21°C , Partly cloudy | Kigali-Rwanda
Leta irimo gukora ibishoboka byose kugira ngo Abanyarwanda bose bazabe bihaza mu biribwa 100% mu mwaka wa 2030 ( Ifoto James R)

MINAGRI: Abanyarwanda 81% barihagije mu biribwa

Yanditswe na MUKAGAHIZI ROSE

Ku ya 16-10-2018 saa 11:49:23

Minisiteri y’Ubuhinzi n’Ubworozi (MINAGRI) iremeza ko abanyarwanda 81% bihagije mu biribwa.

Dr. Murekezi Charles ushinzwe iterambere ry’ubuhinzi muri MINAGRI yongeraho ko Abanyarwanda bose bazaba bihaza mu biribwa 100% mu mwaka wa 2030.

Mu Kiganiro kihariye n’Imvaho Nshya, Dr. Murekezi yavuze ko Umunsi w’ibiribwa ku Isi uba buri tariki ya 16 Ukwakira buri mwaka usanze mu Rwanda kwihaza mu biribwa bihagaze neza.

Yagize ati “Mu Rwanda, imibare yerekana ko Abanyarwanda 81% bihaza mu biribwa. Ni ukuvuga ngo bafite ibyo kurya bihagije, 19% bo ntibaragera ku rwego rwo kwihaza mu biribwa ariko hari ingamba zirimo gushyirwamo imbaraga zo kubafasha ku buryo na bo bakwinjira mu mubare w’abashobora kwihaza.”

Nkuko akomeza abivuga, zimwe muri izo ngamba zirimo gushishikariza abantu kwitabira ibikorwa bifasha mu kongera umusaruro bityo bikabateza n’imbere mu mibereho yabo ya buri munsi.

Uretse izo ngamba, hari n’ingamba zirimo kubashyira muri gahunda z’ubudehe, hari ingamba zo kubafasha kubona akazi bakabona amafaranga, hari na gahunda za VUP babonamo amafaranga yo kwibeshaho.

Murekezi avuga ko imihindagurikire y’ikirere iri mu bigira uruhare rwo gutuma abantu batihaza mu biribwa.

Icyakora ngo biramutse bitagenze neza, Murekezi avuga ko u Rwanda rufite ikigega cyashyizwemo imbaraga ku buryo ku rwego rw’igihugu Leta ishobora gutanga ibiryo amezi atatu ku banyarwanda bose igihe haba havutse ikibazo

Ati “Kuri ubu, ku rwego rwa buri karere, hashyirwayo ibigega, ni ibintu turimo gushyiramo imbaraga ku buryo habaye ikibazo bashobora gufasha abaturage babo.”

Ku birebana n’ikigega, ngo imbaraga zirashyirwa mu buhinzi bugamije isoko ariko abaturage bakigishwa umuco wo guhunika umusaruro wabo haba no ku rwego rw’ amakoperative mu guhuza umusarururo, bagafashwa kubona ibigega byo guhunika.

Leta irimo gukora ibishoboka byose kugira ngo Abanyarwanda bose bazabe bihaza mu biribwa 100% mu mwaka wa 2030 ( Ifoto James R)

Uko uwihagije mu biribwa aba ahagaze mu byerekeranye n’imirire

Umuryango w’Abibumbye ugaragaza ko umuntu wihaza mu biribwa ari ufite ibiribwa bimuhagije cyangwa se ufite ubushobozi bwo kuba yabigura.

Dr. Muhinda Otto Vianney, Umuyobozi wungirije w’Ishami ry’Umuryango w’Abibumbye ryita ku buhinzi n’ibiribwa ku Isi FAO, asobanura ko umuntu aba yihagije mu biribwa iyo afite ibiribwa bihagije arya buri munsi, ibiryo bishobora kumuha kilokaroli 2500 ku munsi ku muntu mukuru, garama 50 za poroteyine.

Yagize ati “Ibyo ni byo umuntu aheraho akavuga ati umuntu yihagije mu biribwa. Ni ukuvuga ngo umuntu yihagije mu biribwa iyo afite ibyo biryo bihagije buri munsi akabibona mu buryo bukomeza ku buryo atabibona ku munsi umwe ngo uwundi abibure cyangwa abona kilokarori 5000 ejo akabona 1000 ubwo ni mu buryo burambye, uko wabibona kose, waba wabihinze, wabiguze ku isoko, uko wabibona kose ariko ukabona ibiryo bihagije wowe n’abawe igihe cyose ku buryo utajya munsi y’urwego umuntu mukuru akwiye kujyaho.”

Avuga ko hari zimwe mu mpamvu zishobora gutuma umuntu atagera kuri iyo ntego nk’iyo izuba ryavuye umuntu yagombaga kweza toni zo kurya akeza ibiro 500.

Ati “Ni na cyo turimo kuvuga kuri iki gihe ko mu 2030 nk’uko Isi yose yabyiyemeje muri 2015 ubwo hajyagaho intego z’iterambere rirambye ko mu 2030 buri muntu wese yaba ageze ku buzima ubu n’ubu intego yayo ya kabiri iravuga ngo Isi yose yagombye kuba yihagije mu biribwa.”

Akomeza avuga ko kwihaza ukarenza na byo bigira ingaruka mu birebana no guteza umubyibuho ukabije n’izindi ndwara.

Ikibazo kijyanye no gutagaguza ibyo kurya na cyo ngo ni ikibazo gikomeye aho kuri ubu bifuza ko abatuye Isi bacyumva bityo umusaruro wavuye mu buhinzi ugasigasirwa aho gusesagurwa.

Dr. Muhinda Otto Vianney ati “Kwihaza nta bwo ari ugupfusha ubusa ahubwo ni ukugira umusaruro ukawufata neza ukawugeza ku bagomba kuwufungura ukanateganyiriza igihe gitaha.”

Kugeza ubu umusaruro ngo urahari, ibibazo byinshi bituma abantu batawugeraho ngo ni ukubifatira ingamba kuko nk’uko abishimangira ngo ku Isi kwihaza mu biribwa birashoboka, hakabaho Isi idafite inzara aho buri wese afite ibyo kurya bihagije.

Kwizihiza umunsi w’ibiribwa ku Isi wizihizwa ku ya 16 Ukwakira buri mwaka, uyu mwaka mu Rwanda ukaba wizihizwa uyu munsi mu karere ka Kirehe.

Insanganyamatsiko yawo igira iti “Ibikorwa byacu ni ryo shingiro ry’ejo hazaza. Birashoboka kugira Isi izira inzara mu mwaka wa 2030.”

TANGA IGITEKEREZO

Leave a Reply

Your email address will not be published. Required fields are marked *