17°C , Mostly cloudy | Kigali-Rwanda
Abafatanyabikorwa muri gahunda yo gutubura imbuto basinya amasezerano, Uhereye ibumoso ni Rugema Olivier, Eric Pohloman na Saleem Esmail (Foto James R.)

Miliyari 1,9 zigiye gushorwa mu gutuburira imbuto mu Rwanda

Yanditswe na TWAGIRA WILSON

Ku ya 20-07-2018 saa 08:05:52

Abafatanyabikorwa batatu mu rwego rw’ubuhinzi, ari bo ‘One Acre Fund Tubura, Western seed campany, na Agro processing industries’,  ejo hashize ku wa Kane bashyize umukono ku masezerano ya miliyari 1 na miliyoni 900 z’amafaranga y’u Rwanda agamije gutuburira mu Rwanda imbuto nziza y’ibigori,  akaba ari umushinga ugiye gushorwamo miliyari imwe na miliyoni magana kenda z’amafaranga y’u Rwanda.

Abafatanyabikorwa muri gahunda yo gutubura imbuto basinya amasezerano, Uhereye ibumoso ni Rugema Olivier, Eric Pohloman na Saleem Esmail (Foto James R.)

Iki gikorwa cyo gutubura imbuto kizakorerwa mu Ntara y’Iburasirazuba kuri hegitari 400,   nkuko byasobanuwe n’Umuyobozi w’ikigega One Acre Fund, Elic Pohlman.

Yagize ati “Ni ishoramari rya miliyari 1 na miliyoni 900 z’amafaranga y’u Rwanda agiye gufasha gutuburira imbuto mu gihugu dufatanyije n’abandi bafatanyabikorwa”.

Mu kiganiro n’abanyamakuru nyuma yo gushyira umukono kuri ayo masezerano,  Dr Karangwa Patrick uyobora Ikigo k’Igihugu cy’ubuhinzi n’Ubworozi RAB,  wari uhagarariye Minisitiri w’Ubuhinzi n’Ubworozi, yabwiye itangazamakuru ko u Rwanda rushyigikiye iki gikorwa cyo gutuburira imbuto mu gihugu bikozwe n’abafatanyabikorwa, cyane ko bigiye gutuma u Rwanda rwihaza ku mbuto, aho gukomeza gutumiza hanze zikagera ku bahinzi zitinze.

Ati  “Aba bafatanyabikorwa baje muri gahunda yo gutuburira mu Rwanda imbuto, ni ikintu kiza kuko u Rwanda rwajyaga rutanga miliyari zisaga eshanu  z’amafaranga y’u Rwanda muri gahunda yo gutumiza imbuto y’ibigori, ingano na soya, ariko imbuto y’ibigori akaba ari yo yiganza, ugasanga abahinzi bafite ibibazo by’uko imbuto itabageraho ku gihe, imbuto ishobora kuzanwa mu gihugu tugasanga  ubwoko bwayo ntibuberanye n’ikirere cyacu, cyangwa se ubutaka, ubundi ikaba yaza ifite uburwari runaka,  kuba igiye gutuburirwa hano rero ibyo bibazo byose bivuyeho”.

Umuyobozi Mukuru w’Ikigega One Acre Fund, Pohlman avuga ko imbuto za mbere biteganyijwe ko zizatangira gutuburirwa mu karere ka Nyagatare mu Ntara y’Iburasirazuba muri Nzeri 2018,  avuga  ko hatunganywa toni 600.

Ati  “Ku ikubitiro  ku bufatanye bwacu na Western Seed Company na Agro processing  mu masezerano twemeje ko  muri Nzeri 2018  hazatuburwa toni 600 kuri hegitari 400, nyuma zikiyongera ku buryo zagera kuri toni ibihumbi bibiri, umushinga wose ukazashorwamo miliyari imwe na miliyoni magana kenda z’amafaranga y’u Rwanda.”

 

 

TANGA IGITEKEREZO

Leave a Reply

Your email address will not be published. Required fields are marked *