24°C , Partly cloudy | Kigali-Rwanda
Mu murenge wa Mbuye abaturage bamaze gusobanukirwa akamaro k'umuganda rusange

Mbuye: ibikorwa by’umuganda byabariwe agaciro kangana na  2 500 000

Yanditswe na SEZIBERA ANSELME

Ku ya 02-04-2018 saa 08:50:20

Umunyamabanga Nshingwabikorwa w’Umurenge wa Mbuye mu karere ka Ruhango Byiringiro Jean Paul, arashima ubwitabire abaturage bakomeje kugaragaza mu bikorwa by’umuganda rusange usoza ukwezi kwa Werurwe 2018 kwibanze ahanini ku isuku.

Mu murenge wa Mbuye abaturage bamaze gusobanukirwa akamaro k’umuganda rusange

Yakomeje avuga ko uwo muganda witabiriwe n’abaturage 300 ubarirwa agaciro kangana na miliyoni 2,5.

Nk’uko Byiringiro abisobanura ibikorwa by’umuganda usoza ukwezi kwa Werurwe ku rwego rw’umurenge wibanze mu gukora isuku muri santere y’ubucuruzi  ya Vunga iherereye mu kagali ka Mwendo, Umurenge wa Mbuye mu karere ka Ruhango ariko mu tugari twose tuwugize natwo tukaba twarakozwemo umuganda rusange.

Agira ati: Mu muganda usoza ukwezi kwa Werurwe twibanze ku isuku nk’ikintu k’ibanze gisabwa, dufata umwanya wo kubakangurira kugira isuku ku mubiri no mu ngo zabo, by’umwihariko nkaba naratangije ikintu gishya cy’uko nta muturage ugomba gusohoka iwe ngo afate urugendo afite umwanda”.

Byiringiro atangariza Imvaho Nshya ko abaturage ba Mbuye bamaze kurangwa n’umuco w’ubwitabire haba ku munsi w’umuganda rusange ndetse bakaba banatozwa gukora umuganda w’isuku imbere y’ingo zabo.

Yagize ati: Igihe cyose duhora dushishikariza umuturage gukora isuku imbere yaho atuye, yaba ahinga agaharura imbere y’isambu ye, ikindi n’uko natwe nk’abakozi b’imirenge twigabanya aho tujya mu tugari kandi tukajya tubikora dusimburana kugira ngo bataturambirwa”.

Byiringiro akomeza avuga ko buri wa kabiri mu nteko rusange z’abaturage Umurenge wa Mbuye washyizeho gahunda zo gukora urugendo rwo kwamagana umwanda, ibyo bikazakorwa muri buri kagali aho abaturage bamaze gutegura ibyapa biriho amagambo awamagana.

Yagize ati: Muri urwo rugendo rwamagana umwanda buri kagali kazagena aho gahagurukira naho kari busoreze kuri site y’inama. Turasaba abaturage kwitabira, kurangwa n’isuku bakamenya ko isuku ari ishema ry’umuntu. Turimo kwamagana abantu bafite umwanda aho bagaragara hose haba mu tubari, n’ahandi hose bagenda”.

 

 

 

TANGA IGITEKEREZO

Leave a Reply

Be the First to Comment!

avatar