17°C , Partly sunny | Kigali-Rwanda

Menya byimbitse amahoro ku bukode bw’ubutaka n’uburyo atangwa

Yanditswe na admin

Ku ya Nov 23, 2017 saa 10:28

Amahoro ku bukode bw’ubutaka ni amafaranga ashyirwaho n’iteka rya Perezida akagenwa n’Inama njyanama y’Akarere yishyurwa buri mwaka ku butaka bwagenewe guturwaho, ubutaka bukorerwaho ibikorwa bya kariyeri; ubutaka bwagenewe gukorerwaho iby’inganda n’ubukorerwaho ubuhinzi n’ubworozi n’amashyamba burengeje Hegitari 2.

Ubutaka bukorerwaho ubucuruzi butangirwa amahoro

Umuntu wese utunze ubutaka, kandi abufitiye icyemezo gitangwa n’urwego rubifitiye ububasha yishyura amahoro ku mwaka hashingiwe kuri metero kare(m2) cyangwa kuri hegitari y’ubutaka afite, ku butaka bwagenewe guhingwa.

 

Buri myaka ine, urwego rw’ibanze rushinzwe ubutaka rutangaza inyandiko, igaragaza amahoro yishyurwa ku cyemezo cy’ubukode bw’ubutaka yakwa buri mwaka kuri buri mudugudu ugize urwo rwego.

Amahoro yishyurwa ku bukode bw’ubutaka yakwa buri mwaka yemezwa n’Inama Njyanama hashingiwe ku bipimo bikurikira:

  1. Ahafatwa nk’umujyi hishyurirwa amahoro angana n’amafaranga y’u Rwanda kuva kuri 30 (Frw) kugeza kuri 80 (Frw) kuri metero kare (m2).
  2. Ahafatwa nka santeri z’ubucuruzi hishyurirwa amahoro angana n’amafaranga kuva ku 10 (Frw) kugeza kuri mirongo itatu 30 (Frw) kuri metero kare (m2).
  3. Ahafatwa nk’icyaro hakaswe ibibanza hagashyirwa ibikorwa remezo by’ibanze hishyurirwa amahoro angana n’amafaranga kuva kuri atanu (5 Frw) kugera ku icumi y’amanyarwanda (5-10 Frw) kuri metero kare (m2).

Ubutaka bukurikira ntibwishyurirwa amahoro ku cyemezo cy’ubukode:

 

  1. Ubutaka bukorerwaho ibikorwa by’ubuhinzi n’ubworozi iyo bufite ubuso buri munsi ya hegitari ebyiri (2ha);
  2. Ubutaka bugenewe kubakwaho amazu yo guturamo mu cyaro ariko nta bikorwa remezo by’ibanze byahashyizwe;
  3. Ubundi butaka bwemejwe n’Inama Njyanama y’urwego rw’ibanze.

 

Ubutaka bukorerwaho ibikorwa by’ubucuruzi n’inganda mu cyaro nabwo bwishyurirwa amahoro ku cyemezo cy’ubukode bw’ubutaka yakwa buri mwaka angana n’ayishyurwa ahafatwa nk’umujyi.

Amahoro yishyurwa buri mwaka ku cyemezo cy’ubutaka bukorerwaho imirimo y’ubuhinzi n’ubworozi bufite ubuso buri hejuru ya hegitari ebyiri (2) ni amafaranga ibihumbi bine y’amanyarwanda (4.000 Frw) kuri hegitari imwe (1ha).

Ubutaka bugenewe gucukurwaho kariyeri ariko butarahabwa impapuro mpamo bwishyurirwa amahoro ku cyemezo cy’ubukode bw’ubutaka yakwa buri mwaka agenwa n’Inama Njyanama y’urwego rw’ibanze kuva ku mafaranga icumi (10 Frw) kugeza kuri mirongo itatu y’amanyarwanda (30 Frw) kuri metero kare.

Ubutaka bwubatsweho inyubako z’ubucuruzi butanga amahoro

Uburyo  wakoresha telefoni umenyekanisha unishyura ubukode bw’ubutaka

Ntabwo bikiri ngombwa gufata umwanya wawe ngo ujye gutonda umurongo ku biro by’Ikigo cy’Imisoro n’Amahoro cyangwa kuri banki kugirango umenyeshe cyangwa wishyure ubukode bw’ubutaka.

Gutanga amahoro ku butaka bigira uruhare mu kongera imisoro yubaka igihugu

Ufata telefoni ye igendanwa ikoresha umurongo wa MTN agakanda *800#  maze ukemeza kwemeza na ‘Yes’, uhita uhabwa igisubizo kigira kiti “ Welcome to M-Declaration” . Iyo ushaka gukoresha ururimi rw’Ikinyarwanda ukanda kabiri(2) washaka gukoresha Icyongereza ugakanda rimwe(1). Iyo umaze gukanda bakwereka ubwoko bw’imisoro itandukanye. Ku  bukode bw’Ubutaka ukanda kuri gatatu(3)  bakakubwira bati “ Murakaza neza kuri LGT”, bakakubwira ngo wandike UPI yawe urugero 1*02*03*04*1252 nyuma  ukemeza (yes ), Iyo birangiye, wohererezwa ubutumwa buriho nimero y’imenyeshamusoro (reference number) n’amafaranga ugomba kwishyura.

Ushobora  kwishyura ukoresheje banki cyangwa Mobile Money na telefoni ukanda *182# ugakurikiza amabwiriza, cyangwa ugakoresha Mobicash cyangwa Infinity Business Agency Ltd.

Mu gihe wifashishije ikoranabuhanga ujya ku rubuga  www.rra.gov.rw  ahanditse “Ishyura imisoro yeguriwe uturere” cyangwa waba ukoresha Icyongereza ugakanda ahanditse “Pay District Revenues here” ubundi ugakanda kuri “Serivisi” uhita ubona ahanditse “Urupapuro rwo kwishyuriraho amahoro” ugakandaho hanyuma ugakanda ahanditse “Serivisi ku mutungo”. Baguha gutoranya mu bintu bibiri ugakanda ahanditse ngo “ Serivisi ku mutungo”, uhita ubona imbonerahamwe irimo ijambo “Hitamo”ugahitamo ahanditse  “Amahoro ku bukode bw’Ubutaka.”

Nyuma uhabwa imbonerahamwe wuzuzamo UPI yawe ukayuzuza mu mbonerahamwe. Iyo urangije ukanda munsi y’imbonerahamwe uhabwa amakuru yose ugakanda hasi ahantu handitse mu ijambo ry’Icyongereza hagira hati “Submit”(kohereza). Bahita baguha urupapuro ruriho nimero wishyuriraho (Reference Number) n’amafaranga ugomba kwishyura.

Gutanga amahoro ku butaka bigira uruhare mu kongera imisoro yubaka igihugu

Ushobora kandi kumenyekanisha amahoro y’ubutaka ukoresheje telefoni igendanwaukanze  *800#  maze ukemeza maze ugakurikiza amabwiriza.

Igipimo cy’inyungu y’ubukererwe ni rimwe n’ibice bitanu ku ijana (1.5%) ku kwezi cyangwa igice cy’ukwezi amahoro amaze atarishyurwa.

Igihe ni iki rero cyo kwishyura mwirindira umunsi wa nyuma.

Twibwirize gusora.

“Umusoro wanjye, Iterambere ryange, Agaciro kanjye”.