaho, na yo azamuke atere imbere, nk’uko Dr Mutimura abisobanura.

Yagize ati “Gushyira amashuri mu byiciro byimakaza umuco wo kunoza imikorere kuko amashuri ahora mu ipiganwa.

Avuga kandi ko “amashuri azajya amara igihe mu kiciro cya mbere azajya agenerwa ibihembo harimo n’agahimbazamusyi.”

Uyu muyobozi yongeraho ko “amashuri azajya amara igihe mu kiciro cyo hasi azajya agenerwa ibihano.”

Amashuri n’uturere byashyizwe mu byiciro hashingiwe ku mubare w’abana bata ishuri, umubare w’abana basibira, imiyoborere n’imicungire y’amashuri, imyigire n’imyigishirize, isuku mu mashuri, ikoranabuhanga mu myigire no mu myigishirize.

Dr Mutimura akomeza avuga ko gushyira amashuri mu byiciro bizajya bikorwa mu buryo bugendanye n’igihe kandi ubuyobozi bw’ishuri buzaba bushobora gusaba kugenzurwa kugira ngo ishuri rihindurirwe ikiciro mu gihe rizaba rigaragaza ko ryateje imbere imikorere hashingiwe ku bipimo ngenderwaho mu bugenzuzi.

Mu mashuri 895 yagenzuwe mu kiciro cya gatatu ari na yo yashyizwe mu byiciro, ishuri riza ku isonga ni Urwunge rw’amashuri rwa Horezo, ruherereye mu Murenge wa Rongi mu Karere ka Muhanga n’amanota 90.4% naho iryaje inyuma y’ayandi ni ishuri ry’Imyuga rya Mukarange riherereye mu Karere ka Kayonza n’amanota 22.9%.

Urwunge rw’amashuri rwa Horezo ni rwo ruza ku isonga mu mashuri 895 yashyizwe mu byiciro

Abakozi 118 barimo n’abayobozi b’amashuri bagenewe ibihano binyuranye naho 108 yo ntazemererwa gutangira umwaka utaha mu gihe azaba atarakosora ibyo yanenzwe.

Muri abo bakozi 118, harimo 43 bazihanangirizwa, 13 bazahabwa igihano cyo kugawa, 4 bazahabwa igihano cyo gukererezwa kuzamurwa mu ntera, abakozi 31 bazahabwa igihano cyo guhagarikwa mu kazi amezi 3, abakozi 22 b’amashuri bazahabwa igihano cyo gusezererwa burundu mu kazi.

MINEDUC igiye kwirukana bamwe mu bayobozi b’amashuri

Amashuri 31 azagenzurwa kugira ngo hagaragazwe neza ibyerekeranye n’imikoreshereze y’imari ya Leta, hari n’amashuri 17 azafashwa kugira ngo arusheho gukora neza.

TANGA IGITEKEREZO

Leave a Reply

Your email address will not be published. Required fields are marked *