22°C , Mostly cloudy | Kigali-Rwanda
Umushinjacyaha Mukuru wa MICT Dr Serge Brammertz (iburyo) n'Umushinjacyaha Mukuru wa Repubulika y'u Rwanda Jean Bosco Mutangana (Foto Gisubizo G.)

MICT ntizacika intege mu gushakisha abarimo Kabuga- Dr. Brammertz

Yanditswe na TWAGIRA WILSON

Ku ya 14-02-2018 saa 05:49:17

Umushinjacyaha Mukuru w’Urwego rushinzwe imanza zasizwe n’Urukiko Mpuzamahanga Mpanamabyaha rw’Arusha (MICT) rwari rushinzwe kuburanisha abakekwaho ibyaha bya Jenoside yakorewe Abatutsi mu 1994, Dr Serge Brammertz, atangaza ko uru rwego rutazacika intege mu gushakisha abateye inkunga Jenoside barimo Kabuga Felicien.

Umushinjacyaha Mukuru wa MICT Dr Serge Brammertz (iburyo) n’Umushinjacyaha Mukuru wa Repubulika y’u Rwanda Jean Bosco Mutangana (Foto Gisubizo G.)

Urukiko Mpuzamahanga Mpanabyaha rw’Arusha rwashyiriweho gukurikirana abakoze ibyaha bya Jenoside yakorewe Abatutsi mu 1994, rwafunze imiryaryo yarwo mu gihe rwari rutarashobora guta muri yombi bamwe mu bateye inkunga Jenoside barimo Kabuga Felicien, Protais Mpiranyi, n’abandi.

Ku munsi w’ejo hashize tariki ya 13 Gashyantare 2018, umushinjacyaha mukuru wa MICT (Mechanism For International Criminal Tribunal), Dr Serge Brammertz, ari mu Rwanda yatangaje ko uru rwego ayobora ruzakomeza gushakisha no gufata Abanyarwanda bagize uruhare muri Jenoside yakorewe Abatutsi mu 1994.

Uyu mushinjacyaha akaba ashimangira ko MICT itazacika intege mu gushakisha bamwe mu bateye inkunga Jenoside yakorewe Abatutsi, barimo Kabuga Felicien, Mpiranyi Protais n’abandi.

Umushinjacyaha mukuru wa MICT avuga ko uru rwego rugiye kubashakisha hifashishijwe ikoranabuhanga rigezweho mu gushakisha amakuru no kumenya aho abakekwaho Jenoside baherereye n’ibihugu barimo, kandi ku bufatanye n’abandi bafatanyabikorwa.

Ati “Nubwo hashize imyaka 24, ikizere kiracyahari ko bashobora kuzaboneka bagafatwa igihe kimwe, kuko nk’ubu mbahaye nk’urugero no kuri Jenoside yakorewe Abayahudi hashize imyaka isaga 50, kandi abakoze ibyo byaha baracyakurikiranwa mu nkiko”.

Ku madosiye y’abaregwa urukiko rutarakurikirana, umushinjacyaha mukuru wa MICT Dr Brammertz Serge yagize ati “Nubwo urukiko rwagize intege nke mu gukurikirana no gufata abaregwa ibyaha bya Jenoside nibura hari ibimaze gukorwa, birimo kohereza mu Rwanda abakekwaho ibyaha bya Jenoside bahungiye mu bindi bihugu.”

Umushinjacyaha Mukuru wa Repubulika Mutangana Jean Bosco avuga ku gukomeza gukurikirana abakoze Jenoside yagize ati “Nubwo u Rwanda ruhozaho kohereza ubusabe bwarwo mu kohereza mu Rwanda cyangwa kuburanishiriza mu nkiko zabo abaregwa, hari ibihugu bikigenda biguru ntege ahanini biturutse ku bushake buke bwa politiki, ariko tuzakomeza kwibutsa.”

Dr Brammertz Serge yaje mu Rwanda aho yagiranye ibiganiro n’Umushinjacyaha Mukuru wa Repubulika Mutangana Jean Bosco ndetse n’umuyobozi w’ishami rishinzwe gushakisha abakoze Jenoside bagahungira mu mahanga (GFTU) Siboyintore Jean Bosco.

Dr Brammertz akaba avuga ko yakoreye uruzinduko mu Rwanda mu rwego rw’ubufatanye n’ubutabera bw’u Rwanda mu birebana no gukurikirana no gufata abakekwaho uruhare muri Jenoside yakorewe Abatutsi mu 1994.

 

TANGA IGITEKEREZO

Leave a Reply

Be the First to Comment!

avatar