19°C , Partly sunny | Kigali-Rwanda

Micho, Minnaert na Abel Xavier mu bashobora gutoza ikipe y’igihugu ya Zambia

Yanditswe na Bugingo Fidèle

Ku ya 14-01-2020 saa 16:20:48
Milutin Sredojevic Micho uri mu batoza 3 bazavamo uhabwa akazi ko gutoza ikipe y'igihugu ya Zambia

Abatoza batatu ari bo Milutin Sredojevic “Micho” ukomoka muri Seribia, Abel Xavier ukomoka muri Portugal na Ivan Jacky Minnaert ukomoka mu Bubiligi  ni bo batoranyijwe mu bagomba kuvamo umwe uzahabwa akazi ko kuba umutoza mukuru w’ikipe y’igihugu ya Zambia.

Tariki 13 Mutarama 2020 mu ishyirahamwe ry’umupira w’amaguru muri Zambia  “FAZ”  batangaje ko mu batoza 13 bakoze ikizamini k’ibazwa “Interview” bahisemo 3 ari bo bazatorwamo uzahabwa akazi mu nama ya FAZ  tariki 18 Mutarama 2020.

Umutoza mushya azaba asimbuye kuri uyu mwanya, Sven Vandenbroeck watoje ikipe y’igihugu ya Zambia kuva muri Nyakanga 2018 kugeza muri Werurwe 2019. Nyuma mu Kuboza 2019 yahise agirwa umutoza w’ikipe ya Simba SC muri Tanzania.

Uyu mutoza mushya agomba guhita atangira gutegura ikipe izakina imikino ya nyuma ya CHAN 2020 izabera muri Cameroun tariki 4 kugeza 25 Mata 2020. Hari kandi gutegura imikino yo mu matsinda yo gushaka itike ya CAN 2021  ikipe ya Zambia iri ku mwanya wa nyuma  mu itsinda H inyuma ya Algegeria, Zimbabwe na Botswana. Iyi kipe ya Zambia yegukanye CAN 2012  iheruka muri iyi mikino muri 2015 kuko muri CAN 2017 na 2019  nta bwo yabashije kubona itike.

Abatoza batatu bazatorwamo uzatoza ikipe ya Zambia

Muri aba batoza hari  Milutin Sredojevic “Micho” watoje ikipe y’igihugu y’u Rwanda “Amavubi”  muri 2011 kugeza 2013 ndetse atoza n’ikipe y’igihugu ya Uganda. Uyu mutoza ufite imyaka 50 y’amavuko yatoje amakipe atandukanye muri Afurika arimo Yanga yo muri Tanzania, Villa SC (Uganda), St George (Ethiopia), Orlando Pirates (Afurika y’Epfo) ndetse n’ikipe ya Zamalek (Misiri) ari nayo yaherukagamo dore ko ubu nta kazi afite nyuma yo kwirukanwa muri iyi kipe mu Kuboza 2020.

Umutoza wa kabiri ni  Abel Xavier ukomoka muri  Portugal akaba afite imyaka 47 y’amavuko. Kuva  muri 2019 nta kazi  afite  nyuma yo gutandukana n’ikipe y’igihugu ya Mozambique yatoje kuva muri 2016. Abel Xavier yakiniye amakipe akomeye i Burayi  arimo Liverpool na Everton mu Bwongereza ndetse na AS Roma mu Butaliyani.

Ivan Jacky Minnaert, umutoza wa 3 uri mu bashobora guhabwa akazi ko gutoza ikipe y’igihugu ya Zambia akomoka mu Bubiligi akaba atari yatoza ikipe y’igihugu na rimwe. Gusa yatoje  amakipe atandukanye muri Afurika arimo Al-Ittihad Tripoli(Libya), Djoliba (Mali), Black Leopards (Afurika y’Epfo), AFC Leopards (Kenya)  na  Rayon Sports (Rwanda).

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.