17°C , Partly cloudy | Kigali-Rwanda

MINEDUC: Kwigisha ni umuhamagaro, abarimu bareke kureba cyane ku mushahara

Yanditswe na Kanamugire Emmanuel

Ku ya 14-02-2019 saa 10:02:41
Umunyamabanga wa Leta muri MINEDUC ushinzwe amashuri y'incuke, abanza n'ayisumbuye, Dr Munyakazi Isaac, atanga ikiganiro mu Karere ka Muhanga

Minisiteri y’Uburezi (MINEDUC) yahamagariye abarimu gukora umwuga wabo nk’umuhamagaro aho kuwukora nabi bashingiye ku kuba umushahara wabo ari muto.

Ibibazo by’imikorere mibi muri bamwe mu barimu nk’uko byagaragaye mu bukangurambaga buherutse kubera hirya no hino mu gihugu, hari ababisanisha no kuba umushahara w’abarimu ari muto.

Umunyamabanga wa Leta ushinzwe amashuri abanza n’ayisumbuye muri MINEDUC, Dr Munyakazi Isaac, yavuze ko byaba bibabaje hagize umuntu wahitamo kuba umurezi akumva ko azahimana, ahubwo ko bakwiye gukora batareba cyane ku mushahara.

Yagize ati “Buriya uburezi ni umuhamagaro n’abahitamo kwiga uburezi baba baretse ibindi byinshi banibaza ko byabaha amafaranga menshi. Uhisemo kubikora yakagombye kuba atabikoreshejwe no kubura andi mahitamo ahubwo akumva ko icyo agiye gukora atireba ahubwo areba abana agiye kubikorera.”

“Uyu munsi turabahamagara ngo batareba cyane ku mushahara ahubwo uwahisemo kujya mu mwuga w’ubwarimu naze awukorane umutima w’ubushake awukore nk’umuhamagaro kandi mu by’ukuri uwakumva ko yagiye muri uyu mwuga ari nko kuyoba aho kugira ngo akore nabi yajya gukora ibyo yishimiye ariko akabikora neza.”

Dr Munyakazi yabivugiye mu Murenge wa Nyamabuye mu Karere ka Muhanga, aganira n’abayobozi bashinzwe uburezi mu mirenge y’Akarere ka Muhanga n’abayobozi bashinzwe ibigo by’amashuri, mu gusoza ubukangurambaga bwo guteza imbere ireme ry’uburezi ku nshuro yabwo ya kane, bwibanze ku myigire n’imyigishirize.

Umunyamabanga wa Leta muri MINEDUC ushinzwe amashuri y’incuke, abanza n’ayisumbuye, Dr Munyakazi Isaac, atanga ikiganiro mu Karere ka Muhanga

Dr Munyakazi yavuze ko ntaho Minisiteri y’Uburezi irabona ko kuba hari abarimu badakora uko bikwiye bifitanye isano n’umushahara muto bahembwa.

Yakomeje agira ati “Uburezi ni umwuga ukorwa n’ababifitiye umuhamagaro baba bahisemo kutireba ahubwo bareba icyo bamarira abandi, uteye gutyo ntashobora gutekereza ngo ubwo umushahara ari muke reka ne kwigisha. Nta nubwo twavuga ko ari yo mpamvu. Nta n’urabitubwira ko kudakora neza biterwa n’ibyo tubaha.”

Ku bwa Dr Munyakazi, abarimu bakora akazi gakomeye gakwiye ishimwe udashobora no kugena mu mubare w’amafaranga. Yongeyeho ko na Guverinoma iha agaciro uyu mwuga ari na yo mpamvu iherutse kwigomwa amafaranga asaga miliyari 10 kugira ngo bahabwe inyongera ya 10%.

Ati “Kuba Guverinoma yakwicara igatekereza kuri mwarimu ubwabyo ni icyubahiro gikomeye, ibyo ku mwarimu uri mu kazi uyu munsi yagombye kumva ko ari agaciro gakomeye kuvuga ngo miliyari zagakwiye kubaka ibindi bikorwa remezo tubyihorere tuyahe mwarimu utwigishiriza, uko anagana kose nta nubwo ayo mafaranga yagena ako gaciro mwarimu aba yahawe n’ubuyobozi bw’igihugu.”

