21°C , Intermittent clouds | Kigali-Rwanda

Meddy yatumiwe mu iserukiramuco rya Wasafi rizahuza ibyamamare muri Afurika

Yanditswe na Gisubizo Gentil M.

Ku ya 06-11-2019 saa 13:56:14
Meddy

Umuhanzi Ngabo Médard Jobert ‘Meddy’ umaze kubaka ibigwi mu Rwanda uri no mu bahagaze neza ku isoko mpuzamahanga, yongerewe ku rutonde rw’abazaririmba muri Wasafi Festival itegurwa n’inzu ireberera inyungu z’abahanzi ya Diamond Platnumz wo muri Tanzania.

Aya makuru yasakaye ubwo byatangazwaga kuri konti ya instagram ya Wasafi Tv, mu ijoro ryo ku wa 05 Ugushyingo 2019 banditse bavuga bati “Umuhanzi w’umunyarwanda wakunzwe mu ndirimbo ‘Slowly’ no mu njyana ya RnB, Meddy azaririmba mu gitaramo cya ‘Wasafi Festival 2019’.

Wasafi Festival izaba ku wa 09 Ugushyingo 2019 ku kibuga cya Kijitonyama mu Mujyi wa Dar es Salaam. Ni mu gihe Diamond washyize imbere Bongo Flava, yamaze gutangaza ko 20% y’amafaranga azava muri ibi bitaramo azayatanga mu bikorwa byo kuvuza abana bafite ikibazo cy’umutima babarizwa mu kigo Jakaya Kikwete Cardiac Institution.

Diamond yanateguje ko azakora igitaramo cyo ku rwego rwo hejuru, aho mu kiganiro yagiranye na Wasafi Tv, uyu muhanzi yavuze ko umuhanzi ukomoka muri Nigeria ari we Wizkid ukunzwe n’abatari bake muri Afurika nawe azaririmba muri Wasafi Festival.

Harmonize udacana uwaka na Diamond yari umwe mu bahanzi bagombaga kuririmba muri ibi bitaramo, ariko mu kiganiro n’itangazamakuru, Diamond yavuze ko Harmonize atabonetse muri ibi bitaramo bitewe n’uko ku ya 09 Ugushyingo 2019 azaba afite ahandi azaririmba mu gitaramo.

Ali Kiba nawe yagombaga kuririmba muri iki gitaramo, ariko avuga ko atamenyeshwejwe kandi ko atiteguye.

Bamwe mu bandi bahanzi bazaririmba ni Ruby, Country Boy, Tiwa Savage, Young Killer, Dulla Makabila, DJ Ommy Crazy, Lava Lava, Mboso, Queen Darleen n’abandi.
Ibitaramo bya Wasafi Festival byatangijwe mu mwaka wa 2018 bibera mu Mujyi wa Mombasa, Nairobi n’ahandi.

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.