18°C , Partly sunny | Kigali-Rwanda

Meteo: Harakusanywa ibipimo by’imvura mu gihembwe k’ihinga 2018 B

Yanditswe na admin

Ku ya 12-02-2018 saa 13:51:03

Umuyobozi ushinzwe iteganyagihe nuko rishyirwa mu bikorwa mu kigo cy’ubumenyi bw’ikirere (Meteo Rwanda) Twahirwa Antony, aravuga ko  Leta y’u Rwanda yakoze ibishoboka byose igura ibikoresho kabuhariwe bituma Meteo Rwanda ibona amakuru yizewe, kuri ubu ibipimo bafite bitanga ikizere ku muhinzi, ubu bakaba barimo gukusanya ibipimo by’imvura uko bizaba biteye mu gihembwe k’ihinga 2018 B.

Twahirwa Antony, ushinzwe iteganyagihe nuko rishyirwa mu bikorwa mu kigo cy’ubumenyi bw’ikirere (Foto James R)

Mu kiganiro kihariye n’Imvaho Nshya, Twahirwa Antony yavuze ko kuri ubu bareba  ukuntu ibihe by’imvura bizaba biteye, aho barimo gukusanya  ibipimo,  kubinoza, kubinononsora noneho bazavanemo ukuntu imiterere y’imvura izaba iteye mu mezi atatu ari imbere haherewe  muri Werurwe, Mata na Gicurasi.

Twahirwa amara impungenge abahinzi kuri ubu bamaze kwinjira mu gihembwe k’ihinga 2018 B, avuga ko ku bijyanye n’ibipimo bafata kandi bafite babona nta mpungenge zikwiye kubaho ku birebana n’ibihe.

Akaba avuga ko vuba abahinzi bazabagezaho igihe imvura igomba gutangirira n’ingano yayo kugira ngo bitegure kuko gukurikiza amakuru ya Meteo byamaze kugaragaza ko bituma umusaruro babona wikuba inshuro nyinshi.

Muri iki kiganiro, Twahirwa ashima Leta y’Ubumwe bw’Abanyarwanda uburyo yakoze ibishoboka byose kugira ngo Iteganyagihe ry’u Rwanda rihabwe ingufu, igura ibyuma bigezweho kugira ngo hage habonwa izo mpinduka kuko kugeza ubu u Rwanda rufite ubupimiro hirya no hino bwohereza ibipimo buri minota 15 bivuye hirya no hino ku isi.

Yagarutse ku mvura idasanzwe imaze iminsi igwa, kandi ubusanzwe ukwezi kwa Gashyantare kubonekamo izuba ryinshi. Yagize ati “Ku itariki 7 Mutarama twari twavuze ko imvura izaba yatangiye kugabanuka. Si ko byagenze. Kuba itaragabanutse nk’uko twari  twabivuze byatewe ahanini n’inkubi y’umuyaga yari mu nyanja y’u Buhinde yasizemo ubuhehere bw’umwuka bwinshi bituma bumara igihe butararangira.”

Yungamo ati “Na none biterwa no kuba harabaye isangano ry’imiyaga rivuye hirya no hino noneho iryo sangano ry’imiyaga nkuko ryazaga rikazana na none ubuhehere bwinshi mu karere u Rwanda ruherereyemo bituma noneho ikirere cyacu gikomeza kugira imvura, akaba ari nayo mubona ubu ng’ubu igwa ariko ikigaragara ni uko igenda igabanuka bijyanye nuko iminsi igenda ishira ariko na none turasa naho twerekeza mu gihembwe k’imvura y’Itumba izahera mu kwa gatatu.”

 

 

TANGA IGITEKEREZO

Leave a Reply

Be the First to Comment!

avatar