21°C , Mostly cloudy | Kigali-Rwanda
Imboga, imbuto n'ibikomoka ku bworozi ni bimwe byo Minisiteri y'Ubuhinzi n'Ubworozi ivuga mu bigiye gushyirwamo ingufu mu koherezwa ku isoko rimwe ry'Arurika

MINAGRI yerekanye ibyo u Rwanda rufitemo amahirwe mu isoko rimwe ry’Afurika

Yanditswe na MUTUNGIREHE SAMUEL

Ku ya 28-03-2018 saa 07:46:50

Minisitiri w’Ubuhinzi n’Ubworozi, Dr. Mukenshimana Geraldine, atangaza ko nk’uko ibihugu by’Afurika byemeye gufungura amarembo mu bucuruzi hakabaho isoko rimwe, u Rwanda nk’ibindi bihugu kuri uwo mugabane rufite byinshi rugiye kubyaza umusaruro mu kugeza kuri iryo soko mu bikomoka ku musaruro w’ubuhinzi n’ubworozi.

Imboga, imbuto n’ibikomoka ku bworozi ni bimwe byo Minisiteri y’Ubuhinzi n’Ubworozi ivuga mu bigiye gushyirwamo ingufu mu koherezwa ku isoko rimwe ry’Arurika

Yabitangaje mu kiganiro aherutse kugirana n’abanyamakuru ku ngingo zitandukanye zifite aho zihuriye n’ibyo u Rwanda rwiyemeje mu ntego z’Afurika Yunze Ubumwe.

Dr Mukenshimana avuga ko kuba ibihugu by’Afurika byashyira umukono ku masezerano ashyiraho isoko rimwe nk’u Rwanda rugiye kubiboneramo amahirwe menshi yo kubyaza umusaruro, cyane mu kongera umusaruro w’ibyoherezwa hanze mu bihingwa nk’ibigori, imbuto n’imboga n’indabo no mu kongera ubwiza bwabyo.

Ati “Wasangaga aho kugira ngo abanyafurika bacuruze ibiribwa hagati yabo twasimbukaga tukajya kubikura i Burayi  cyangwa no muri Amerika n’ahandi, iyi nama ishyiraho isoko ryagutse ry’Afurika duhuriyeho tuyifitemo inyungu.”

Kugira ngo iri soko tubashe kuryinjiramo, ni ukureba ibyo dufitemo amahirwe kuko hari ibyo tutayafitemo; sinakubwira wenda ngo tuzahiga Tanzania cyangwa Kenya na Zambia mu bigori, ariko dushobora kongerera agaciro ibigori tugacuruzayo ibyongerewe agaciro.

Ushobora no gucuruzayo ibijyanye n’amata, ibijyanye n’inyama, ibijyanye n’imboga n’indabo. Ibi ni ibintu bifite agaciro, ni amasoko arimo afungurwa, tukareba noneho twebwe nk’iguhugu ibyo dufitemo amahirwe menshi n’ubumenyi bwisumbuyeho, tukaba ari byo tujyanayo.”

Yakomeje avuga ko kuba ibihugu byasinya amasezerano atari cyo kirebwaho cyane, ahubwo harebwa n’uburyo bushyirwaho kugira ngo icyo kintu gishoboke.

Ati “Hari byinshi nk’igihugu cyacu kimaze iminsi gikora nk’ibyo gukuraho Viza, kwagura ingendo za RwandAir ikagenda ijya mu bindi bihugu byinshi by’Afurika, ariko no kugira ngo n’uwo musaruro ucuruzwa uboneke.

Urebye ibihugu twe ducuruzanya cyane ni Tanzania, Uganda, cyane cyane Kongo (RDC); hari ibicuruzwa bimwe na bimwe bimanuka cyangwa bikava muri Afurika y’Amajyepfo nka Zambia, Malawi aho twajyanagayo ibirayi, isoko ryo muri Afurika y’Iburengerazuba. Ikigamijwe ni ukugira ngo iri soko ryongerwemo mu bwinshi ibijyayo.”

Yasobanuye ko u Rwanda narwo rufite ibyo rugomba gukora muri iyo nzira kuko ubucuruzi ari ubuhahirane ku mpande zombi.

Ati “Birumvikana ko natwe hari ibyo tuzakurayo kuko ubucuruzi ni urujya n’uruza nta bwo ari inzira imwe gusa ariko mbona ko cyane cyane ibituruka ku matungo, ku mboga n’imbuto tuzabigiramo amahirwe.”

Inama y’abakuru b’ibihugu by’Afurika yabereye i Kigali ku wa 21 Werurwe  yasojwe ibihugu 44 muri 54 biri kuri uwo mugabane ari byo bishyize umukono ku masezerano y’isoko rimwe, hateganyijwe igihe cy’amezi atandatu ari imbere ngo n’ibindi bihugu bisigaye bifate ikemezo nubwo nta tegeko rihana igihugu kitazayashyiraho umukono.

 

 

 

 

TANGA IGITEKEREZO

Leave a Reply

Be the First to Comment!

avatar