27°C , Partly sunny | Kigali-Rwanda
Intore Masamba ni umwe mu bazitabira iki gitaramo

Masamba mu gitaramo cyo kwizihiza muzika nyarwanda

Yanditswe na Ndamyirokoye François

Ku ya 29-01-2019 saa 07:12:26

Kuwa 1 Werurwe 2019 hazaba igitaramo cyiswe ‘Generation to generation’ cyo kwizihiza iterambere rya muzika nyarwanda.

Umunyamakuru Mbabazi Gerard nk’umwe mu barimo kugitegura, yabwiye Imvaho Nshya ko ahanini iki gitaramo kiri mu rwego rwo gushimira abagize uruhare mu iterambere rya muzika nyarwanda.

Avuga ko bitari byoroshye ko muzika nyarwanda yagera aho iri ubu nyuma y’aho hari abahanzi u Rwanda rwari rumaze kubura kubera ko bishwe muri Jenoside yakorewe Abatutsi mu 1994.

Asobanura ko kubera abo bahanzi bishwe icyo gihe, kugira ngo muzika nyarwanda itere imbere byagoranye kuko abari basigaye nta kizere bari bakagira cyo kubaho cyangwa cyo kongera kuririmba.

Mbabazi ati «Ni igitaramo cyo kwishimira aho muzika nyarwanda igeze ubu dukurikije aho yavuye.»

Uretse Masamba, Mbabazi abandi bahanzi bazaririmba muri icyo gitaramo ari Bruce Melody, Charly na Nina ndetse na Mani Martin.

Nubwo habaye gucika intege kw’abahanzi avuga ko igihe cyaje kugera abahanzi batandukanye batangira kuririmba muzika nyarwanda igenda izamuka buhoro buhoro kugeza ku rwego ubu igezeho.

Abanenga muzika nyarwanda, Mbabazi avuga ko baba birengagije ibibazo muzika nyarwanda yahuye na byo bitandukanye na muzika yo mu bindi bihugu abantu baba bayigereranya nayo.

Icyo kwishimira, avuga ko ari uko muzika nyarwanda ubu mu Rwanda icurangwa cyane bitandukanye no mu myaka yatambutse kuko wasangaga ibitangazamukuru byo mu Rwanda bicuranga muzika yo mu bindi bihugu.

Ku rundi ruhande kandi avuga ko Intore Masamba ari umwe mu bahanzi bafite ubunararibonye muri muzika nyarwanda bagize uruhare mu iterambere rya muzika nyarwanda.

Nta bwo ari ukwizihiza muzika nyarwanda gusa kandi iki gitaramo kigendereye, Mbabazi yavuze ko ari igitaramo cyo kugira ngo abantu banidagadure.

Intore Masamba ni umwe mu bazitabira iki gitaramo

TANGA IGITEKEREZO

Leave a Reply

Your email address will not be published. Required fields are marked *