17°C , Partly cloudy | Kigali-Rwanda
Minisitiri Ushinzwe Minisiteri y'Ibikorwa by'Ubutabazi, Eng. Kamayirese Germaine aramara impungenge ku ngaruka z'iruka ry'ikirunga cya Nyiragongo

Min Kamayirese yamaze impungenge ku ngaruka zaterwa n’iruka rya Nyiragongo

Yanditswe na Sezibera Anselme

Ku ya 15-04-2019 saa 17:45:18

Minisitiri ushinzwe ibikorwa by’ubutabazi (MINEMA), Eng. Kamayirese Germaine, asanga mu biza bishobora kuba mu myaka iri imbere harimo n’iruka ry’Ikirunga cya Nyiragongo bidakwiye gutera impungenge kuko hari ubufatanye n’amasezerano hagati y’abo icyo kibazo kireba byateguwe kandi hari n’ibikoresho bifasha mu kumenya amakuru y’imiterere y’ibyo birunga.

Eng. Kamayirese avuga ko amakuru agaragazwa n’ubushakashatsi butangwa n’ibigo bikorana n’iyo Minisiteri byaba ibyo mu Rwanda “Lake Kivu Monitoring Program” ndetse no mu bihugu bituranye n’u Rwanda birimo na Repubulika Iharanira Demokarasi ya Kongo mu kigo OVEJE bihanahana amakuru y’uko ibirunga bimeze.

Agira ati: “Nk’uko bigaragara mu Rwanda ibirunga birasa nk’ibyazimye ariko Nyiragongo iramutse irutse haba ibintu birenze ibyo twibwira bikagira n’ingaruka zitari nziza kuri gaze turimo gucukura mu Kivu. Abatekinisiye bacu bahuye n’aba Kongo bagirana ibiganiro ku ngamba z’icyakorwa mu gihe ibyo byaba bibaye, tuzi aho abaturage bacu twaberekeza, uburyo bwo kubatwara turabitegura n’igenamigambi ryose.”

Eng. Kamayirese avuga ko nubwo ibyo byakozwe mu butabazi bahora bari maso kuko utajya hariya ngo wicare ngo ibintu byararangiye. Avuga ko MINEMA ifite imashini zipima imitingito iba kuko aho iri iba ari ikimenyetso kigaragaza ko ibirunga bishobora kuba byanaruka.

Avuga ko ayo makuru yegeranywa kugira ngo abe yanafasha abantu kwitegura kandi ashingirweho. Minisitiri avuga ko Ikigo “Lake Kivu Monitoring Program” cyo muri gaze metane kikanakorera muri Minisiteri y’Ibikorwa Remezo gihora mu bugenzuzi buhoraho kuko bizwi ko u Rwanda atari rwo rwaba isoko y’iturika rya gaze metane mu Kivu hashyizweho komite ihuriweho n’ibihugu byombi kugira ngo icukurwa ku mpande z’ibihugu byombi rikurikize amategeko kugira ngo impanuka yavuka itagera hose.

Minisitiri Kamayirese avuga ko hari n’ubushakashatsi bugamije kureba uburyo abaturage barindwa mu gihe impanuka y’iyo gaze yaba ibaye kandi byose byaganiriweho.

Uretse ikibazo k’iruka ry’ibirunga Eng. Kamayirese yongeye gusobanurira Abadepite urugendo rwa MINEMA mu gukumira no kugabanya inkuba zagiye zitwara ubuzima bw’abantu n’ibyabo.

Avuga ko MINEMA yifuje gukangurira abaturage gushyira imirindankuba ku nzu zabo, ndetse nka Minisiteri ikagira uruhare mu ishyirwaho ry’imirindankuba ku nzu zimwe na zimwe yajya ifasha abaturage mu gihe imvura irimo inkuba iguye bakazugamamo.

Gusa avuga ko icyo kemezo kitabashije gushyirwa mu buryo kubera imiturire y’Abanyarwanda igoranye ahubwo ibyo bishoboka nko mu bigo by’amashuri, amavuriro n’ibindi.

Nk’uko abishimangira MINEMA ngo irimo gukorana n’Ikigo cya IPRC kugira ngo ibakorere imirindankuba ihagije yabasha kwifashishwa mu gushyira ku nzu bikagira uruhare mu kugabanya ibyangizwa n’inkuba.

Abagize komisiyo bagiye bagaragariza MINEMA ko hakenewe kongerwa imbaraga mu gukora ubutabazi, ndetse basaba ko hakongerwa ibikoresho.

Minisitiri Ushinzwe Minisiteri y’Ibikorwa by’Ubutabazi, Eng. Kamayirese Germaine aramara impungenge ku ngaruka z’iruka ry’ikirunga cya Nyiragongo

TANGA IGITEKEREZO

Leave a Reply

Your email address will not be published. Required fields are marked *