21°C , Partly cloudy | Kigali-Rwanda
Ingengabihe y'ingendo z'abanyeshuri yashyizweho, abanyeshuri n'ababyeyi barasabwa kuyubahiriza

MINEDUC irasaba buri wese kubahiriza iminsi yagenewe ingendo z’abanyeshuri

Yanditswe na Mugisha Benigne

Ku ya 11-01-2019 saa 09:14:47

Minisiteri y’Uburezi (MINEDUC) irasaba buri wese urebwa n’ingendo z’abanyeshuri kubahiriza gahunda yashyizweho na Minisiteri y’Uburezi kugira ngo itangira ry’amashuri rizagende neza.

Ni itangazo ryashyizwe ahagaragara na Minisiteri y’Uburezi, rigashyirwaho umukono n’Umunyamabanga wa Leta ushinzwe amashuri y’inshuke, abanza n’ayisumbuye, Dr Munyakazi Isaac.

Itangira ry’igihembwe cya mbere cy’umwaka w’amashuri ni ku wa Mbere, tariki ya 14 Mutarama 2019, ababyeyi bakaba basabwa kohereza abana ku gihe hashingiwe kuri gahunda yashyizweho y’ingendo z’abanyeshuri.

Ku wa Gatanu, tariki ya 11 Mutarama 2019, abazagenda ni abiga mu mashuri acumbikira abanyeshuri aherereye mu turere tw’Intara y’Amajyepfo ari two Nyanza, Kamonyi, Huye na Muhanga n’utwo mu Ntara y’Iburengerazuba ari two Rusizi na Nyamasheke ndetse n’utwo mu Mujyi wa Kigali, Kicukiro, Nyarugenge na Gasabo.

Ku wa Gatandatu, tariki ya 12 Mutarama 2019, hazagenda abanyeshuri biga mu turere twa Gisagara, Ruhango, Nyaruguru na Nyamagabe mu Ntara y’Amajyepfo, Karongi, Rutsiro, Ngororero na Nyabihu mu Ntara y’Iburengerazuba.

Ku cyumweru, tariki ya 13 Mutarama 2019, hateganyijwe ingendo z’abanyeshuri biga mu turere tw’Intara y’Amajyaruguru n’Uburasirazuba.

Ibigo binyuranye bitwara abagenzi na byo bimaze kumenyera iyi gahunda y’abanyeshuri, ku buryo na byo bigira uruhare mu migendekere myiza yayo, kuko bikorana inama mu rwego rwo kurushaho kunoza imigendere myiza y’ingendo z’abanyeshuri ndetse n’abaturage basanzwe bagahabwa uburyo bwo gukora ingendo zabo.

Bamwe mu babyeyi baganiriye n’Imvaho Nshya bemeza ko gushyiraho gahunda y’ingendo z’abanyeshuri byari ngombwa kuko byakemuye ibibazo by’abana bararaga mu nzira byanze ko bagera aho bataha bitewe n’uko imodoka zabaga zabuze, gutinda mu nzira no kuzarira kwa bamwe binyurira aho bishakiye.

Murebwayire Marie Claire ni umubyeyi utuye mu Karere ka Nyarugenge, avuga ko umwana we yiga mu ishuri riherereye mu Karere ka Rulindo, avuga ko gahunda Minisiteri y’Uburezi yashyizeho y’ingendo z’abanyeshuri yaje ikenewe.

Ati “Mbere abana bamwe ntibashoboraga kurara bageze iwabo bitewe n’ibura ry’imodoka, ugasanga baracumbika mu nzira, bishobora no kubaviramo ihohoterwa.”

Ingengabihe y’ingendo z’abanyeshuri yashyizweho, abanyeshuri n’ababyeyi barasabwa kuyubahiriza

TANGA IGITEKEREZO

Leave a Reply

Your email address will not be published. Required fields are marked *