17°C , Partly cloudy with thunderstorms | Kigali-Rwanda
Mugiraneza Jean Baptiste Migi ugiye kugaruka muri APR FC yavuyemo mu 2015

Mbaye hanze imyaka 3 ibyo ntabonye si ibyanjye-Migi

Yanditswe na BIZIMANA ERIC

Ku ya 09-01-2018 saa 10:21:40

Mugiraneza Jean Baptitse uzwi nka Migi, umukinnyi wa Gor Mahia aravuga ko igihe kigeze kugira ngo agaruke mu ikipe ya APR FC nyuma y’imyaka 3 akina hanze y’u Rwanda.

Mugiraneza w’imyaka 31 y’amavuko yaraye abitangarije Imvaho Nshya mu kiganiro kihariye bagiranye ari i Nairobi muri Kenya aho ari ategereje ko Gor Mahia yumvikana na APR FC kugira ngo agaruke gukina mu Rwanda.

Mugiraneza Jean Baptiste Migi ugiye kugaruka muri APR FC yavuyemo mu 2015

Amakuru yari yakwirakwiye mu itangazamakuru ry’u Rwanda yavugaga ko bitarenze tariki 29 Ukuboza 2017 yari kuba yarangije gusinya muri APR FC ariko kugeza n’ubu ibiganiro hagati y’amakipe yombi ntibiragera ku musozo.

Migi ati “Ndindiriye ibyo bazumvikana gusa bari mu biganiro ku makipe yombi, ntabwo nzi ngo bizagenda gutya. Njye ndi  kumwe n’abakinnyi ba Gor Mahia’’.

Byavuzwe ko Migi yagombaga gusinya amasezerano y’amezi 18 agahabwa umushahara ungana n’amadolari 1400.

Migi watangiye gukina hanze y’u Rwanda mu 2015 ubwo yerekezaga muri Azam FC muri Tanzania nyuma akajya muri Gor Mahia yo muri Kenya mu 2017, nawe yemera ko igihe cyari kigeze ngo agaruke mu rugo. Ati “Bumvikanye nagaruka, njye se hari ikibazo kindi mfite? Njye maze gukina hanze imyaka 3, nabonyemo byinshi, icyo ntabonye si icyanjye, ngarutse mu rugo ntabwo byaba ari bibi. Icyangombwa ni uko ibyo nakuyemo nabifashe neza. Naho ngarutse muri APR FC, ni ikipe nziza, nagiriyemo ibihe byiza nta kibazo rwose’’.

Abana bo muri APR FC barabura umuntu ubayobora mu kibuga

Mu kiganiro n’Imvaho Nshya, Migi yakomeje avuga ko muri APR FC  hakenewe abakinnyi bafite ubunararibonye bashobora kugira inama abakinnyi bakizamuka. Ati “APR FC  ni ikipe nziza. Bariya bana nakurikiranye imikino yabo,  bazi umupira pe ariko ikibazo ntawagira undi inama, kwakundi ikipe iba yatsinzwe ngo havemo umwe ati birashoboka na bitatu twabitsindwa ariko tukabyishyura. Bamenye agaciro k’ikipe, ariko buriya turi kumwe twafatanya, nange nkazana ubunararibonye”.

Iby’ingenzi wamenya kuri Migi

Migi yatangiye umupira mu mwaka wa 2000 ku myaka 13 aho yakiniraga ikipe ya La Jeunesse y’i Nyamirambo.

Migi yavuye muri La Jeunesse mu mwaka wa 2006 akinira SC Kiyovu umwaka umwe ahita yerekeza muri APR FC  muri 2007 aho yavuye mu mwaka wa 2015 yerekeza mu ikipe ya Azam FC muri Tanzania nyuma ava muri iyi kipe ya Azam FC yerekeza muri Gor Mahia umwaka ushize wa 2017 aho yari yahawe amasezerano y’imyaka 2.

TANGA IGITEKEREZO

Leave a Reply

Be the First to Comment!

avatar