21°C , Partly cloudy with thunderstorms | Kigali-Rwanda

Min Nyirarukundo yasabye abafatanyabikorwa kudafasha abantu mu kivunge

Yanditswe na Mugisha Benigne

Ku ya 10-12-2019 saa 14:06:02
Umunyamabana wa Leta Nyirarukundo Ignacienne

Umunyamabanga wa Leta muri Minisiteri y’ubutegetsi bw’igihugu n’imibereho myiza y’abaturage Nyirarukundo Ignacienne  yasabye imiryango ya sosiyete sivili ifatanya na Leta kwirinda gufasha abantu mu kivunge, yongeraho ko bakwiye gufasha abantu kwifasha ariko batabakoreye byose.

Ibi yabivuguye mu muhango wo gufungura inama nyunguranabitelerezo yabaye kuri uyu wa Kabiri, taliki ya 10 ukuboza 2019 yateguwe n’Umujyi wa Kigali yawuhuje n’abafatanyabikorwa mu kiciro cyo gutera inkunga abatishoboye.

Yagize ati “Turasaba abafatanyabikorwa mu iterambere gufasha abantu kwifasha ariko birinda kubakorera byose, ariko nanone ntibakwiye gukora mu kivunge kuko ibyo bakoze bitaramba.”

Nyirarukundo yasabye abafatanyabikorwa gushyira muri gahunda zabo gahunda za Leta zo gufasha abatishoboye kugira ngo ubufatanye bukorwe neza kandi ibikorwa n’umwe ntigikorwe n’undi kuko byaba ari ugukora bimwe.

Avuga ko ibibazo bizahora mu gihe cyose Sosiyete ihari, ariko ashimangira ko ibishobora gukemurwa bikwiye gukemuka kandi abantu bagaharanra ko abaturage bagira imibereho myiza.

Ashimira abakomeje kugira uruhare mu guteza imbere imibereho myiza y’abaturage, asaba Umujyi wa Kigali gukorana neza n’abafatanyabikorwa mu rwego rwo gukemura ibibazo by’abaturage no kubigisha gukomereza aho bagejejwe kugira ngo ubufasha bahawe budasubira inyuma abafashwa bagahora ari bamwe badatera imbere ngo bave mu bukene.

Yasabye impande zombi, Umujyi wa Kigali n’abafatanyabikorwa gusangira amakuru ku bibazo bihari no kugaragariza abafatanyabikorwa ibibazo bihari.

Ati “Muri iyi nama ndifuza ko hagaragazwa intambwe yatewe mu gukemura ibibazo bibangamiye abaturage birimo isuku, indwara, ubukene, kutagira aho baba n’ibindi.”

Umutoni Gatsinzi Nadine, umuyobozi w’Umujyi wa Kigali wungirije ushinzwe ubukungu n’imibereho myiza y’abaturage avuga ko iyi nama igamije gusangira amakuru hagati y’ubuyobozi bw’Umujyi wa Kigali n’abafatanyabikorwa mu iterambere, akaba ari mu rwego gufatanya buteza imbere imibereho myiza y’abaturage.

Avuga ko muri iyi nama hari bureberwemo ibijyanye n’ibibangamiye imibereho myiza y’abaturage nk’abana bata ishuri, abaterwa inda zitateganyijwe, amakimbirane yo mu miryango, ihohoterwa rikorerwa abana n’ibindi.”

Avuga ko mu Mujyi wa Kigali hakigaragara ikibazo cy’ubuzererezi akaba asaba abitabiriye inama gufatira hamwe ingamba zo kubuca no gusubiza mu buzima busanzwe ababuvamo kugira ngo babashe kwiteza imbere bave mu mihanda.

Yasabye abafatanyabikorwa mu iterambere ry’Umujyi wa Kigali gufatanyiriza hamwe na Leta gukemura ibibazo byagaragajwe, birimo ibibangamiye imibereho myiza y’abaturage kandi batahiriza umugozi umwe mu gushyira mu bikorwa ibyo buri ruhande rwiyemeje.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.