17°C , Thunderstorms | Kigali-Rwanda

MINECOFIN: Imyenda u Rwanda rufitiye amahanga nta mpungenge iteye

Yanditswe na Nshimyumukiza Janvier Popote

Ku ya 07-05-2019 saa 19:13:33
Umuyobozi Mukuru ushinzwe Ubukungu muri MINECOFIN, Amina Umulisa Rwakunda, aganira n'abanyamakuru

Minisiteri y’Imari n’Igenamigambi (MINECOFIN) n’impuguke zitandukanye mu bukungu, bahuriza ku kuvuga ko imyenda u Rwanda rufitiye amahanga nta mpungenge iteye.

Bavuga ko gufata umwenda atari ikibazo mu gihe uwo mwenda ushorwa mu mishinga yunguka, bigashimangirwa no kuba ibihugu bikize biri ku isonga mu gufata imyenda myinshi y’amahanga.

Umuyobozi Mukuru ushinzwe Ubukungu muri MINECOFIN, Amina Umulisa Rwakunda, avuga ko amadeni u Rwanda rukura hanze mu musaruro mbumbe warwo (GDP) ari 41%.

Iryo janisha ry’inguzanyo z’amahanga muri GDP y’u Rwanda ni rito ugereranyije n’irya Uganda (45%), Kenya (47,6%), mu gihe Tanzania ari 34,6% naho u Burundi bukaba buri kuri 14,9%.

Ideni ry’u Rwanda, kuri Rwakunda n’impuguke zitandukanye, ni rito kuko ingano ntarengwa y’amadeni y’amahanga muri GDP ku bihugu byo mu Muryango w’Afurika y’Iburasirazuba ari 50%.

Urebye amadeni y’igihugu muri rusange, habariwemo n’amadeni Leta ifata imbere mu banyagihugu ndetse n’abikorera n’ibigo bya Leta byishingirwa bigahabwa inguzanyo (Public Guaranteed Loans), u Rwanda ruri ku ijanisha rya 53,8%, mu gihe igipimo ntarengwa cya Banki y’Isi n’Ikigega Mpuzamahanga cy’Imari (IMF) ari 75% muri GDP y’Igihugu.

Ibyo ni bimwe byaganiriweho mu nama nyunguranabitekerezo yateguwe n’ihuriro rya EPRN (Economic Policy Research Network) ku bufatanye na MINECOFIN, yabaye kuwa 7 Gicurasi 2019 i Kigali, yigaga ku madeni u Rwanda rufata.

Abayitabiriye barimo abashakashatsi, abayobozi mu nzego za Leta, abo mu miryango ya sosiyete sivile, bahuriza ku ku kuvuga ko gufata ideni ubwabyo atari ikibazo, ko icyangombwa ari ukumenya icyo ugiye kurikoresha, rigashorwa mu mishinga yunguka igira uruhare mu iterambere ry’igihugu.

Hatanzwe ingero ku mishinga nka Kigali Convention Centre, Ikibuga cy’Indege cya Bugesera na Sosiyete ya RwandAir, nk’imwe mu mishinga yashowemo amadeni menshi itanga icyizere.

Rwakunda ushinzwe Ubukungu muri MINECOFIN, ati, “Muri 2013 twagiye hanze gushaka miliyoni 400 (z’Amadolari) kugira ngo tubashe kuzamura ubukerarugendo bw’u Rwanda, dushora imari muri Kigali Convention Centre, kugira ngo tureshye inama, dufungure amadirishya y’ubukerarugendo ku buryo inama nyinshi mpuzamahanga ziza mu Rwanda, uwo ni umushinga uyu munsi tuvuga ko wadufashije kwagura cyane urwego rw’ubukerarugendo, mwareba n’ubwinshi bw’inama dusigaye twakira kubera iryo shoramari twakoze.”

Yunzemo ati, “Uyu munsi nta mbogamizi dufite mu kwishyura amadeni kuko turimo kohereza byinshi mu mahanga, bidufasha kwishyura amadeni dufata, ku gipimo cy’ibyo twinjiza mu gihugu naho duhagaze neza.”

Rwakunda yavuze ko mu gufata inguzanyo, u Rwanda rurangamira inguzanyo z’igihe kirekire kandi zikenera inyungu nto (concessional loans), ku buryo inguzanyo zihenze (commercial loans ziba nkeya), ibi na byo bikaba bifasha igihugu mu kugira amadeni adateye impungenge.

