21°C , Partly cloudy | Kigali-Rwanda
Umushyushyarugamba MC Tino ari kumwe na nyirabukwe w'inshuti ye yitwa Manzi

MC Tino arahakana gushyingiranwa n’umukecuru

Yanditswe na Nshimyumukiza Janvier Popote

Ku ya 02-11-2018 saa 12:27:38

Umuhanzi akaba n’umushyushyarugamba MC Tino yanyomoje amakuru avuga ko yashyingiranwe n’umukecuru.

Kuri uyu wa 2 Ugushyingo 2018, hakwirakwiye ifoto agaragaraho n’umuzungukazi basa n’abasinyira kubana.

Umushyushyarugamba MC Tino ari kumwe na nyirabukwe w’inshuti ye yitwa Manzi

Tino avuga ko iyo foto koko yafatiwe mu murenge mu muhango wo gusezerana, ariko ko atari we wasezeranaga.

Yabwiye Imvaho Nshya ko ifoto yafashwe kuri uyu wa 1 Ugushyingo, mu Murenge wa Rubengera mu Karere ka Karongi.

Ati, “Abantu bahubutse kuko uwo mukecuru turi kumwe ni mama w’umukobwa witwa Julie warongowe n’inshuti yanjye yitwa Manzi, ni ubukwe bwabereye i Karongi ejo.”

Yunzemo ati, “Uwo mukecuru asa n’aho abana n’ubumuga, naramuteruye mugeza aho agomba gusinya, barafotora ariko ntabwo ari njyewe, uwo mukecuru ni mama w’umugore wa Manzi.”

Tino avuga ko iyi foto yayishyize hanze yandikaho ati “Akazi ka gitifu nagashobora cyangwa?”, hashize akanya atungurwa no kubona abantu bayikwirakwiza bavuga ko agiye kubana n’umukecuru.

Avuga ko atari yiteze ko abantu baza guhindura igisobanuro cy’ifoto, mu gihe yari yanasoje ubutumwa bwe avuga ati “Congratulations (ni uko ni uko) Manzi ugire ubukwe bwiza”

Ati, “Abantu ntibajya basoma, iki ni ikibazo kigaragara mu rubyiruko, Leta iracyafite ibibazo byo kwigisha abantu kubanza gusoma bagasesengura mbere y’uko batangaza ibintu.”

Avuga ko yatangajwe no kuba hari n’abanyamakuru batangaje iyo foto bakayita iy’ubukwe bwe batanamubajije.

Ati, “Hari uwanditse ati ‘imyaka ntacyo itwaye icy’ingenzi ni urukundo’, ashaka kuvuga ko kuba narongora umukecuru ntacyo bitwaye, nk’aho byabaye, baba bishakira hit…”

Mu gihe avuga ko atari yiteze ko iyi foto iza gukwirakwira, Tino avuga ko bitanamubabaje kuba yakwirakwiye kuko ku rundi ruhande byatumye avugwa, agasa n’uwibagiza abantu Ibyatsi bya Odda Paccy.

N’igitwenge cyinshi ati, “Ubu Paccy mukujeho, ibintu by’ibyatsi bivuyeho, ibyatsi ndabisibye.”

Hari abari bahise bongera Tino ku rutonde rw’abandi basore bavuzweho gushakana n’abanyamahanga cyangwa abanyarwanda baba mu mahanga, ibyo bita ‘kurongora visa’.

TANGA IGITEKEREZO

Leave a Reply

Your email address will not be published. Required fields are marked *