17°C , Partly sunny | Kigali-Rwanda

Mafikizolo yemeje ko izataramira mu Rwanda muri Nzeri 2018

Yanditswe na NDAMYIROKOYE FRANÇOIS

Ku ya 29-08-2018 saa 10:07:05

Theo Kgosinkwe na   Nhlanhla Nciza bagize itsinda rya muzika rya Mafikizolo ryo muri Afurika y’Epfo  akaba ari itsinda rikomeye cyane muri Afurika  ryemeje ko rizitabira igikorwa cyo Kwita izina kizaba ku ya 7 Nzeri 2018.

Abahanzi bagize itsinda rya Mafikizolo

Aba bahanzi bakazaririmba mu birori bya Gala Dinner bizabera mu Karere ka Rubavu nyuma y’igikorwa cyo kwita izina gisanzwe kibera  mu Kinigi mu karere ka Musanze.

Aba bahanzi  bombi babinyujije mu mashusho amara umwanya muto bemeje kuzaza kwabo, basoza baririmba indirimbo yabo ikunzwe muri iki gihe yitwa « Love portion ».

Bagize bati « Muraho Rwanda iyi ni Mafikizolo twishimiye  kuzitabira igikorwa cyo Kwita izina abana b’ingagi cy’uyu mwaka ».

Mafikizolo yavuze ko izaririmba kuri Serena Kivu Beach  mu karere ka Rubavu isaba abantu kuzitabira. Iri tsinda kandi rizwi ku ndirimbo zirimo iyitwa « Ofana nawe », « Khona », « Tchelete », bakoranye na Davido, « Ndihamba nawe » kandi bafite n’izindi nyinshi.

Ku rundi ruhande kandi Aliaume Damala Badara Akon Thiam uzwi nka Akon na we azaza mu Rwanda gusa n’ubwo azaza nta bwo azaba  aje gutarama ahubwo azitabira igikorwa cya Gala Dinner kizaba ku mugoroba w’uko kwita izina abana b’ingagi bizaba bisojwe.

Azava mu Rwanda  atashye ku mugaragaro umushinga we wo gukwirakwiza ingufu z’amashanyarazi “Akon Lighting Africa” yakoreye mu Karere ka Kayonza ahitwa i Ndego bigizwemo uruhare rukomeye n’ikigo Solektra International asanzwe afitemo imigabane.

Umushinga ‘Akon Lighting Africa’, Akon yaje kuwutangiza mu Rwanda tariki 28 Nyakanga 2015 icyo gihe yagiranye ibiganiro n’abayobozi batandukanye bafite aho bahuriye n’uyu mushinga akorera mu bihugu 12 by’Afurika birimo n’u Rwanda.

Uyu mushinga Akon  yawutangiye mu 2014, ugamije gukwirakwiza amashanyarazi aturutse ku mirasire y’izuba mu baturage bo mu bice by’icyaro babasha kugerwaho n’amashanyarazi ahendutse.

Akon na we azaza mu Rwanda

Akon yihaye intego yo kuzageza aya mashanyarazi ku Banyafurika miliyoni 600 bo bihugu bigera kuri 12 muri Afurika birimo Mali, Niger, Senegal, Guinea Conakry, Sierra Leone, Benin, Guinea Equatorial, Gabon, Congo Brazaville, Namibia, Madagascar na Burkina Faso ndetse n’u Rwanda.

Umuntu avuze ku buhanzi bwe azwi ku ndirimbo nyinshi zirimo iyitwa « Right now », « Beautiful», « Lonely », « Sorry, Blame it on me », “Hold my hand” yakoranye na nyakwigendera Michael Jackson kandi afite n’izindi nyinshi.

Umuhanzi Akon yabonye izuba ku ya 16 Mata 1973 akaba akomoka muri Senegal ariko agakorera ubuhanzi bwe muri Leta Zunze Ubumwe z’Amerika.

TANGA IGITEKEREZO

Leave a Reply

Your email address will not be published. Required fields are marked *