Umuyobozi w’ishuri ribanza rya Mubuga mu Murenge wa Kibangu, Niyodusenga Donatha, yavuze ko gukora nabi bishobora kuba bifitanye isano n’umushahara muto bitewe n’imiterere y’umuntu. Haramutse hari umeze utyo ngo abamushinzwe bagira icyo bamukorera kuko “iyo utanyuzwe n’umushahara uhembwa uva mu byo urimo ukajya mu bindi.”

Inama y’abaminisitiri yateranye mu mpera z’ukwezi kwa Mbere 2019, yafashe ibyemezo bitandukanye birimo no kuzamura umushahara wa mwarimu ko 10%.

Dr Munyakazi ntiyiyumvisha impamvu umwarimu yakwigisha nabi ngo ni uko ahembwa make kandi ari we wihitiyemo uwo mwuga abizi neza ko uhemba make

Dr Munyakazi avuga ko niba hariho abarimu bahimana bakigisha nabi kubera guhembwa umushahara muto bakwiye kubicikaho, bakumva ko ubwarimu ari umuhamagaro

TANGA IGITEKEREZO

20 Comments on “MINEDUC: Kwigisha ni umuhamagaro, abarimu bareke kureba cyane ku mushahara”

  1. abarimu bakwiye kuzuza inshingano zabo. umushahara siwo ukora. gusa Mineduc nayo ikibukako n’ ubwo kwigisha ari umuhamagaro, kubaho byo atari umuhamagaro. umushahara nawo ubaye mwinshi byatuma bigenda neza kurushaho nk’ uko n’ imfashanyigisho zigira uruhare runini mu isomo.

  2. Nemera ko kwigisha ari umuhamagaro.ariko hari ibyo tudakwiye kwirengagiza,urugero mwarimu ujya kwigisha ahetse umwana akurura undi akabashyira mukibuga cy’ ishuri kuko atabona igihembo cy’ Umukozi wo murugo. uwo azigisha atekanye?umuhamagaro ntukuraho la satisfaction de besoin Primaires. pensez-y!

  3. Harya uvuga NGO bareke kureba Ku mushahara ubivuga uwayamuha akamusaba gukora ariya masaha (kuko uwakoze neza agomba kubyuka sakumi nimwa za mu gitondo akaryama sa tanu kandi kuva kuwa mbere kugeza samedi) nta mwanya WO kwiyitaho. ESE 1,500 FRS Ku munsi ESE kurya byonyine byavamo?

  4. Nanjye nk’umurezi ndahamyako ibyo umunyamabanga wareta yavuze aribyo
    Ahubwo si akazi kuko umukozi akorera ibihembo iyo bibuze ashobora kugakora nabikoko ariko iyo ari umuhamagaro ukorana,ubushake ,ubwitange,urukundo,umurava,,gukunda igihugu ukakirerera, hanyuma ukazahembwa,n,imana nkuko abakora umuhamagaro w’imana bazahembwa abakiranutsi bazutse.natwe rero tuzahembwa n’imana ntagihembo kiruta kuba warigishije umuntu ukumva ageze kurwego rukomeye nawe ati nigishijwe na runaka ni ishema. Gukora akazi neza si amafaranga ni umutima murakoze

  5. ikibuza ireme ry’ uburezi kugerwaho:
    ubucucike bukabije butuma mwarimu atabona neza integenke zaburi mwana
    Ababyeyi batita kunshingano zabo
    Nahomwarimu ntacyo adakora

  6. Yewe kuba ministre nabyo ni umuhamagaro kandi nkeka KO udahembwa ako kuba ministre wakareka,
    Sinumva ukuntu bo batareba umushahara Kandi aribo batuma u Rwanda rw’ejo rubaho,

  7. noneho nawe kuba ari umunyamabanga uhoraho nabyo ni umugamagaro?

    ibyo byo wabyibeshyeho rwose Nyakubahwa siko biri. kwigisha ni akazi nkutindi twose.

  8. Ah!ah!!Buri wese Ku kazi arimo akeneye umuhamagaro.Leta yarigomwe yego ariko ni ni inshingano.Agahimbaza umusyi ntikaba munsi y’ingasire iyo bigeze kwa mwarimu?

