23°C , Partly sunny | Kigali-Rwanda

MINAGRI yatangije umushinga wo kumenya ifumbire ikenewe mu butaka

Yanditswe na Mutungirehe Samuel

Ku ya 13-02-2020 saa 16:35:01
Dr. Charles Bucagu, avuga ko Guverinona y'u Rwanda yiyemeje kongera umusaruro binyuze no mu buryo bwo kongera ingano y'ifumbire kuri hegitari (Foto Samuel M)

Minisiteri y’Ubuhinzi n’Ubworozi n’umufatanyabikorwa wayo Bill & Melinda Gates batangije umushinga “Rwanda Soil Information Services (RwaSIS)”, ugiye kwita ku gutanga amakuru y’imiterere n’imicungire y’ubutaka, mu rwego rwo gukoresha igipimo nyacyo k’ifumbire n’ishwagara ku butaka busharira no kurwanya isuri hagamijwe kongera umusaruro.

Ni umushinga wa miriyoni zigera kuri ebyiri z’amadorari y’Amerika, watangijwe i Kigali kuri uyu wa 13 Gashyantare 2020, uzamara imyaka ibiri n’igice ukora.

Umuyobozi Mukuru wungirije w’Ikigo k’Igihugu gishinzwe Ubuhinzi n’Ubworozi ushinzwe ubushakashatsi Dr. Bucagu Charles, yavuze ko ikigamijwe ari ukwiga uko ifumbire n’ishwagara bikwiye gukoreshwa ku butaka buhingwa mu Rwanda, buri gace bakamenya ibipimo nyabyo bikenewe bitewe n’imiterere yako.

Ati “Inyigo zigaragaza ko ifumbire dukoresha hamwe igenda itanga umusaruro mwinshi, ahandi igatanga umusaruro muke; dutekereza ko ubutaka budatanga umusaruro twari twiteze nubwo tuba twatanze amafumbire mu baturage.

Inyingo rero zagaragaje ko ziriya fumbire dutanga hashobora kuba hari ibindi bintu bishobora kuba byakongerwamo zikaduha umusaruro twifuza”.

Dr. Bucagu yakomeje avuga ko ubusanzwe ifumbire zikoreshwa mu Rwanda ziganjemo ibinyabutabire bya Nitrogen, Phosphor na Potassium ariko ubu harimo n’ibindi bagenda bongeramo bijyanye n’ibitunga igihingwa, intungagihingwa (Micronutrients) ku kigero gike.

Ati “Izo ntungagihingwa nazo zigomba kongerwamo ni nkeya, zikenerwa mu ngano nke ariko bifite impinduka ku musaruro. Inyigo rero z’ubutaka turimo turareba ngo ibyo bindi biburamo ni ibihe, kugira ngo byongerwemo. Ibyo bibura bigiye bitandukanye ubutaka ku bundi.

Ubutaka duhinga mu Majyaruguru mu Birunga nta bwo busa n’ubwo muri Nyaruguru cyangwa muri Nyamagabe aho dufite ubutaka bushaririye cyane, urumva ko ibigenerwa ubutaka bw’ibirunga bitandukanye n’ibyo mu butaka bwo mu Majyepfo kuko burashaririye bukeneye gushyirwamo imborera nyinshi n’ishwagara nyinshi. Ibyo ni byo umushinga ugiye kureba ku rwego rwa rusange ku gihugu”.

Umunyamabanga Uhoraho muri Minisiteri y’Ubuhinzi n’Ubworozi, Musabyimana Jean Claude, watangije uwo mushinga, yavuze ko umushinga ‘RwaSIS’ uje kongera umusaruro mu buhinzi no gutuma inganda zihaza ku byo zikenera kandi ujyanye na gahunda ya Guverinoma y’imyaka irindwi aho ubuhinzi buzajya buzamuka ku kigero nibura cya  6% kuva mu 2017 kugeza mu 2024.

Ati “Ibi bisaba kugira ibyo tugeraho mu gutunganya ubutaka mu buhinzi butanga umusaruro  kugira ngo urwego rw’ubuhinzi rubashe kugera ku nshingano zarwo”.

Muri uyu mushinga na Leta izajya yongeramo izindi ngufu z’amafaranga aho bikenewe kugira ngo ubashe kugera ku ntego zawo.

Umwanditsi:

Mutungirehe Samuel

One Comment on “MINAGRI yatangije umushinga wo kumenya ifumbire ikenewe mu butaka”

  1. Turashima cyane rwose iyo gahunda. Nihashyirwemo imbaraga nyinshi bahere cyane cyane muri zone Agricole zikiri inyuma ku musaruro. aho bigaragara ko u butaka bufite ibibazo bitandukanye.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.