22°C , Partly cloudy | Kigali-Rwanda

Manda y’Abunzi yarangiye, basabwe guhagarika imirimo

Yanditswe na Imvaho Nshya

Ku ya 01-08-2020 saa 18:09:49

Mu gihe Manda y’imyaka itanu y’Abunzi batowe mu mwaka wa 2015 yarangiye guhera tariki ya 31 Nyakanga 2020,  guhera kuri uyu wa Gatandatu tariki 1 Kanama 2020 Abunzi bose mu Gihugu basabwe kuba bahagaritse imirimo yose y’ubwunzi bari baratorewe.

Minisiteri y’Ubutabera iramenyesha abafite ibibazo biri mu bubasha bw’Abunzi ko bazajya babishyikiriza Abanyamabanga Nshingwabikorwa b’utugari ku rwego rwa mbere n’Abanyamabanga Nshingwabikorwa b’Imirenge ku rwego rw’ubujurire.

Abaturarwanda barasabwa kuzongera gushyikiriza ibirego Abunzi ari uko Komite Nshya zabo zongeye gutorwa.

Komite y’Abunzi, ni urwego rwashyizweho na Leta y’u Rwanda mu rwego rwo kwishakamo ibisubizo bishingiye ku muco n’amateka y’Abanyarwanda, hagamijwe gukemura ibibazo bibangamiye abaturage n’Igihugu muri rusange.

Rushinzwe kunga ababuranyi igihe cyose mbere y’uko bashyikiriza urukiko ruburanisha mu rwego rwa mbere ibirego. Umurimo w’abagize Komite y’Abunzi, ni umurimo w’ubwitange udahemberwa.

Ku rwego rw’Akagari kimwe no ku rw’Umurenge, Komite y’Abunzi iba igizwe n’abantu 12 b’inyangamugayo, bose bagomba kuba batuye mu Kagari no mu Murenge, bitewe n’Urwego barimo, kandi bazwiho ubushobozi bwo kunga.

Batorwa n’Inama Njyanama y’Akagari cyangwa iy’Umurenge, bitewe n’urwego barimo. Mu bantu batari abakozi bo mu nzego z’ibanze cyangwa se z’Ubutabera, batorerwa igihe k’imyaka 5 gishobora kongerwa.

Abagize Komite y’Abunzi, bagomba kuba barimo nibura 30% b’abagore.

Ububasha bwa komite y’abunzi:

a. Ibibazo by’imbonezamubano

Komite y’Abunzi ku rwego rw’Akagari ifite ububasha bwo gusuzuma ibibazo by’imbonezamubano byose byerekeranye n’ibi bikurikira;

-Amasambu n’indi mitungo itimukanwa iyo agaciro kabyo katarengeje miriyoni eshatu (3.000.000) z’amafaranga y’u Rwanda, ikibazo kiba kigomba gukemurirwa mu rwego rw’abunzi.

-Amatungo n’indi mitungo yimukanwa, iyo agaciro kabyo katarengeje miriyoni imwe (1.000.000) y’amafaranga y’u Rwanda.

-Kutubahiriza amasezerano iyo ikiburanwa kitarengeje miriyoni imwe (1.000.000) y’amafaranga y’u Rwanda, ibyo ariko ntibireba amasezerano y’ubutegetsi bwa Leta, ay’ubwishingizi n’ay’ubucuruzi.

-Kutubahiriza amasezerano y’umurimo yakozwe hagati y’abantu ku giti cyabo, iyo afite agaciro kari hasi y’ibihumbi ijana (100.000) by’amafaranga y’u Rwanda;

-Ibibazo by’umuryango, uretse mu gihe igisabwa ari ugufata ikemezo ku irangamimerere ry’abantu.

-Izungura, iyo ikiburanwa kitarengeje miriyoni eshatu (3.000.000) z’amafaranga y’ u Rwanda.

b. Ibibazo nshinjabyaha

Komite y’Abunzi ku rwego rw’Akagari, ifite ububasha bwo gusuzuma ibibazo bishingiye ku byaha bikurikira:

-Gukuraho cyangwa kwimura imbibi z’ubutaka n’ibibanza;

-Konesha cyangwa konona imyaka ku buryo ubwo ari bwo bwose iyo ibyoneshejwe cyangwa ibyonwe bitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Gutukana no gusebanya, uretse igihe bikozwe n’ibitangazamakuru;

-Kwiba imyaka cyangwa ibihingwa bikiri mu murima, mu gihe iyo myaka cyangwa ibihingwa byibwe bitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Ubujura bworoheje iyo ikibwe kitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Guhishira ibintu bikomoka ku bujura bworoheje, iyo ikibwe kitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Ubujura, ubwambuzi cyangwa ububeshyi bugizwe n’umwe mu bashakanye abigiriye mugenzi we, umupfakazi mu byasizwe n’uwo bashakanye wapfuye, umuntu mu by’abo akomokaho, umubyeyi mu by’abamukomokaho cyangwa undi muntu wo mu bashyingiranywe bari ku rwego rumwe;

-Ubuhemu, iyo ikiburanwa kitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Gutora ikintu kimukanwa cy’undi cyangwa kukibona ku buryo bukugwiririye, ukakigumana cyangwa ukagiha utari nyiracyo ku bw’uburiganya, iyo icyo kintu kitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Kwica cyangwa gukomeretsa bikomeye utabigambiriye amatungo cyangwa inyamaswa by’undi, iyo ayo matungo cyangwa inyamaswa byishwe cyangwa byakomerekejwe bitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Gusenya no konona ibintu by’abandi utabigambiriye, iyo ibyo bintu byashenywe cyangwa byononwe bitarengeje agaciro ka miriyoni eshatu (3.000.000 Frw) z’amafaranga y’u Rwanda;

-Guhutaza umuntu ku buryo ubwo ari bwo bwose cyangwa kumutera ku bushake imyanda cyangwa ikindi cyose gishobora kumwanduza, ariko bitamuviriyemo gukomereka cyangwa ububabare ubwo ku mubiri.

Mu byerekeranye n’ibibazo mbonezamubano bivugwa haruguru, Abunzi bitabazwa gusa iyo uregwa n’urega batuye cyangwa babarizwa mu ifasi Komite y’Abunzi ikoreramo.

Nta na rimwe Komite y’Abunzi ishobora kugezwaho ibirego birimo Leta, inzego zayo cyangwa imiryango n’ibigo bifite ubuzima gatozi byaba ibya Leta cyangwa ibitari ibya Leta.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.