Imibare itangwa na MINECOFIN igaragaza ko 79% by’inguzanyo u Rwanda rufata ari iz’igihe kirekire ndetse zishyurwa ku nyungu nto, muri zo izingana na 4% zikaba ari iz’u Bushinwa.

“U Rwanda rumeze neza cyane”

Prof Musahara Herman, umushakashatsi akaba n’Umwarimu w’Ubukungu muri Kaminuza y’u Rwanda, ni umwe mu bahamya ko imyenda u Rwanda rufite nta mpungenge na nke iteye.

Ati, “U Rwanda rumeze neza cyane”, akabishingira ku kuba mu myaka ya 2000 u Rwanda rwari mu bihugu by’ibikene byazahajwe n’amadeni bizwi nka HIPC (Highly Indebted Poor Countries) ariko ubu rukaba rufata imyenda ikenewe kandi igaragara ko izazamura imibereho y’abaturage.

Ubwo u Rwanda rwari muri HIPC, nk’uko Prof Musahara abisobanura, byari byaratewe ahanini n’inguzanyo Leta yabanje yari yarafashe irimo amafaranga yaguzwe imihoro yakoreshejwe mu gihe cya Jenoside yakorewe Abatutsi mu 1994.

Abajijwe niba nk’impuguke abona u Rwanda rushora imari mu mishinga yunguka ku buryo ruzabasha kwishyura amadeni rufata ndetse rukaba rwagurizwa andi bitarugoye, Prof Musahara yagize ati, “N’ababishinzwe nka Banki y’Isi barabyivugiye ko u Rwanda rumeze neza, kuko muri politiki y’imyenda, iyo utameze neza uba ugabanya ubushobozi bwawe bwo kujya kugurizwa nanone.”

Yunzemo ati, “Politiki y’u Rwanda igaragaza neza ko u Rwanda rushobora kuba rwafata indi myenda kandi ibihugu bikize usanga bifite ibipimo bibi ariko bashobora kugenda bakabona undi mwenda kubera ko abantu bareba bakavuga bati bariya bazaturiha.”

Inguzanyo z’amahanga mu ngengo y’imari ziziyongera umwaka utaha

Ageza imbanzirizamushinga y’ingengo y’imari y’umwaka wa 2019/20 ku bagize Inteko Ishinga Amategeko imitwe yombi, ku gicamunsi cyo kuwa 30 Mata, Minisitiri w’Imari n’Igenamigambi, Dr Ndagijimana Uzziel, yasobanuye ko Guverinoma iteganya kwinjiza mu ngengo y’imari ya 2019/20 amafaranga Miliyari 2,876.9, akaba aziyongeraho Miliyari 291.7 bingana na 11% ugereranyije na Miliyari 2,585.2 ari mu ngengo y’imari ivuguruye y’umwaka wa 2018/19 usatira umusozo.

Amafaranga akomoka imbere mu gihugu habariwemo n’inguzanyo z’imbere mu gihugu, biteganyijwe ko azagera kuri Miliyari 1,963.8, bingana na 68% by’Ingengo y’imari yose y’umwaka wa 2019/20.

Minisitiri Ndagijimana yakomeje agira ati, “Inkunga z’amahanga ziteganyijwe kugabanukaho 4%, zikava kuri Miliyari 425.4 zikagera kuri Miliyari 409.8 z’amafaranga y’u Rwanda, bingana na 14 % by’Ingengo y’imari yose.”

“Inguzanyo z’amahanga zo ziteganyijwe kwiyongeraho 7%, zikava kuri Miliyari 464.3 zikazagera kuri Miliyari 497 z’amafaranga y’u Rwanda bingana na 17% by’ingengo y’imari yose.”

Iyi nama yateguwe na EPRN ku bufatanye na MINECOFIN, yitabiriwe n’abahagarariye inzego za Leta n’imiryango ya Sosiyete sivile, impuguke mu bukungu, abanyeshuri n’ibindi byiciro bitandukanye

Abitabiriye ibiganiro byateguwe na EPRN na MINECOFIN batanze ibitekerezo binyuranye ku micungire y’imyenda igihugu gifata

Umwanditsi:

Nshimyumukiza Janvier Popote

Tanga Igitekerezo

Email yanyu ntigaragazwa ku rubuga. Amazina na Email ni ngombwa.