17°C , Mostly cloudy | Kigali-Rwanda

Menya itegeko rigena uburyo bw’ihererekanyamakuru ku myenda (igice cya gatatu)

Yanditswe na Habimana Augustin

Ku ya 10-06-2019 saa 18:32:19

Abantu ku giti cyabo, ibigo, inzego n’amasosiyete bifite ubuzima gatozi bishobora gufata inguzanyo cyangwa umwenda muri banki cyangwa mu bigo by’imari iciriritse. Byagiye bigaragara ko uwafashe umwenda yashoboraga kubikora ahantu hatandukanye, kandi n’aho yafashe umyenda cyangwa inguzanyo mbere yarananiwe kwishyura, kuko nta buryo bwariho bwo guhererakanya amakuru ku mwenda cyangwa inguzanyo zatanzwe hirya no hino mu Gihugu.

Kugira ngo umuntu, ikigo cyangwa sosiyete bibone inguzanyo kandi byasabaga kubanza kuzenguruka mu zindi Banki n’ibigo by’imari, bisaba ikemezo cy’uko bitarimo umwenda, bigatwara igihe n’amafaranga. Ni muri urwo rwego hashyizweho itegeko nº 73/2018 ryo ku wa 31/08/2018 rigena uburyo bw’ihererekanyamakuru ku myenda ryasohotse mu Igazeti ya Leta ya Repubulika y’u Rwanda nº 37 yo ku wa 10/09/2018.

Mu minsi ishize twabagejejeho abatanga amakuru ku myenda, inshingano z’utanga amakuru ku myenda, abategetswe gutanga amakuru ku myenda, ibisabwa mu gukora imirimo yo gutanga amakuru ku myenda, inshingano z’utanga serivisi z’ibiro by’amakuru ku myenda, ibisabwa utanga serivisi z’ibiro by’amakuru ku myenda, impamvu amakuru akusanywa n’umutekano wayo. Muri iyi nomero haribandwa ku mpamvu zo kubona amakuru, uburenganzira bwa nyiri amakuru, ubugenzuzi bw’amakuru, amakosa, ibyaha n’ibihano.

Impamvu zo kubona amakuru

Abakoresha amakuru ku myenda ari mu ikusanyirizo ry’amakuru ku myenda bagera ku makuru kubera impamvu zirimo igenzura rikorerwa mu kigo cyangwa rishingiye kuri raporo mu rwego rwo kuzuza inshingano isanzwe y’ubugenzuzi bw’amabanki n’ibindi bigo by’imari; gusuzuma ko ibyemezo bishyirwaho n’urwego rugenzura binoze cyangwa indi mpamvu yose ifite aho ihuriye n’inshingano za Banki Nkuru.

Utanga serivisi z’ibiro by’amakuru ku myenda aha abakoresha amakuru ku myenda kubera impamvu zirimo gusuzuma ubusabe bw’umwenda cyangwa inguzanyo, hashingiwe ku busabe bwa nyiri amakuru, kongera umwenda cyangwa inguzanyo, guhindura imiterere y’umwenda cyangwa inguzanyo cyangwa kugena amafaranga ntarengwa y’inguzanyo yongerewe; gusuzuma ubusabe bw’ubwishingizi cyangwa ikirego cyabwo; gusuzuma ubusabe bwa serivisi igihe kwishyura biteganyijwe nyuma; gusuzuma cyangwa gukurikirana inguzanyo cyangwa imyenda yatanzwe; gusubiza ubusabe bw’urukiko rubifitiye ububasha hashingiwe ku kemezo cyarwo; gusubiza urwego rwa Leta rubyemerewe hakurikijwe ibiteganywa n’amategeko; gutahura uburiganya no gushyiraho ingamba zo kubukumira; gusubiza ubusabe bwa nyiri amakuru ku makuru ye bwite; gusubiza inzego z’ubugenzuzi cyangwa izishyiraho amabwiriza hakurikijwe ibiteganywa n’amategeko; izindi mpamvu zakwemezwa n’amabwiriza ya Banki Nkuru.

Kugera ku makuru y’ibiro by’amakuru ku myenda cyangwa ikusanyirizo ry’amakuru ku myenda bisaba ingamba ziboneye z’umutekano, zirimo kurinda amakuru ari muri interineti kuvogerwa n’abatabyemerewe, hifashishwa imibare y’ibanga iranga mudasobwa, amagambo banga cyangwa irindi koranabuhanga ryizewe.

Uburenganzira bwa nyiri amakuru

Ingingo ya 36 y’iri tegeko ivuga ko Nyiri amakuru afite uburenganzira bwo kumenya amakuru amureba abitswe n’utanga serivisi z’ibiro by’amakuru ku myenda hakurikijwe amabwiriza ya Banki Nkuru; kubona raporo y’imyenda ye nibura rimwe mu mwaka nta kiguzi. Nyiri amakuru ashobora gusaba raporo z’inyongera zishyurwa hakurikijwe amabwiriza ya Banki Nkuru; guhabwa kopi y’amakuru yerekeye imyenda ari mu bubiko bw’amakuru, arimo amazina y’abakoresheje ayo makuru mu gihe cy’amezi atandatu (6) ashize kuva hatanzwe ubusabe bwo guhabwa amakuru.

