21°C , Intermittent clouds | Kigali-Rwanda
Ambasaderi Nduhungirehe Olivier, Umunyamabanga wa Leta muri Minisiteri y'Ububanyi n'Amahanga ushinzwe Umuryango w'Afurika y'Iburasirazuba

MINAFFET yasobanuye umusaruro wa ‘Rwanda Day’

Yanditswe na Kayitare Jean Paul

Ku ya 05-08-2019 saa 16:43:24

Umunyamabanga wa Leta muri Minisiteri y’Ububanyi n’Amahanga n’Ubutwererane MINAFET, Amb. Nduhungirehe Olivier, mu kiganiro kihariye n’Imvaho Nshya, yavuze ku musaruro wa Rwanda Day ihuza Abanyarwanda n’inshuti zabo batuye mu mahanga.

Amb. Nduhungirehe yagize ati, “Umusaruro wa Rwanda Day urahari kubera ko hari Abanyarwanda benshi bagiye baza muri Rwanda Day batazaga mu Rwanda ariko nyuma bakaza mu Rwanda, hari abagiye babaza ibibazo byabo Perezida wa Repubulika kandi bakabona ibisubizo abatabibonye bakabyandika kandi bakabishakira igisubizo.”

Akomeza kandi avuga ati “Rwanda Day zizaza mu minsi iri imbere zizagira akamaro kuko hari Abanyarwanda bahora bifuza gutaha, si ugutaha nyirizina ahubwo ni uko bafite igihugu bashobora gutahamo igihe cyose bifuza kandi bagasubira mu bihugu babamo mu gihe banabifitemo imirimo bakora.”

Ubuyobozi bw’Abanyarwanda batuye mu mahanga butangaza ko kugeza ubu hari intambwe imaze guterwa kubera Rwanda Day ibera hirya no hino mu bihugu by’amahanga. Bugaragaza ko amafaranga yoherezwa mu Rwanda yiyongereye ndetse ko n’ubucuruzi bw’abashora imari mu Rwanda bwiyongereye kubera Rwanda Day.

Eng. Murenzi Daniel, umuyobozi wa Diaspora Nyarwanda ku Isi RDGN (Rwanda Diaspora Global Network), yabwiye Imvaho Nshya ko Rwanda Day ari umwanya mwiza wo kwagura ishoramari ryaba iry’abanyamahanga baza mu gihugu cyangwa Abanyarwanda bajya kuyishora hanze, kuko kuri gahunda igenga umunsi wa Rwanda Day abacuruzi barahura bakanaganira.

Yagize ati “Umusaruro wa Rwanda Day ugenda uzamuka umunsi ku wundi cyane cyane ko Abanyarwanda baba begerejwe ubuyobozi. Iriya Rwanda Day iyo Perezida wa Repubulika ahageze, aba ari umugisha ku banyarwanda batuye mu mahanga kugira ngo bivomere ku isoko.”

Akomeza agira ati “Kenshi iyo baje ingingimira bagendaga bagira cyangwa ibibazo bitandukanye mu buryo bwo gushora imari cyangwa kwihutisha iterambere babisobanurirwa hariya ku isoko. Buriya ni nka kwakundi Umukuru w’Igihugu ajya gusura abaturage mu ntara, abaturage bakarushaho gusobanukirwa gahunda ya Leta aho igeze n’uko ishyirwa mu bikorwa.”

Insanganyamatsiko za Rwanda Day ziba zitandukanye kuko nk’iyo mu Budage yitegurwa itandukanye n’iy’ishize, ibyo byose bikaba bigamije iterambere ry’u Rwanda cyangwa gushishikariza Abanyarwanda batuye mu mahanga kwiyumvamo u Rwanda no kurushoramo imari no kugira ngo bafatanye kuba amaboko y’igihugu cyabo.

Eng. Murenzi ahamya ko Rwanda Day imaze gutanga umusaruro uhamye. Ati “Byatumye kohereza amafaranga byiyongera, gushora imari na byo byiyongera kuko akenshi abantu bagenda barushaho gusobanukirwa ibyiza by’u Rwanda kandi baba bagize n’umugisha wo kubibwirwa na Nyakubahwa Perezida wa Repubulika. Ni muri urwo rwego uko Rwanda Day zigenda ziyongera, habaho gutinyuka kumva aho u Rwanda rugeze.”

Abitabiriye uwo munsi bahabwa umwanya wo kubaza ibibazo Umukuru w’Igihugu, gutanga ibitekerezo n’ibyifuzo. Uko guhabwa umwanya bituma benshi batarya indimi bakavuga uko babona iterambere u Rwanda rumaze kugeraho n’ibyakomeza gukorwa ngo risugire.

Kuva mu 2010 Abanyarwanda baba mu gihugu, mu mahanga n’inshuti z’u Rwanda, bagira umunsi bahurira hamwe bakaganira ku cyarushaho guteza imbere igihugu, abamaze igihe kitari gito batakigeramo bakamarwa amatsiko bakabwirwa aho kigeze, bagasuzumira hamwe uruhare rwa buri wese mu iterambere ryacyo.

Ambasaderi Nduhungirehe Olivier, Umunyamabanga wa Leta muri Minisiteri y’Ububanyi n’Amahanga ushinzwe Umuryango w’Afurika y’Iburasirazuba

TANGA IGITEKEREZO

Leave a Reply

Your email address will not be published. Required fields are marked *