22°C , Partly sunny | Kigali-Rwanda

Min Shyaka yashimye Intore mu Ikoranabuhanga, gahunda yitezweho byinshi

Yanditswe na Rutayisire Emile

Ku ya 08-10-2019 saa 15:42:47
Minisitiri w'Ubutegetsi bw'Igihugu Prof. Shyaka Anastase

Uko zerivisi z’ikoranabuhanga zigenda zimenywa n’abaturage ni ko zirushaho guteza imbere Igihugu. Leta y’u Rwanda ikomeje gushyira imbaraga mu guhugura abantu ibaha ubumenyi ku ikoranabuhanga kugira ngo bage biyakira serivisi bakoresheje terefoni zabo.

Minisitiri w’Ubutegetsi bw’Igihugu Prof. Shyaka Anastase avuga ko kuba abantu bishimira uko bahabwa serivisi bageze kuri 85% bavuye kuri 72% ari ibintu byo kwishimira kandi ko serivisi z’ikoranabuhanga ziteza imbere igihugu.

Yabitangaje  ubwo yashimaga gahunda Leta yashyizeho yo guhugura abaturage mu bijyanye n’ikoranabuhanga “Intore mu ikoranabuhanga” kugira ngo bage bisabira serivisi batavuye aho bari ahubwo bagakoresha terefoni zabo.

Yagize ati:“Iyi gahunda yo kwegera abaturage bagahabwa ubumenyi ku ikoranabuhanga izaziba icyuho cyariho, kuko kugeza ubu abaturage bishimira serivisi bahabwa bageze kuri 85% bavuye kuri 72%. Iyi gahunda izatuma abaturage benshi bamenya kwiyakira serivisi batavuye aho bari, nta mwanya bataye, nta muntu bavuganye ngo aramuha serivisi mbi ahubwo age abona ubutumwa gusa byaba ngombwa ko akenera icyangombwa akava iwe agiye kugitora gusa.”

Akomeza avuga ko serivisi nk’izo z’ikoranabuhanga ziteza imbere abaturage kubera ko zitamutwara igihe ahubwo akabona uburyo bwo kwikorera imirimo yindi imuteza imbere.

Prof. Shyaka kandi avuga ko Leta ifite gahunda yo kubaka Igihugu gishingiye ku Munyarwanda ushoboye, udasindagizwa, Umunyarwanda ujyana n’ibihe, wataye imvugo ivuga ko ‘Umurimo ari ubuhinzi ibindi ari amahirwe’ ahubwo akaba Umunyarwanda ufite ubumenyi bumuteza imbere.

Mu bigaragaza koko ko serivisi z’ikoranabuhanga ziteza igihugu imbere hari abaturage batanga ubuhamya bagaragaza ko igihe gihenda kandi iyo gikoreshejwe neza gituma utera imbere.

Mukamugema Marie Rose utuye mu Karere ka Bugesera yemeza ko imvune zabagaho zo kujya gushaka ibyangombwa bimwe na bimwe ku Karere ndetse no kwiganyira gushaka ubutabera zitakibaho.

Agira ati: “Kuri ubu gutanga ikirego mu rukiko ntibikirenza amasegonda 10 utavuye aho uri, kandi buri gihe ukamenya amakuru y’urubanza rwawe. Gushaka ibyangombwa by’amavuko, icyangombwa cy’uko washatse cyangwa utashatse byose bisigaye biri ku ikoranabuhanga.”

Akomeza avuga ko gutanga ikirego bitagisaba ko umuntu ajya ku rukiko yikoreye umuba w’amadosiye ahubwo ko bisaba kwiyandikisha ku ikoranabuhanga rya IECMS, akuzuza ibisabwa. Ibi byakuyeho amadosiye yashoboraga kuburira mu ntoki z’abo yagombaga kunyuraho bose cyangwa gusiragira ku nkiko kuko hari ibiburamo.

Ikindi kujya gutanga ikirego hari abagendaga bagacumbika ku buryo byabatwaraga nk’iminsi 4 kandi ikibazo ntigihite gikemuka ugasanga byongereye ubukene mu rugo kuko nta mwanya aba yarabonye wo gukorera urugo rwe.

Kayisire Aimable utuye mu Mujyi wa Kigali ashima serivisi ikorerwa kuri terefoni yo kwaka ibyangombwa agira ati: “Serivisi zo kwishyura icyangombwa cy’uruhushya rw’agateganyo rwo gutwara ikinyabiziga isigaye itangirwa kuri terefoni, ariko mbere uwashakaga iyi serivisi yagombaga kujya ku biro bya Polisi, ugasanga biragoye kubera urugendo rurerure.”

Akomeza ashima cyane Leta y’u Rwanda ikomeje gushyira ingufu mu kongera serivisi zitangwa hakoreshejwe ikoranabuhanga ndetse n’uburyo abaturage na bo bigishwa gukoresha izo serivisi kugira ngo bakoreshe neza igihe cyabo.

Ikindi avuga ni ku mpapuro zakoreshwaga buzuza impapuro zitagikoreshwa ku buryo ibidukikije muri iki gite bitangizwa nk’itemwa ry’ibiti bivamo impapuro.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.