17°C , Partly cloudy | Kigali-Rwanda
Guverineri Gatabazi atangiza ku mugaragaro amahugurwa kuri Ejo Heza Ubwizigame bw'igihe kirekire muri Rulindo

MINECOFIN yasobanuye uburyo bufasha buri munyarwanda kwizigamira

Yanditswe na KANAMUGIRE EMMANUEL

Ku ya 17-10-2018 saa 13:22:14

Minisiteri y’Imari n’Igenamigambi (MINECOFIN) yasobanuye uburyo bwa Long Term Saving Scheme (Ejo heza Ubwizigame bw’Igihe kirekire) buzafasha buri Munyarwanda kwizigamira.

Iyi gahunda ikaba yitezweho gutuma buri wese azaba ashobora kugira imibereho myiza mu za bukuru.

Intumwa za MINECOFIN zahuguye abayobozi batandukanye mu Karere ka Rulindo barimo abahagarariye inzego z’umutekano zikorera mu karere, abakozi b’Akarere, Abajyanama mu Nama Njyanama y’Akarere hamwe n’abanyamabanga nshingwabikorwa b’imirenge.

Rutsinga Jacques wari uyoboye izi ntumwa, yavuze ko uburyo buzatuma buri munyarwanda abasha kwizigamira bwatekerejweho ndetse Ikigo cy’Abanyamerika Karen Consulting gishimangira ko bishoboka mu nyigo cyakoze guhera mu 2014, harebwa n’aho byakozwe nko mu Buhinde.

Rutsinga yavuze ko ubu bwizigame bushya bureba ibyiciro byose by’Abanyarwanda kugeza no ku badafite umushara uhoraho.

Buri wese azafashwa kwifunguriza konti, ajye atanga umusanzu hifashijwe Imirenge Sacco, banki, ibigo by’imari iciriritse ndetse na Mobile money, TIGO Cash n’ubundi buryo bw’imyushyurire bw’ikoranabuhanga.

Yakomeje agira ati “Uburyo busanzwe muri RSSB ni ugutanga umusanzu buri kwezi ariko umunyamuryango w’ubu buryo ni we uhitamo amafaranga agomba kwizigamira, akayatangira igihe cyose bimworoheye. Ni ukuvuga ko niba uri umuhinzi ukaba usarura kabiri mu mwaka, bukwemerera gushyiraho amafaranga kabiri mu mwaka. Niba uri umumotari ubona amafaranga buri munsi, bukwemerera buri munsi gushyiraho cya gihumbi, bya bitanu, bitewe n’ubushobozi n’igihe waboneye amafaranga.”

Guverineri w’Intara y’Amajyaruguru, Gatabazi Jean Marie Vianney, yavuze ko igikenewe ari uko Umunyarwanda wese yagira ubuzima bwiza n’igihe ageze mu za bukuru, bikazaturuka ku mafaranga make azaba yagiye yizigamira hakiri kare, agashorwa ahandi akamubyarira inyungu.

Gatabazi yasabye abitabiriye amahugurwa gutangira kwizigama no kubishishikariza abaturage kugira ngo bazabashe kugira amasaziro meza.

Guverineri Gatabazi atangiza ku mugaragaro amahugurwa kuri Ejo Heza Ubwizigame bw’igihe kirekire muri Rulindo

Biteganywa ko umuntu ukorana na banki ashobora kuyisaba kujya ikura amafaranga kuri konti ye ikayashyirira mu kigega cy’ubwizigame, bidasabye umuntu kubigiramo uruhare cyangwa kuvuga ngo wibagiwe.

Ikindi ni uko niba umunyamuryango asanze azajya abasha gutanga nk’amafaranga ibihumbi bitanu buri gihembwe, natabishobora kubera impamvu runaka nta bihano byashyizwemo, ndetse hateganyijwe n’uburyo bwo kwinjira mu myirondoro yawe ukaba wagabanya cyangwa ukongera umusanzu wiyemeje gutanga.

Ngo amafaranga umuntu yizigamiye nta musoro azatanga, azabanza azigame ndetse amafaranga yungutse na yo nta musoro leta izafataho.

Rutsinga yakomeje agira ati “Najya kuyakuramo, icyo gihe ni bwo hazarebwa umusoro hashingiwe ku mategeko azaba ahari, ku nyungu azaba amaze kubona.”

Itegeko rya pansiyo risanzwe rivuga ko umuntu abona amafaranga yiteganyirije iyo ageze ku myaka ya pansiyo, ariko aha biteganywa ko ashobora kugira ibibazo amafaranga yazigamye n’inyungu yayo akabihabwa.

Aya mafaranga kandi azaba ashobora gutangwaho ingwate muri banki ku buryo ushobora kubona inguzanyo.

Yakomeje agira ati “Ubwizigame bw’abanyamuryango buzakorwamo ishoramari kandi rizakorwa n’abantu babizobereyemo, bagenzurwa na Banki Nkuru y’Igihugu ku buryo umutungo w’abanyamuryango uzaba ufite umutekano uhagije.”

Imisanzu ya Ejo Heza ubwizigame bw’igihe kirekire izacungwa n’Ikigo cy’Igihugu cy’ubwiteganyirize (RSSB), Banki Nkuru y’Igihugu ikaba izakomeza gukurikirana imikorere y’ubu bwizigame.

 

TANGA IGITEKEREZO

8 Comments on “MINECOFIN yasobanuye uburyo bufasha buri munyarwanda kwizigamira”

  1. Mwaramutse! iyi gahunda ni nziza,nkanjye ko nari muri RSSB maze 9yrs,umusanzu nawimumurira EJO HEZA byakunda,mwansubiza.

  2. Hatangwe amakuru ahagije byose birahinnye gusa nibyiza pfite account muri RSSB gusa singikora ubwose na shifuting cash bikemera ?ikindi Bavuze ko uyashaka wayakurayo kandi ahandi bati ntiwemerewe before 55yrs ?Inyungu yo ibarwa gute umuntu ashatse yazigama arenze kuyo bavuze haruguru ?

  3. ese iyo ukeneye kuyakuraho nihe ujya kuyaka? ese niba uzigama ukoresheje Mobil Money uyakeneye wayabona ute? dukeneye amakuru arambuye kuko ntituzi buri kiciro ayo cyajya kizigama, murakoze

Leave a Reply

Your email address will not be published. Required fields are marked *