17°C , Partly cloudy | Kigali-Rwanda
Perezida wa Sena y'u Rwanda Makuza Bernard ashyira indabo ku rwibutso rwa Jenoside yakorewe Abatutsi rwa Rebero (Foto Gisubizo)

Makuza: Jenoside ntiyashoboka mu gihe idashyigikiwe n’ubuyobozi

Yanditswe na Mutungirehe Samuel

Ku ya 15-04-2019 saa 08:47:32

Perezida wa Sena, Makuza Bernard, avuga ko nyuma yo guhagarika Jenoside yakorewe Abatutsi mu 1994, Leta y’Ubumwe yashyizeho politiki y’imiyoborere myiza, idaheza n’ikerekezo gishingiye ku masomo yavuye mu buyobozi bubi bwateguye bukanashyira mu bikorwa Jenoside yakorewe Abatutsi mu 1994.

Yabitangaje mu muhango wo gusoza icyumweru k’icyunamo cyo kwibuka ku nshuro ya 25 Jenoside yakorewe Abatutsi, ku rwibutso rwa Jenoside rwa Rebero mu mujyi wa Kigali, ahashyinguwe imibiri isaga ibihumbi 14 y’Abatutsi n’indi y’abanyapolitiki bahoze mu mitwe ya politiki inyuranye bishwe bazize ibitekerezo byabo byo kwanga umugambi wa Jenoside yategurwaga na Leta yari iriho mbere ya Jenoside.

Makuza yavuze ko ari ngombwa kwibuka abo banyapolitiki mu nzira yo kubaka igihugu, hakomeza kwimakazwa imiyoborere myiza kuko imiyoborere mibi yaturutse mu banyapolitiki babi ari yo yabyaye Jenoside yakorewe Abatutsi mu 1994.

Yavuze ko mu mateka ya za Jenoside zose zabaye ku Isi, zitari gushoboka zidashyigikiwe n’ubuyobozi, ahamya ko Jenoside itashoboka mu gihe idashyigikiwe n’ubuyobozi.

Ati “Ni ko byagenze na hano mu Rwanda, kuri Jenoside yakorewe Abatutsi. Uruhare rw’ubuyobozi bubi muri Jenoside yakorewe Abatutsi rufite ibimenyetso bifatika, bidashidikanywaho hirya no hino mu gihugu, kuko umugambi wa Jenoside wacuzwe ukanashyirwa mu bikorwa ndetse byemejwe n’inkiko harimo n’Urukiko mpuzamahanga rwashyiriweho u Rwanda (TPIR).”

Yavuze ko nyuma ya Jenoside yakorewe Abatutsi, Leta yashyize umurongo ku kubanza kugarurira Abanyarwanda ikizere, ishyiraho ikerekezo gishingiye ku miyoborere myiza ishingiye ku masomo yavuye mu mateka y’igihugu ari naAko abanyarwanda bishakamo ibisubizo byihariye igihugu cyari gifite.

Ati “Uyu murongo, washimangiwe n’amategeko harimo n’Itegeko Nshinga Abanyarwanda twitoreye mu 2003 ryavuguruwe mu 2015 rishyirwa mu ngamba za gahunda zitandukanye n’ibikorwa bifatika mu ngeri zose z’ubuzima bw’igihugu.”

Yongeyeho ko Leta yanashyizeho gahunda zitandukanye zo kwita ku mibereho y’Abarokoste Jenoside n’Abanyarwanda muri rusange zigamije iterambere mu kerekezo igihugu cyahisemo.

Umuvugizi w’ihuriro nyunguranabitekerezo ry’imitwe ya politiki yemewe mu Rwanda, Mukabunani Christine, yavuze ko ubusanzwe politiki ari ubuhanga bwo kuyobora no gucunga umuryango w’abantu kugira ngo bagire imibereho myiza n’iterambere.

Akomeza agira ati “Ariko ubutegetsi bwari buriho nta bwo bwubahirije ayo mahame y’imiyoborere myiza; bavanguraga abenegihugu babaciyemo ibice, bakoraga irondakoko n’irondakarere bakimakaza urwango mu benegihugu, bakica abantu babaziza uko Imana yabaremye abandi bakazira ibitekerezo byabo bya politiki. Barenze ku mahame y’uburenganzira bwa muntu n’ayo kwishyira ukizana.

Umunyamabanga Nshingwabikorwa wa Komisiyo y’Igihugu yo kurwanya Jenoside, CNLG, Dr. Bizimana Jean Damascene, yavuye imuzi amateka y’ibimenyetso by’inyandiko z’abanyapolitiki bateguye bakanashyira mu bikorwa Jenoside yakorewe Abatutsi, bari muri Leta yariho, bigaragaza uko Jenoside yateguwe itatewe n’ihanuka ry’indege ya Perezida Habyarimana Juvenal.

TANGA IGITEKEREZO

Leave a Reply

Your email address will not be published. Required fields are marked *