19°C , Partly cloudy | Kigali-Rwanda

Meteo Rwanda yagaragaje ko imvura igiye kwiyongera

Yanditswe na Twagira Wilson

Ku ya 19-10-2019 saa 08:31:05
Ibiza ntibiteguza ariko hari uburyo bwo kugabanya ubukana bwabyo nko kuzirika ibisenge by'inzu

Ubuyobozi bw’Ikigo k’Igihugu gishinzwe Ubumenyi bw’Ikirere, bwatangaje ko muri iki gihe k’imvura biteganyijwe ko hagati ya tariki ya 17 na 19 Ukwakira 2019 hagwa imvura mu bice byinshi by’igihugu iri hagati ya mirimetero 10 na 40 ku munsi.

Biteganyijwe ko iyi mvura iziyongera ku itariki ya 18 na 19 by’umwihariko mu Ntara y’Amajyepfo no mu Majyepfo y’Intara y’Iburengerazuba. Iyo mvura ikaba iterwa ahanini n’isangano ry’imiyaga ndetse n’ubuhehere bw’umwuka byiganje mu karere u Rwanda ruherereyemo.

Umuyobozi w’Ikigo k’Igihugu cy’Ubumenyi bw’Ikirere Gahigi Aimable, mu itangazo yashyize ahagaragara, avuga ko hateganyijwe kandi umuyaga uringaniye uri hagati ya metero 5 na metero 10 ku isogonda, ariko ukaba wateza ingaruka zitandukanye cyane cyane mu Ntara y’Iburasirazuba.

Muri iryo tangazo yagize ati “Dukurikije ko imvura izagwa mu minsi ikurikiranye, ahenshi mu gihugu hateganyijwe kwiyongera kw’amazi mu migezi bishobora guteza izindi ngaruka. Ni muri urwo rwego Meteo Rwanda isaba abaturarwanda bose kwitwararika muri ibi bihe by’imvura nyinshi ndetse no gukurikiza amabwiriza n’inama bahabwa n’inzego zifite gukumira ibiza mu nshingano zazo”.

Minisiteri ifite mu nshingano ibikorwa by’ubutabazi, MINEMA, iherutse  kwibutsa no gusaba Abanyarwanda uruhare rwabo mu gufasha kwirinda no gukumira ibiza, ibagira inama zitandukanye zirimo nko kwirinda kugama munsi y’ibiti, kuzirika ibisenge, kudacomeka ibyuma bikoresha amashanyarazi imvura irimo kugwa igihe yumvikanamo inkuba n’ibindi.

Iyi Minisiteri yibutsa Abanyarwanda gukomeza no gukurikiza izo nama kuko ibiza ari ikibazo kiza kitateguje, dore ko bimaze gutwara ubuzima bw’abaturage batari bake ndetse n’imitungo yabo.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.