21°C , Partly sunny | Kigali-Rwanda
Rwamukwaya Olivier, Umunyamabanga wa Leta ushinzwe amashuri y'imyuga

MINEDUC yahaye abatsinze ibizamini bya Leta ibigo birimo n’ibyigenga

Yanditswe na MUGISHA BENIGNE

Ku ya 18-01-2018 saa 06:42:32

Nyuma y’uko amanota y’abanyeshuri bakoze ibizamini bya Leta ashyizwe ahagaragara, hatanzwe imyanya mu mashuri anyuranye abana bazigamo, biza kugaragara ko bamwe mu batsinze bahawe amashami y’imyuga mu mashuri yigenga.

Rwamukwaya Olivier, Umunyamabanga wa Leta ushinzwe amashuri y’imyuga

Bamwe mu bahawe imyanya mu mashuri y’imyuga yigenga bavuga ko nabo batunguwe no kuba baratsinze ibizamini bya Leta ku manota meza, ariko bagahabwa amashuri mu bigo byigenga byigisha imyuga.

Muhire Ladislas ni umwe mu bahawe ikigo k’imyuga cy’abikorera, yagize ati “Natsinze neza ibizamini bya Leta, mu gihe nari ntegereje kubona umwanya mu ishuri rya Leta, natunguwe no kubona banshyira mu ishuri ry’imyuga mu kigo cy’abikorera, gusa nta cyo bintwaye, nta n’ikibazo mbifiteho, ariko si nari nzi ko bibaho.”

Kayitesi Jeanne na we ni umunyeshuri wahawe umwanya mu kigo k’imyuga kigenga, avuga ko na we ari bwo abibonye, ariko akaba afite ikibazo cy’amafaranga y’ishuri, dore ko bimenyerewe ko amashuri yigenga ahenda kurusha aya Leta.

Ku bijyanye n’iki kibazo ariko, Umunyamabanga wa Leta muri Minisiteri y’Uburezi, ushinzwe amashuri y’imyuga, Rwamukwaya Olivier, yamaze impungenge abahawe amashuri yigenga y’imyuga, avuga ko byakozwe nyuma yo kugirana amasezerano na ba nyiri amashuri, umuhango wabaye mu ntangiriro z’icyumweru gishize, akaba nta kibazo gihari ku bijyanye n’amafaranga y’ishuri, kuko uwoherejweyo na Leta azajya yishyura hagendewe ku kiguzi cy’uburezi mu mashuri y’imyuga ya Leta.

Yagize ati “Abazoherezwa mu mashuri yigenga yagiranye amasezerano na MINEDUC bazajya bishyura amafaranga angana n’ay’aboherejwe mu mashuri ya Leta ari mu Karere kamwe nayo kandi azagenerwa inkunga ingana n’igenerwa abiga mu mashuri ya Leta.”

Yavuze ko ibi byakozwe mu rwego rwo gufasha benshi mu barangije ikiciro rusange cy’amashuri yisumbuye kubona aho bigira amasomo y’imyuga n’ubumenyingiro, bityo Minisiteri y’Uburezi igirana amasezerano n’amwe mu mashuri yigenga kugira ngo azakire abanyeshuri kimwe n’amashuri ya Leta.

Bamwe mu bafite amashuri yigenga y’imyuga bishimiye iyi gahunda ya Minisiteri y’Uburezi yo kubaha abana mu batsinze ibizamini bya Leta, mu gihe byari bimenyerewe ko amashuri yigenga afata abanyeshuri batatsinze ikizamini cya Leta cyangwa batahawe imyanya na Minisiteri y’Uburezi.

Bishimira kandi ko abohererejwe abanyeshuri na Minisiteri y’Uburezi bijejwe inkunga ya Leta nk’uko bikorwa mu mashuri ya Leta.

Basanga iyi ari imwe mu ngamba zizafasha mu iterambere ry’amashuri y’imyuga y’abikorera, bigateza imbere uburezi muri rusange.

 

TANGA IGITEKEREZO

Leave a Reply

Your email address will not be published. Required fields are marked *