27°C , Partly sunny | Kigali-Rwanda

Mageragere: Ikibazo cya serivisi z’ubuvuzi zabangamiwe n’ibura ry’imodoka cyavugutiwe umuti

Yanditswe na Kayira Etienne

Ku ya 26-03-2020 saa 09:49:34
Aha ni mu gasoko ko mu Mudugudu wa Gahombo mu Kagari ka Mataba, mu Murenge wa Mageragere

Guhagarara kw’imodoka kubera icyorezo cya COVID-19 kwagize uruhare mu kudatangwa kwa serivisi zimwe z’ingenzi mu Kigo Nderabuzima cya Butamwa kiri mu Murenge wa Mageragere mu Karere ka Nyarugenge.

Kuva aho Guverinoma ifatiye ikemezo cyo kugabanya imodoka zatwaraga abagenzi mu Mujyi wa Kigali no mu ntara, ibura ry’imodoka ryatumye hari serivisi zimwe z’ingenzi zidatangwa neza mu minsi ibiri ya mbere mu kigo nderabuzima cya Butamwa.

Kuwa Mbere tariki 23 Werurwe hari abarwayi bagiye kwivuza bamwe bataha badahawe serivisi, mu gitondo cyo kuwa Kabiri Imvaho Nshya yasuye icyo kigo nderabuzima dusanga hari ikibazo cy’abatanga serivisi zo kuvura kuko babuze imodoka ibazana ku kazi.

Mu kiganiro n’Imvaho Nshya, Umuyobozi w’Ikigo Nderabuzima, Nyirabizeyimana Marie Solange, yatangaje ko ikibazo cyo kubura abakozi ngo cyatangiye kuva aho imodoka zisanzwe zitwara abagenzi mu muhanda Nyamirambo-Mageragere zihagarariye.

Ati”Abakozi bacu benshi batuye Gatsata na Kimisagara ho mu Karere ka Nyarugenge. Hari n’uva muri Gasabo, ariko iki kibazo cyo guhagarika imodoka zitwara abagenzi kibereyoho, abo bakozi babura uburyo baza ku kazi bigatuma abarwayi barenga ubushobozi bw’abavuzi bake batuye hafi n’ikigo nderabuzima, bityo abaje kwivuza bagatinda guhabwa serivisi baje gusaba.”

Ubwo Imvaho Nshya yasuraga ikigo nderabuzima cya Butamwa mu masaha ya mbere ya saa ine, yasanze hari abarwayi 16 bategereje kuvurwa, ariko hari n’abari bakiza baturutse kure.

Umwe mu baforomokazi utarashatse ko izina rye ritangazwa yagize ati “Rwose ingamba Leta yafashe zo kurinda Abanyarwanda icyorezo Coronavirus ni nziza, ariko iyo guhagarika imodoka zitwara abagenzi muri rusange harimo n’abajya ku kazi byumwihariko byateje ikibazo muri iki kigo dukoreramo kuko bagenzi bacu batuye kure n’aha dukorera babura uburyo bitabira akazi”.

Uyu muforomo yanibukije ko ikiza cya Koronavirusi ngo cyabongerereye akazi ko kubanza gupima umuriro, abaje kwivuza indwara zisanzwe, kugira ngo basuzume niba badafite ibimenyetso by’icyo kirwara.

Nyirabizeyimana uyobora ikigo nderabuzima cya Butamwa wabonaga yahangayitse cyane kubera abarwayi bari baje kwivuza ari benshi ariko afite abakozi bamwe babuze uko bagera ku kazi kandi adafite igisubizo k’icyo kibazo, yavuganaga n’imodoka ishizwe umutekano ku murenge ngo ijye kumuzanira abo bakozi bityo ikigo kikishyura lisansi.

Kuri iki kibazo cy’abakozi bamwe b’ikigo nderabuzima cya Butamwa babura uko bagera ku kazi, Imvaho Nshya yabajije Umunyamabanga Nshingwabikorwa w’Umurenge wa Mageragere icyo bategenya gukora, Ntirushwa Christophe agira ati”Dukurikije amabwiriza twahawe ko buri kigo cya Leta kigomba gushakira abakozi bacyo uburyo bazajya bagera ku kazi n’uburyo bwo gutaha.”

Yunzemo ati, “Twumvikanye n’Umuyobozi w’Ikigo Nderabuzima cya Butamwa ko azajya atanga ibihumbi bitanu bya lisansi imodoka y’umurenge ikajya ibazana ku kazi ikanabacyura ku mugoroba.”

Iyo gahunda yo kwishakamo igisubizo muri iki gihe imodoka zitwa abagenzi rusange zitari zongera gukora nk’ibisanwe kubera kurwanya Coronavirus, ngo yatumye abaforomokazi n’abaforomo bamwe bagaruka mu kazi ejo kuwa Gatatu tariki 25 Werurwe, nk’uko byemejwe na Madamu Nyirabizeyimana, Umuyobozi w’Ikigo Nderabuzima cya Butamwa.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.