18°C , Partly cloudy | Kigali-Rwanda
Gakire Bob Umuyobozi mukuru ushinzwe imiterere y’inzego z’ibanze muri MINALOC arakangurira abaturage kwitabira ikoranabuhanga bashyiriweho

MINALOC irasaba abaturage kuyigezaho ibibazo bakoresheje ikoranabuhanga

Yanditswe na IYAREMYE YVES

Ku ya 11-10-2018 saa 08:48:37

Minisiteri y’Ubutegetsi bw’Igihugu (MINALOC) irakangurira abaturage kumenya ko hari uburyo bw’ikoranabuhanga bashyiriweho bubafasha kumenyekanisha ibibazo batavuye aho bari.

Ubu buryo bwatangijwe mu ntangiriro z’uyu mwaka bwiswe E-Citizen Complaints ngo ni gahunda yaje gufasha abaturage kujya bakemurirwa ibibazo bitabasabye kuza kuri minisiteri.

Umuyobozi mukuru ushinzwe imiterere y’Inzego z’ibanze muri MINALOC, Gakire Bob, avuga ko E-Citizen ifasha mu kwakira ibibazo, kubikurikirana no kubikemura.

Yagize ati: “E-Citizen Complaints ni uburyo bufasha abaturage kujya batanga ibibazo byabo bakoresheje ikoranabuhanga aho kugira ngo umuturage afate inzira aze i Kigali. Afata telefoni ye akandikamo ikibazo akacyohereza na twe tugahita tumenya ikibazo ndetse n’uwo acyoherereje.”

Akomeza avuga ko ubu buryo bukora bwihuse kandi bwizewe kandi ngo ibibazo by’abaturage hari uburyo byakirwamo.

Umuturage asabwa kujya atanga ikibazo cyananiranye mu nzego z’ibanze ndetse no mu karere kuko n’ubundi n’uzajya atanga ikibazo kitanyuze hasi azajya asubizwayo.

Ikindi ngo gahunda ijyanye n’iminsi yahariwe ibibazo bitandukanye by’abaturage ikomeza kubaho nta bwo ikurwaho n’ubu buryo bw’ikoranabuhanga, kandi ubu buryo bunafasha kumenya akarere karimo ibibazo byinshi kugira ngo minisitiri ageyo abikemure.

Ati : «Ku murongo wa telefoni, ubutumwa bukubiyemo ikibazo umuturage afite abwohereza kuri 5353, uyu ni umurongo utishyuzwa umuturage ahamagaraho cyangwa agakoresha yohereza ubutumwa bugufi (SMS), ikindi umuturage ashobora no kunyura ku rubuga rwa Minisiteri (Website) ahari/ahanditse e-Citizen na ho akaba yakwandikaho ikibazo cyangwa igitekerezo afite. Abona igisubizo mu buryo bwihuse bita rapid sms imubwira ko ikibazo ke cyakiriwe kandi kigejejwe ku babishinzwe.»

Gakire Bob Umuyobozi mukuru ushinzwe imiterere y’inzego z’ibanze muri MINALOC arakangurira abaturage kwitabira ikoranabuhanga bashyiriweho

Gakire Bob akomeza agira ati: “Impamvu nyamukuru E-Citizen Complaints yashyizweho, ni ukugira ngo inzego zose zifite uruhare mu gukemura ibibazo by’abaturage zigire amakuru ku kibazo cy’umuturage ndetse zikanamenya uburyo cyakurikiranwe. Bidufasha kumenya uko cyakemuwe cyane ko tuba dufite nimero ye ya telefoni tuvugana umunsi ku munsi.”

Uyu muyobozi avuga ko ubu buryo buje kunganira mu gukemura bya bibazo byajyaga bitinda kurangira cyane ko nubwo abaturage bafite abayobozi hafi yabo bitababuzaga kuza i Kigali kuri Minisiteri gutanga ibibazo byabo, ubu buryo bwashyiriweho abo baturage kugira ngo bubafashe kubariza aho bari.

Uburyo ikibazo gikemurwamo

Gakire ati: «Iyo ibibazo by’abaturage bitugezeho, nyuma birasesengurwa bigahabwa umurongo wihuse wo kubikemura, ubundi umuturage ahabwa nomero za telefoni z’uwo yabaza kuko hari igihe babaza wenda bitari mu nshingano za MINALOC, urugero ubaza ngo kwiyimura kuri lisiti y’itora cyangwa kwandikisha uruhushya rwo gutwara ibinyabiziga n’ibindi, duhita tumubwira uwo yabaza na nimero akayihabwa.»

Ibibazo byoherejwe byasubijwe 100%

Gakire yemeza ko kugeza ubu bamaze kwakira ibibazo bitandukanye birimo ibyanyuze mu buryo bwifashishije telefoni ndetse n’ibyaje binyuze mu buryo bwa murandasi, gusa ngo byakemutse byose nta gisigaye.

Yagize ati : «Kugeza ubu ibibazo 1878 byanyuze kuri murandasi byose byahawe ibisubizo bingana na 100% ariko ku buryo bw’ubutumwa bugufi tumaze kwakira ibibazo bisaga 5721 kandi byose byamaze guhabwa igisubizo, ikindi iyo ikibazo cyamaze kwakirwa umuturage asabwa gukurikiza umurongo ikibazo ke cyahawe kugira ngo gikemuke natwe tuba tubikurikirana, dukorana n’abo twabishinze tureba aho babigejeje.»

Zimwe mu mbogamizi zigihari

Gakire avuga ko kuri ubu hakiri abaturage bagikomeza gukora ingendo bajya mu nzego zitandukanye kugira ngo bakemurirwe ibibazo kandi hari uburyo bwihuse bahabwamo serivisi batagombye gusiragira.

Ati: “Haracyari ikibazo k’imyumvire hamwe na hamwe ikiri hasi, turakomeza ubukangurambaga dufatanyije twese n’inzego zose ngo imyumvire izamuke, turasaba ko mukomeza namwe kubimenyesha abaturage nk’itangazamakuru, gusa hari ikizere ko abaturage bazagera aho bakabyumva neza.”

Akomeza agira ati: “Turagira inama abaturage gukomeza kwitabira gukoresha ubu buryo bw’ikoranabuhanga bwashyizweho mu gutanga umurongo no gukemura ibibazo, twiyemeje kubasubiza ku gihe kandi tubafasha kugira ngo ibibazo byabo bikemuke neza kandi vuba, nta muturage ukwiye kugira ikibazo ngo avuge ko cyananiranye kandi duhari cyangwa ngo bakomeze bakoreshe amatike menshi bazana iwacu amadosiye, babyaze umusaruro iri koranabuhanga.”

Mukeshimana Ancille utuye mu Karere ka Rubavu ni umwe mu baturage bavuga ko batarasobanukirwa neza n’ubu buryo bw’ikoranabuhanga. Ati: «Ariko ntabwo ndabugerageza n’umunsi n’umwe cyakora hakozwe ubukangurambaga abaturage bose bakamenya ko ubu buryo buhari ibibazo byinshi byagejejwe mu nzego z’ibanze byakemuka.»

MINALOC itangaza ko ubu buryo bwitezweho kuzana impinduka mu nzego zigira uruhare mu gukemura ibibazo by’abaturage gusa magingo aya ubu uburyo buhuriweho n’Inzego z’ibanze ndetse na Minisiteri y’Ubutegetsi bw’Igihugu.

TANGA IGITEKEREZO

Leave a Reply

Your email address will not be published. Required fields are marked *