Ubugenzuzi bw’amakuru

Iri tegeko riteganya ko Banki Nkuru ifite inshingano zo gushyiraho abagenzuzi igihe bibaye ngombwa cyangwa guha ububasha undi muntu ubifitiye ubushobozi kugira ngo akore igenzura k’utanga serivisi z’ibiro by’amakuru ku myenda, k’utanga amakuru cyangwa k’uyakoresha.

Iyo hakorwa igenzuramikorere, abagenzuzi ba Banki Nkuru cyangwa undi muntu wese washyizweho na Banki Nkuru kugira ngo akorere igenzura utanga serivisi z’ibiro by’amakuru ku myenda, utanga amakuru cyangwa uyakoresha, yinjira aho ari ho hose bakorera kugira ngo akore igenzura.

Utanga serivisi z’ibiro by’amakuru ku myenda, utanga amakuru cyangwa uyakoresha ukorerwa igenzura agomba gutanga amakuru asabwa abitse cyangwa abikiwe ari muri kopi y’umwimerere, muri mudasobwa cyangwa mu nyandiko, cyangwa ari mu bundi buryo hakurikijwe uko akenewe n’uko ayafite. Utanga amakuru ahabwa ikemezo cy’uko amakuru yakiriwe n’abagenzuri ba Banki Nkuru, cyangwa undi muntu ubifitiye ububasha washyizweho hakurikijwe iri tegeko. Amakuru yose abonetse mu gihe cy’ubugenzuzi cyangwa akomotse kuri ubwo bugenzuzi agirwa ibanga kandi ahabwa Banki Nkuru gusa.

Mu gukora ubugenzuzi, Banki Nkuru ifite ububasha bwo kugenzura ibikorwa by’abatanga serivisi z’ihererekanyamakuru ku myenda, abatanga amakuru ku myenda n’abayakoresha; gusuzuma no kwemeza uburyo bw’imikorere y’abatanga serivisi z’ihererekanyamakuru ku myenda ku bijyanye n’ukuri n’ubusugire by’amakuru n’imiterere y’ibiciro igihe ibona bikwiriye; gutegeka gutanga raporo n’andi makuru igihe akenewe kugira ngo hakorwe igenzura rikwiye kandi rinoze; gukora igenzura ry’ibitabo, ibaruramari, inyandiko, ibikorwa n’iry’andi makuru arebana n’utanga serivisi z’ibiro by’amakuru ku myenda, abatanga amakuru, n’abayakoresha igihe bikenewe no gukora igenzuramikorere.

Amakosa, ibyaha n’ibihano

Iri tegeko riteganya amakosa, ibyaha n’ibihano ku banyuranya n’ibyo riteganya. Bimwe muri byo nk’ingingo ya 50 ivuga ko Banki Nkuru ikoresheje amabwiriza itanga ibihano byo mu rwego rw’ubutegetsi ku muntu wese wakoze amakosa yo gutanga serivisi z’ihererekanyamakuru ku myenda cyangwa utanga amakuru ukora ibikorwa birimo guhindura cyangwa gusiba bidakurikije amategeko cyangwa wangiza amakuru ari mu ikusanyirizo ry’amakuru; kutubahiriza ingamba z’umutekano ukenewe mu kurinda amakuru kugira ngo atagerwaho n’abatabyemerewe cyangwa kugira ngo adakoreshwa nabi; kudasuzuma ireme ry’amakuru no kutagenzura dosiye zo kubika mu biro by’amakuru ku myenda; kudakorana neza n’umugenzuzi mu gihe k’igenzura cyangwa utamushyikiriza raporo cyangwa amakuru akenewe n’ibindi.

Naho Umuntu wese ukoresha mu buriganya, agatangaza amakuru ku myenda ari mu bubiko bw’utanga serivisi z’ihererekanyamakuru ku myenda; utanga amakuru azi neza ko atari yo k’utanga serivisi z’ihererekanyamakuru ku myenda; aba akoze icyaha. Iyo abihamijwe n’urukiko, ahanishwa igifungo kitari munsi y’amezi atandatu (6) ariko kitarenze imyaka ibiri (2) n’ihazabu y’amafaranga y’u Rwanda atari munsi ya miriyoni eshatu (3.000.000 FRW) ariko atarenze miriyoni eshanu (5.000.000 FRW) cyangwa kimwe gusa muri ibi bihano

Ingingo ya 53 y’iri tegeko yo iteganya ko iyo icyaha giteganywa n’iri tegeko gikozwe n’isosiyete y’ubucuruzi, umuryango, ikigo, ishyirahamwe cyangwa urugaga rw’amashyirahamwe bifite ubuzima gatozi kandi hakagaragara ibimenyetso by’uko cyakozwe bibyemeye, biturutse ku burangare cyangwa umugambi mubisha by’umuyobozi uwo ari we wese, umucungamutungo, umunyamabanga cyangwa umukozi babyo; uwiyitiriye ububasha; biba bikoze icyaha. Iyo bigihamijwe n’urukiko, bihanishwa kwishyura ihazabu y’amafaranga y’u Rwanda atari munsi ya miriyoni makumyabiri (20,000,0000FRW) ariko atarengeje miriyoni mirongo itanu (50,000,000 FRW) cyangwa iseswa.

TANGA IGITEKEREZO

Leave a Reply

Your email address will not be published. Required fields are marked *