18°C , Intermittent clouds | Kigali-Rwanda

Menya byinshi k’uzwi muri firimi nka Mama Nick

Yanditswe na Ndamyirokoye François

Ku ya 07-07-2019 saa 13:19:00
Uzwi muri firimi nka Mama Nick

Mukakamanzi Beatha uzwi muri firimi by’umwihariko nka Mama Nick yatangaje byinshi abantu baba bibaza ku buzima bwe nk’umuntu urimo kuzamukana umuvuduko mu mwuga wo gukina filimi dore ko n’amakompanyi anyuranye asigaye amwifashisha mu kwamamaza.

Uzwi nka Mama Nick yavuze ko ari umubyeyi ufite abana 6 akaba afite abuzukuru 4.

Avuga ko kandi yavukiye mu karere ka Gatsibo. Kuri we avuga ko kwinjira mu mwuga wo gukina firimi byamutunguye ngo kuko yahuye n’abantu bari batengushywe n’uwo bagombaga kwifashisha gukina muri firimi barabimusaba kubyumva bibanza kumugora ariko aza kubyemera.

Bakibimubwira avuga ko kubyemera yabanje kwanga ariko nyuma yiyemeza kujya kugerageza abona ashoboye gukina neza.

Ati: “Gutangira gukina firimi navuga ko byantunguye kuko nahuye n’abantu batengushywe n’uwagombaga gukina muri firimi yabo bambwira gukinamo mbanza kutabyumva neza ariko nyuma nza gukinamo mbona ndabishoboye”.

Icyamweretse ko yabishoboye avuga ko ari uko abantu bari bamwitabaje ngo akine bakomeje kuzajya bamusaba gukina no mu zindi firimi.

Firimi ya mbere yakinnyemo avuga ko yitwa “Icumu ryica” ikaba yaravugaga ku ndwara umuntu yandura zidakira umuntu akaba yamuha igisubizo neza ntahungabane.

Nubwo icyo gihe yakinnye akabishobora avuga ko mbere yumvaga atabishobora ngo kuko yakundaga kugira isoni.

Ariko ku rundi ruhande ngo mbere hari abajyaga bamwifashisha muri firimi zavugaga kuri Jenoside yakorewe Abatutsi ngo ariko ho ntiyakinaga ahubwo yagaragaragamo gusa.

Akiri inkumi avuga ko yakundaga umuziki no kureba umupira. Ibitaramo by’Impala avuga ko yakundaga kubireba ngo ku buryo yemeraga agaheka umwana undi akamufata akaboko akajya kureba igitaramo.

Firimi amaze gukinamo avuga ko ari nyinshi zirimo iyitwa “Rwasibo”, “Si ryo herezo”, “Umwanzi w’urukundo”, “Umwanzuro”, “Gira amata” kandi anakina no muri firimi y’uruhererekane izwi nka Citymaid.

Muri firimi yitwa “Umwanzuro” n’iyitwa “Citymaid” avuga ko afitanye amasezerano y’imikoranire na ba nyirazo ngo kandi bamuhemba neza bakanamuhembera igihe.

Gukina firimi umuntu abigize umwuga avuga ko amafaranga abonekera mu bikorwa birimo no kwamamaza. Ngo n’ubwo muri uwo mwuga badakorera amafaranga menshi cyane ariko avuga ko nabyo bizagenda biza.

Nkuko yatangiye kujya mu mashusho y’indirimbo z’abahanzi avuga ko mbere yo kwemera kujya mu mashusho y’indirimbo abanza kureba ubutumwa buyikuyemo n’uko yayikinamo.

Urubyiruko akinana narwo avuga ko rufututse ngo kandi mu gihe byakenerwa abaha inama.

Gukina atanga inama avuga ko ari byo akunda ngo naho gukina ahemuka cyangwa avuga nabi byamugora.

Kugira ngo abashe kwagura urwego mu gukina firimi avuga ko arimo gushyira ingufu mu kwiga indimi cyane kugira ngo arusheho kuzimenya.

Avuga ko yatangiye kwiga Icyongereza, ngo Igifaransa cyo azi gike ngo kandi n’Igiswayile yatangiye kukiga.

Ateganya kuzashaka umujyanama kandi kugira ngo bizamufashe gutera imbere mu mwuga we wo gukina firimi.

Mu bana afite avuga ko harimo uwari waratangiye gukina firimi ngo ariko ubu yagiye kwiga hanze.

Uretse kuba akina firimi yavuze ajya akina n’ikinamico ngo kandi yumva afite impano yo gukora imikino yo gusetsa abantu “Comedy”.

Ikinamico zo avuga ko azikinira mu ruhame. Gukora umwuga wo gutera urwenya avuga ko abikoze yakwibanda ku mvugo n’ibikoresho byakoreshwaga hambere mu rwego rwo kugira ngo n’abakiri bato bamenye byinshi byari bigize umuco.

Ku bwe kandi avuga ko abona firimi nyarwanda irimo kugenda itera imbere agereranyije n’ukuntu imaze igihe gito itangiye.

Avuga ko kandi ashimishwa n’uburyo n’abantu basigaye bakunda firimi nyarwanda.

Muzika nyarwanda avuga ko abona irimo gutera imbere ngo kandi umuhanzi wese wakwifuza kumwifashisha mu mashusho y’indirimbo ngo agendeye ku butumwa buri mu ndirimbo ashobora kumwemerera kujyamo.

Gusa avuga ko akunda by’umwihariko muzika y’injyana nyarwanda.

Kugira ngo arusheho kugira ubumenyi abashe gukina neza firimi, avuga ko arebera ku bandi bakinnyi ba firimi nyarwanda ngo kuko atarebera ku bo hanze kubera ko imico y’ibihugu iba itandukanye.

Uretse kuba akina firimi avuga kandi ko ari umukunzi w’ikipe ya Rayon Sport akaba avuga ko yayikunze kuva akiri muto ngo kandi ntayindi kipe ashobora kuyibangikanya nayo.

Kuba icyamamare kandi avuga ko atari byo bituma umuntu ajya mu ngeso mbi ngo ahubwo kuri we abona ingeso mbi n’utari icyamamare ashobora kujya muri izo ngeso.

Utubazo tw’amatsiko kuri we

Uzwi nka Mama Nick avuga ko iyo yambaye neza aba yambaye ikanzu ndende.

Mu biribwa avuga ko akunda igitoki, amadegede n’imboga ngo naho mu binyobwa akunda amata.

Inyamaswa atinya kurusha izindi yavuze ko ari intare n’ingwe ngo naho izo akunda ni izo umuntu yakorora zigatanga umusaruro.

Icyamushimije mu buzima ni ukuba yarashatse 1983 nyuma akabyara ngo naho icyamubabaje cyane ni ukubura ababyeyi.

Umukinnyi wa firimi ku Isi abona ukina neza yavuze ko abona ari Jack Chan.

Abahanzi nka Masamba, Cécile Kayirebwa na Jules Sentore avuga ko ari abahanzi baririmba indirimbo ziri mu njyana nyarwanda akumva zimushimishije.

Uzwi muri firimi nka Mama Nick

Tanga Igitekerezo

Email yanyu ntigaragazwa ku rubuga. Amazina na Email ni ngombwa.