28°C , Sunny | Kigali-Rwanda

Masamba yarantoranyije Austin angira uwo ndiwe – Victor Rukotana

Yanditswe na Gisubizo Gentil

Ku ya 12-09-2019 saa 07:44:26
Victor Rukotana umunyempano uri mubahagaze neza muri muzika nyarwanda

Urugendo rwa Victor Rukotana mu muziki, watonijwe adahatanye yageze mu marushanwa, imiririmbire ye inyura Masamba none ubu ari mu bahagaze neza mu muziki nyarwanda.

Victor Rukotana wamenyekanye cyane mu ndirimbo nka ‘Mama Cita’, ‘Promise’, ‘Warumagaye’ n’izindi, yaganiriye n’Imvaho Nshya byinshi ku rugendo rwe muri muzika.

Uyu muhanzi wavukiye mu Ntara y’Uburasirazuba, yatangiye umuziki aririmba mu rusengero, akuza impano ye muri korali aho yasengeraga muri Eglise Vivante i Kibungo.

Victor Rukotana yagize ati: “ Kuririmba nabitangiye nkiri muto aho naririmbaga muri za ‘Sunday School’ nkuriramo kugeza ubwo mbaye umuyobozi wa korali.

Aho nziye i Kigali sinahwemye gukoresha impano yanjye, mu mwaka wa 2015 nagiye mu marushanwa ya Abbey Star Project, yari arimo abagize akanama nkemurampaka barimo Masamba, ankura mu irushanwa ntahatanye ahanini kubera imiririmbire yanjye”.

Victor Rukotana umunyempano uri mubahagaze neza muri muzika nyarwanda

Kuva icyo gihe Rukotana yakoranye na Gakondo Group yari ikuriwe na Masamba, ashimangira ko byamubereye ikiraro cyimuganisha mu nzira nziza zamugejeje kuba yikorera umuzi ku giti cye.

Yakomeje avuga ko yahamagawe na Ally Soudy wahoze ari umunyamakuru mu Rwanda, ubu uherereye muri Leta zunze Ubumwe z’Amerika nyuma y’uko ashyize hanze indirimbo ye ya mbere ‘Inzozi’, amubwira ko yanyuzwe n’imiririmbire ye.

Avuga ko yamubwiye kugira umwete n’umurava mu byo akora, bityo bizamugeza ku nzozi ze, Rukotana yagize ati: “Ally Soudy yarampamagaye birantungura, ambaza icyo yamfasha musaba ko yampuza na Austin umunyamakuru ufite umwihariko wo kuzamura abahanzi mu Rwanda.”

Nyuma yarabinkoreye mpura na Austin tukajya tuganira akajya agenda angira inama z’uburyo nkora ibintu byanjye, yakomeje avuga ko byaje kurangira uyu munyamakuru anamubereye umujyanama (manager) ureberera inyungu ze mu by’umuziki.

Ati: “Urumva yamaze kugaragaza impano za Buravan ndetse na Marina, bihurirana n’uko nta wundi muhanzi yarebereraga wundi, twahise dukorana indirimbo ‘Mama Cita’ yabaye inkomoko y’imenyekana ryanjye”.

Indirimbo ‘Mama Cita’ yakozwe na Producer Junior, nyuma isorezwa muri America na Lick Lick, ngo yamugize uwo yarotaga kuba we izina rye ryandikwa mu ruhando rwa muzika nyarwanda.

Ashima bikomeye umunyamakuru akaba n’umujyanama we ariwe Uncle Austin, kuko yamufashije gushinga imizi mu muziki w’u Rwanda kuva ku ndirimbo ye ya kabiri kugera magingo aya.

Uncle Austin umujyanama wa Rukotana wamufashije gushimangira izina rye muri muzika nyarwanda

Gusa ngo nubwo agerageza gukora indirimbo nziza cyane zibanda ku rukundo, ngo aracyafite imbogamizi aho agana abanyamakuru batandukanye ngo bamufashe kumenyekanisha ibihangano bye, bakamutera utwatsi.

Yagize ati : “Urumva bambwira ko mfite umujyanama w’umunyamakuru uzajya amenyekanisha binyuze kuri radio akoraho, cyane ko usanga yibanda ku gukina indirimbo mu biganiro byayo bitandukanye”

Ngo bimubera imbogamizi ikomeye ariko intego ye ni ugushyira ingufu mu gukora indirimbo nziza kandi zikubiyemo ubutumwa bwubaka imitima y’Abanyarwanda, Imana ibisigaye ikazajya ibikora.

Umuhanzi Victor Rukotana afite indirimbo 7 zirimo izakunzwe cyane, ndetse zinamwubakira izina mu gihugu zirimo ‘Mama Cita’, ‘Promise’ na ‘Warumagaye’ n’izindi ubu akaba afite indirimbo nshya yitwa ‘Love’.

Masamba Intore wabereye Rukotana umubyeyi mu ruhando rwa muzika

TANGA IGITEKEREZO

Leave a Reply

Your email address will not be published. Required fields are marked *