Malawi yunamiye abaminisitiri 2 bazize COVID-19

Yanditswe na TUMUKUNDE GEORGINE

Ku ya 13-01-2021 saa 09:35:47

Igihugu cya Malawi kiri mu cyunamo cy’iminsi itatu kubera abaminisitiri babiri batakaje ubuzima kubera icyorezo cya COVID-19.

Minisitiri wari ushinzwe Ubwikorezi Sidik Mia na Lingson Belekanyama wari ushinzwe Ubutegetsi bw’Igihugu bombi batangajwe ko bahitanywe n’icyo cyorezo ejo ku wa 12 Mutarama 2021.

Perezidansi ya Malawi yahise itangaza icyunamo kubera kubura abayobozi bo kuri urwo rwego, kikaba kizasozwa ejo. Perezida w’iki gihugu Lazarus Chakwera yatangaje ko yababajwe cyane n’urupfu rwa bariya bayobozi bari bari muri Guverinoma, kandi ko ari igihombo gikomeye ku gihugu.

Nkuko bigaragara ku bitangazamakuru bitandukanye bikorera muri icyo Gihugu, ijambo Perezida Lazarus Chakwera aherutse kugeza ku baturage ku wa 10 Mutarama, ryagarutse ku kwirara kw’abatuye kiriya gihugu mu kwirinda icyorezo.

Yavuze ko kuba hari abantu barimo gutakaza ubuzima ari ingaruka z’icyorezo kirushaho gufata intera bitewe n’uko hari benshi badohotse ku ngamba zo kwirinda zirimo kwambara agapfukamunwa.

Yagize ati: “Turishyura ku buryo bukomeye ingaruka zo kuba benshi muri twe twaradohotse ku kwambara agapfukamunwa, iyo mvuze benshi muri twe nanjye mba nishyizemo, njyewe na Guverinoma”.

Muri Malawi, icyorezo cya COVID-19 kimaze guhitana abagera kuri 235, n’umubare w’abakomeje kucyandura ukomeje kwiyongera, aho kuri ubu barenga 9027, abakize ni 5 838.

Lingson Belekanyama wari Minisitiri w’Ubutegetsi bw’Igihugu muri Malawi

Sidik Mia wari Minisitiri w’Ubwikorezi muri Malawi

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.