27°C , Mostly cloudy | Kigali-Rwanda

MINAGRI n’ibigo biyishamikiyeho bagaragaje imikoreshereze y’ingengo y’imari 2018/2019

Yanditswe na SEZIBERA ANSELME

Ku ya 08-05-2018 saa 05:27:57

Minisiteri y’Ubuhinzi n’Ubworozi (MINAGRI), Ikigo k’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB, Ikigo kigihugu gishizwe guteza imbere ubuhinzi n’ubworozi, RAB, n’ibindi biyishamikiyeho bagaragarije Komisiyo y’Ingengo y’Imari y’Inteko Ishinga Amategeko, Umutwe w’Abadepite, gahunda y’ibikorwa biteganywa gushyirwa mu bikorwa biteganywa mu ngengo y’imari ya 2018/2019.

Minisitiri w’Ubuhinzi n’Ubworozi Dr Mukeshimana Gerardine (iburyo) asobanurira abagize Komisiyo y’ingengo y’imari y’Inteko Ishinga Amategeko imikoreshereze y’ingengo y’imari (Foto Gisubizo G)

Minisitiri w’Ubuhinzi n’Ubworozi, Dr Mukeshimana Gerardine, avuga ko mu ngengo y’imari y’umwaka wa 2018/2019 Minisiteri y’ubuhinzi n’ubworozi izashyira ingufu muri porogaramu y’ubuhinzi (PSTA4), ikazibanda ku bushakashatsi n’iyamamazabuhinzi n’ubworozi ndetse no guhangana n’imihindagurikire y’ibihe.

Dr Mukeshimana atangaza ko kuri ubu hariho ibihe bigoranye by’izuba ndetse n’imvura akaba ari ibintu bigomba gushyirwamo imbaraga ariko hakazibandwa mu kureba ikoranabuhanga ryongera umusaruro kuko hafi 30% by’abahinzi baba bafite ubutaka buto cyane.

Agira ati: Ikoranabuhanga rijyanye no kongera umusaruro ku buso buto nazo zirimo kandi muri uyu mwaka wa mbere dutangiye hazabamo inyigo nyinshi zizakorwa zituma twitegura gushyira mu bikorwa gahunda y’imyaka 7 iri imbere”.

Ku byerekeranye n’ubuhinzi, Dr Mukeshimana akomeza atangaza ko mu 2018/2019 hazabaho uburyo bwo kongera ibisanzwe byoherezwa mu mahanga birimo icyayi, ikawa, imboga n’imiteja hamwe no gushyira ku isoko ibyujuje ubuziranenge kugira ngo bigende bifite agaciro kisumbuyeho kandi hibandwa ku masoko yegereye u Rwanda nko mu bihugu byo mu karere.

Dr Mukeshimana atangaza ko mu ngengo y’imari y’uyu mwaka wa 2018/2019 MINAGRI izanibanda ku bworozi buganisha ku matungo magufi n’ubuganisha ku mukamo mwinshi kandi utunganyije.

Nk’uko abishimangira muri uyu mwaka w’ingengo y’imari hazanongerwa uburyo bufasha amatungo gukura na gahunda yo kurwanya indwara hifashishijwe ubushakashatsi kugira ngo burambe.

Yagaragarije abagize Komisiyo y’ingengo y’imari umutwe w’Abadepite ko izo gahunda zo guhangana n’imihindagurikire y’ikirere n’ubworozi ko basanzwe bazifatanyamo n’abahinzi, MINAGRI ikagira uruhare mu kubafasha kureba ubuziranenge n’ubwiza ku musaruro mwiza ku isoko yaba ari ibikomoka ku bworozi cyangwa ku buhinzi.

Abagize Komisiyo y’ingengo y’imari umutwe w’abadepite kandi banasabye ko MINAGRI n’ibigo biyishamikiyeho byajya byiga ku butaka mbere y’uko buhingwaho, Dr Mukeshimana agaragaza ko hakozwe ubushakashatsi mu bijyanye n’imiterere ya buri butaka n’ibisabwa kujyamo.

Ati: “Hari ubushakashatsi burimo bukorwa ku mafumbire y’ubwoko butandukanye kandi akaba ari ku isoko nubwo ataravugwa cyane nka DAP, NPK n’izindi ariko burakomeza kugenda bukorwa kugira ngo bubashe kugera ahantu hose”.

Umuyobozi w’Ikigo k’Igihugu cy’Ubuhinzi n’Ubworozi (RAB) Dr Karangwa Patrick yagaragarije iyo komisiyo ko kugeza ubu hari amoko mashya meza y’ibirayi ari ku isoko kandi arimo gutuburwa kugira ngo abashe kuzagera ku bantu benshi. Dr Karangwa asanga ari igisubizo kiza ku nganda z’ibirayi kuko zizabona ubwoko bwiza nyuma yaho hari haragaragajwe ikibazo k’ibura ry’ibirayi byiza byo mu bwoko bwa Kinigi.

Dr Karangwa ahamiriza abagize komisiyo ko mu bihembwe 3 biri imbere ubwo bwoko bw’ibirayi buzaba bwageze ku bahinzi benshi.

Mu ngengo y’imari y’umwaka wa 2018/2019 MINAGRI izakoresha miliyari 125 mu bikorwa bitandukanye by’ubuhinzi n’ubworozi.

TANGA IGITEKEREZO

Leave a Reply

Be the First to Comment!

avatar