22°C , Mostly sunny | Kigali-Rwanda
Aha ni i Rwesero aho abaturage bo muri Mageragere bashyikirizaga imfashanyo imiryango 5 yatujwe mu murenge wa Kigali

Mageragere: Abaturage bubatse umuco wo kwishakamo ibisubizo

Yanditswe na Kayira Etienne

Ku ya 12-07-2019 saa 15:35:47

Abaturage b’abanyempuhwe bo mu Murenge wa Mageragere wo mu Karere ka Nyarugenge, bishyize hamwe bahuza imbaraga bakusanya imfashanyo bajya gusura imiryango itanu y’abatishoboye batujwe mu Kagari ka Rwesero.

Abo baturage batangarije Imvaho Nshya ko umuco wo kwishakamo ibisubizo bawukomora ku nama nziza bakesha Perezida Paul Kagame udahwema gukangurira Abanyarwanda kwigira no kudategereza ak’imuhana.

Abo baturage biganjemo abo mu tugari twa Nyarufunzo, Runzenze, Ntungamo na Nyarurenzi two mu Murenge wa Mageragere, batangarije Imvaho Nshya ko ngo atari ubwa mbere baremera Abanyarwanda bagenzi babo batishoboye kuko ari umuco mwiza batojwe n’Umukuru w’Igihugu.

Mugenzi Samuel, umwe mu baturage wagize icyo yigomwa mu gikorwa cyo gukusanya imfashanyo yashyirikirijwe iyo miryango 5 yagize ati “Kwishakamo ibisubizo twaje gusanga ari indangagaciro y’umuco mwiza wahoze uranga Abanyarwanda kuva kera, ubwo bari bataranduzwa amacakubiri ashingiye ku moko no ku bindi byari mu nyungu z’abanyapolitiki babi byaje kuroha u Rwanda muri Jenoside yakorewe Abatutsi mu 1994.”

Mugenzi yakomeje agira ati “Icyakora Imana ishimwe ko Intore izirusha intambwe, Nyakubahwa Perezida Paul Kagame yongeye kugarura umuco mwiza wo kubanisha Abanyarwanda, umuco wo gufashanya no kugabirana byari byaracitse mu butegetsi bwa nyuma y’ubukoroni.

Kuva Umukuru w’Igihugu yafata iya mbere akagabira abakene inka bo hirya no hino mu gihugu muri gahunda ya Girinka Munyarwanda, akanadukangurira kwishakamo ibisubizo no kwigira, abayobozi bacu mu midugudu no mu tugari batubwiye ko hari abababaye tugomba gufasha, tubikora twishimye tugatanga ibiri mu bushobozi bwacu twishyize hamwe kugira ngo icyo kibazo gikemuke kuko natwe aho tugeze twiteza imbere tubikesha Guverinoma y’Ubumwe bw’Abanyarwanda yadutoje gukora no kwikemurira ibibazo, tudategereje abazungu nkuko byari bimenyerewe mu butegetsi bwo mu myaka ya mbere ya 1994”.

Mu bandi bagize uruhare rukomeye rwo gutanga imfashanyo y’ibiribwa byahawe imiryango 5 y’Abanyarwanda b’abakene batagiraga aho kuba batujwe mu mudugudu wubatswe n’Ubuyobozi bw’Akarere ka Nyarugenge i Rwesero mu Murenge wa Kigali, harimo n’Idini rya Kiliziya Gatulika Paruwasi ya Butamwa, n’Idini rya Isilamu, ndetse n’Itorero ry’Abadivantiste b’umunsi wa 7 nkuko byemejwe na Maniragaba Jean-Pierre, Umukozi ushizwe imibereho myiza mu murenge wa Mageragere.

Yagize ati “Imiryango 5 twasuye yatujwe mu mudugudu wubatswe n’Akarere ka Nyarugenge mu Kagari ka Rwesero, ni iy’Abanyarwanda bari bakennye cyane babaga muri Mageragere batagira aho baba. Nyuma y’uko batujwe heza byabaye ngombwa ko abaturage bagenzi babo bakusanya ibiro 330 by’ibishyimbo, ibiro 33 by’umuceri, ibiro 20 bya kawunga, ibiro 30 by’ibirayi, ibiro 80 by’ibitoki na ritiro 5 z’amavuta yo guteka, mu rwego rwo kujya kubasura ngo bamenye aho batuye.”

Mu izina ry’Ubuyobozi bw’Umurenge wa Mageragere, Maniragaba Jean-Pierre ufite mu nshingano imibereho myiza y’abaturage, yashimiye abaturage bose bagize umutima w’urukundo bagatanga imfashanyo yashyirikirijwe bagenzi babo batujwe mu mudugudu wa Rwesero.

Ati “Ikigaragara cyo ni uko abaturage bo muri uyu murenge bateye intambwe ikomeye mu kwishimira gushyira mu bikorwa gahunda nziza za Guverinoma. Ni nko kwitabira kuremera Abanyarwanda bagenzi babo batishoboye, kandi ubona babikora badahatwa. Yaboneyeho gushimira Amadini n’Amatorero yo muri Mageragere imikoranire myiza n’ubuyobozi bw’umurenge mu bikorwa bitandukanye, anabasaba gukomereza aho.

Umwe wo mu miryango 5 yashyikirijwe imfashayo y’ibiribwa watujwe i Rwesero wasabye ko izina rye rigirwa ibanga ku mpamvu ze bwite mu kiganiro n’Imvaho Nshya yagize ati “Tubanje gushimira Leta y’u Rwanda yadutuje ikatwubakira inzu tutaragiraga aho kuba. Turashimira cyane abaturage ba Mageragere n’ubuyobozi bwaho bakomeje kutuzirikana, bakaba baje kudusura aho twatujwe bakatuzanira n’imfashano y’ibiribwa. Imana ibaduhere imigisha kuko twe nta cyo dufite twabitura.”

Nkuko abaturage bo muri Mageragere babitangaje hejuru ko atari ubwa mbere baremera Abanyarwanda bagenzi babo, Maniragaba Jean Pierre yemeje ko mu mezi atambutse ngo boroje ihene 40 abaturage bagenzi babo bo mu Murenge wa Kigali.

Aha ni i Rwesero aho abaturage bo muri Mageragere bashyikirizaga imfashanyo imiryango 5 yatujwe mu murenge wa Kigali

TANGA IGITEKEREZO

Leave a Reply

Your email address will not be published. Required fields are marked *