17°C , Partly cloudy | Kigali-Rwanda

Mico The Best yiyemeje kwagura umuziki we

Yanditswe na Ndamyirokoye François

Ku ya 19-05-2019 saa 15:34:00
Mico The Best na B-Flow n'abo yifashishije mu mashusho y'indirimbo ye

Turatsinze Prosper ukoresha mu buhanzi izina rya Mico The Best yatangarije Imvaho Nshya ko yiyemeje kwagura muzika ye akaba yatangiriye ku gukorana n’umuhanzi wo muri Zambia witwa B-Flow.

Mico indirimbo yasubiranyemo n’uyu muhanzi yitwa Circle mu buryo bw’amajwi akaba yari yayisohoye mu minsi yashize.

Iyi ndirimbo kandi aba bahanzi bayisohoye mu buryo bw’amajwi ndetse n’amashusho.

Amashusho yayo yakozwe na Fayzo naho mu buryo bw’amajwi yakozwe na Iyzo ukorera mu nzu itunganya umuziki yitwa “Country music”.

Mu minsi yashize ubwo mu Rwanda habaga inama yari igamije kurwanya igituntu ni bwo uyu muhanzi wo muri Zambia ngo yari yayijemo Mico The Best babasha kubonana bavugana gukorana iyo ndirimbo babishyira mu bikorwa.

Nyuma yo gukorana iyo ndirimbo, Mico avuga ko ategereje kureba uko muri Zambia bazayakira bakazahita bakurikizaho gutegura igitaramo cyazabahuza bombi kikazabera muri Zambia bakakita “Rwanda –Zambia Night”.

Bishobotse avuga ko muri uyu mwaka ari bwo bazakora icyo gitaramo.

Izindi gahunda afite avuga ko ari ugukorana indirimbo n’abahanzi bo muri Tanzania, Uganda, Burundi n’ahandi mu rwego rwo gukomeza kwagura muzika ye ari na ko muzika nyarwanda izamuka muri rusange.

Mu myaka yatambutse ubwo Diamond Platnmuz yari atari yamenyekana cyane yakoranye indirimbo na Mico The Best yitwa “Sinakwibagiwe”.

B-Flow indirimbo afite harimo iyitwa “Cry of a woman”, “Dear mama”, kandi afite n’izindi nyinshi zitandukanye.

Mico The Best asanzwe afite indirimbo zirimo iyitwa “Jamais”, “Indahiro”, “Uwo muntu”, “Arabyemeye” kandi afite n’izindi.

Muri iyi minsi kandi Mico The Best afitanye amasezerano y’imikoranire na KIKAAC Music.

Uyu muhanzi kandi yagiye yitabira kenshi irushanwa rya Primus Guma Guma Super Star kubera ubuhanga bwe mu njyana y’Afrobeat.

Abahanzi bandi Mico The Best yagiye akorana na bo harimo Urban Boys ubwo yari ikibarizwamo Safi Madiba, Umugati yakoranye na King James, Aramurika yakoranye na Just Familly kandi hari n’abandi bakoranye.

Mico The Best na B-Flow n’abo yifashishije mu mashusho y’indirimbo ye

TANGA IGITEKEREZO

Leave a Reply

Your email address will not be published. Required fields are marked *