  9. Erega careers zose ni umuhamagaro hera ku barezi,abaganga,nabihaye Imana bafashwa kubaho kdi neza nawe kuyobora atari umuhamagaro waza ugahembwa ubundi ugakora ibyo ushatse

    Leta kongera umushahara si ukwigomwa ni inshingano zayo kwita kubakozi bayo ninkuko wavuga ngo leta yigomye yubakira abatishoboye

  10. Nibyiza gukora inshingano wahamagariwe utinubira ibyusaruramo kandi uko ukora cyane nibyo bikugeza kuntego ushaka kugeraho ninako ununguka Ubundi bumenyi mukazi ukora

  11. Bityo rero twibuke ko twikorera tudakorera abanyamahanga umusanzu wawe mubyukora nuwanjye mubyo nkora birafatanya bikaba umugozi umwe tukiyubakira igihugu cyacu tudayegereje ibyimuhana mureke dukorere igihugu cyacu ntakabuza ibyotwifuza dufatanyije turabigeraho bitari kera cyane haba mubumenyi buvuye muburezi ndetse nubukungu twifitemo dufatanyije everything are possible as Rwandans

  12. Dukore ibyoturimo tubikunze nkabenegihugu kuko nta munyamahanga uzaza kutwibutsa gukora ibyotutakoze iwacu, nabigereranya nkigihe umubyeyi ufite umwana aramutse amurera nabi ngo kubera impamvu runaka byaba arukwibeshya kuko uko turera nabi niko rubanda ruzarushaho kuduha urwamenyo ngo twarasigaye muburezi tubikore nkibyacu nkumubyeyi wonsa umwana we ntawundi aba areba uretse uwomwana natwe turebe turebe ibikwiye nkabenegihugu twiteze imbere tubishishikarize nabana bacu tubahe ubumenyi bugezweho bugendanye nigihe tunabubakundishe nishema iyo ufite umuntu uhagaze mu position runaka akajya yicara akavuga ati nigiye kukigo runaka nigishijwe nakanaka ahondi ubu ndabikesha mwarimu kanaka, nibyiza cyane niyo wamwana wakunyuze imbere arimo guterimbere abikesha mwarimu runaka biba aribyiza aranabivuga nawe ati nigishijwe nakanaka ati namukopeyeho umuco wogukora cyane kandi hagendewe kunyungu zarubanda nyamwinshi proud to be examplary in all you do as well as you can and with your level of skills do the best as you can and God will bless you for that issue.

  13. Uwamuha ibihumbi 40000 akamwongereraho ihihumbi4000.urugero nkurubyiruko mbese yamumaririki.fatinzu15000,guhaha10000,kwambara 15000.ibyonabyo nikumuntu wihambira maze ngugiye gushaka harya ayomafaranga ayagereranyije nayo ahembwa arumva yahora ayagira indirimbo?umuhanga yaravuze ati imana yabonye imibabaro ya mwarimu iti humura mwana wanjye ingororano yawe iri mwijuru.mureke dukore imana yonyine niyo izatwihembera.

  14. hakagombye gushakwa imfashanyigisho zikaboneka mubyiciro byose, manilla hari aho badafite ubushozi nayo bwo kuyibonera,
    nibindi byinshi… kuko ako niko koroheje. ubucukike bukabije bwabanyeshuri kubera kubura ibyumba nintebe zo kwicaraho. wabivuga bati, intore ntiganya ishaka ibisubizo. Nubwo umushahara ari muto siryo pfundo ry,uko ireme ry,uburezi ritagerwaho nkuko binkwiye.
    kuko hari n, uturere dufite abatura bafite imyumvire mibi ku bijyanye nuburezi
    bigatuma Abana badakurikira amasomo kubera, ibyo baba bavanye iwabo ndetse harimo n, amakimbirane mumuryongo no mungo.

  15. Hahahahahah Dr! Umihamagaro kumuntu waburaye,abana be yananiwe kubajyana kwishuri,yananiwe kubabonera tje basic, uwomuhamagaro uvuga waba ufite imbaraga zidasanzwe.shaka uko wabakorera ubuvugizi bakabona agashahara kisumbuyeho abo nabantu bokubahwa.naho ibyimihamagaro byo biza kumutima utije nisura isusuritse.

  16. Erega nk’abantu , umuhamagaro ugerageza abawukora, bigasaba rero ko Uwabahamagaye abahumuriza akoresheje uburyo butandukanye

Leave a Reply

Your email address will not be published. Required fields are marked *