Made in Rwanda: Abanyenganda barashima ubwunganizi bwa MINICOM

Yanditswe na TUMUKUNDE GEORGINE

Ku ya 30-12-2020 saa 13:25:09
Hagenimana Shafi uhagarariye kompanyi yitwa Holly Trust Ltd

Abakora ibicuruzwa bitandukanye binyuze muri gahunda y’Ibikorerwa mu Rwanda (Made in Rwanda), barashimira Minisiteri y’Ubucuruzi n’Inganda (MINICOM) ibaba hafi ikabagira inama zo kurushaho kongerera agaciro ibyo bakora ndetse ikabafasha no kubimenyekanisha mu Rwanda ndetse no mu mahanga.

Bamwe mu bitabiriye Imurikagurisha Mpuzamahanga rya 2020 (Expo2020) ribera i Gikondo mu Mujyi wa Kigali, baganiriye n’Imvaho Nshya, bagaragaje ko mu byo bishimira harimo kuba barahawe aho bamurikira ibikorwa byabo ku buntu mu rwego rwo kubafasha kuzamura ibyo bakora.

Uwanyirigira Clementine umukozi wa kompanyi yitwa Carl Group ifite uruganda rutunganya ibijumba bikungahaye kuri vitamini A, bakabikoramo imigati na keke (cakes), yagize ati: “Ubufasha bwa MINICOM turabubona cyane, nk’ubu muri Expo baduhaye aho tumurikira ibikorwa byacu (stand) ku buntu kugira ngo bidufashe kumurikira Abanyarwanda ibyo dukora bamenye ko mu Rwanda hari ibintu byiza”.

Yakomeje avuga ko ubwo bufasha bwatanze umusaruro ugaragara, dore ko banabuhawe mu gihe bataragira ubushobozi buhambaye bwo kwiyishyurira ibibanza byo kumurikiraho-“stand”.

Uwanyirigira Clementine (ibumoso) ukora muri kompanyi yongerera agaciro ibijumba

Ati: “Imigati yacu abantu barayikunze cyane bagiye babitubwira, uwaguze akagaruka akatubwira ngo byandyoheye, urumva ko iyo tutaza hano abo bantu ntibari kumenya ibyo dukora”.

Hagenimana Shafi uhagarariye kompanyi yitwa Holly Trust Ltd yongerera agaciro ibikomoka ku buhinzi birimo avoka, karoti, indimu tangawizi, icyayi y’u Rwanda, ubuki, n’ibindi, na we asanga Ibikorerwa mu Rwanda bikomeje gutera imbere bitewe n’imbaraga Leta y’u Rwanda yashyizemo.

Ati: “Nka MINICOM by’umwihariko ireba aho ugeze ukora, ikareba icyo yagufasha kugira ngo urusheho gutera imbere harimo ku gufasha kubona amasoko”.

Yagarutse no ku mahirwe yo kuba baritabiriye Expo kandi bakayabyaza umusaruro.

Ati: “Nyitabiriye gatatu, kuri iyi nshuro, mvuze ku ruhande rwa kompanyi twabashije guha akazi abakozi bashya 15, twabashije kwinjiza abakiliya bashyashya barenga 600 […], twahuye na ba rwiyemezamirimo bafite icyo baturusha kandi twabigiyeho. Nidukomeza gushyiramo imbaraga uruganda rwacu ruzazamuka rurusheho gutanga akazi ku bandi”.

Hagenimana yagaragaje ko hari n’izindi gahunda bagiye bashyirirwaho zituma bakora ibikunzwe ku isoko bifite ubuziranenge.

Mushimiyimana Chantal, ushinzwe kumenyekanisha ibikorwa bya kompanyi yitwa Ishyo Foods Ltd ikora “confiture”, na we yagarutse ku buryo bunganirwa n’iyi Minisiteri.

Ati: “Hari uburyo bwo kugira ngo tumenyekanishe ibicuruzwa byacu, bigere ku isoko haba hano muri Expo n’ahandi, baduha ubujyanama kugira ngo ibyo dukora bihorane agaciro, ikindi hari imisoro tugenda tugabanyirizwa”.

Mushimiyimana Chantal ushinzwe kumenyekanisha ibikorwa bya Ishyo Foods Ltd ikora confiture

Abanyamahanga bakorera mu Rwanda na bo bitabiriye gahunda ya “Made in Rwanda”, na bo bagaragaje imbamutima zabo.

Umwe muri bo ni Ammar Alhamasi wo muri kompanyi yitwa ALMAHA Group ifite uruganda ruherereye mu Karere ka Bugesera rukora ibikoresho binyuranye birimo ibyuma bikonjesha (Frigo), ibyifashishwa mu guteka (cuisinière /cooker) n’ibindi, asobanura ko ibyo bikoresho ari “Made in Rwanda” 100%; ni ukuvuga atari ibikoresho bazana bagateranyiriza mu Rwanda ahubwo babikora bahereye hasi.

Ati: “Duhera kuri A kugera kuri Z, duhereye ku bikoresho fatizo (raw materials), kugeza havuyemo igikoresho cyuzuye, biba ari ibikoresho byiza bifite ireme”.

Avuga ko ari ubwa mbere bitabiriye imurikagurisha, kandi bishimiye kugaragariza Abanyarwanda ko hari ibyiza bakorera mu Rwanda, ashima MINICOM igenda ibafasha mu buryo butandukanye harimo no kuba barahawe aho bamurikira ibikorwa byabo ku buntu bigatuma abakiliya babibona bakanabikunda kuko byabafashije gushyiraho ibiciro binogeye ababagana.

Nubwo hari intambwe igaragara yetewe, abikorera bifuza ko iyi Minisiteri yakomeza kunoza gahunda ya “Made in Rwanda”, cyane cyane ku birebana n’ibiciro.

Tuyishime Eric ukorera ARMAHA Group, ati: “Badufashe ibintu byose bikorerwa mu Rwanda bijye ku biciro byiza ku buryo buri muturage wese abyibonamo, babibakundishe bumve ko ibikorerwa iwabo ari byiza, babyizere”.

Ikindi bagaragaza nk’imbogamizi ni ibyo gupfunyikamo (packaging) bitaboneka mu Gihugu bakabitumiza hanze bigatuma igiciro k’ibicuruzwa kizamuka.

MINICOM irizeza ko imbogamizi zihari zirimo kuvugutirwa umuti

Muhire Louis Antoine ukuriye Ubunyamabanga bw’Ibikorerwa mu Rwanda (Made in Rwanda) muri MINICOM arizeza abanyenganda ko bakomeje gushakira ibisubizo imbogamizi zigihari.

Ati: “Ku bibazo bavuze byagaragaye muri Made in Rwanda harimo ikibazo k’ibyo bapfunyikamo, MINICOM ibinyujije mu kigo cyayo NIRDA, irareba ibishobora kuzakorerwa mu Rwanda kuko byose ntibyahakorerwa kuko hari ibisaba umuriro mwinshi cyane. Mu mpera z’umwaka utaha tuzaba dufite ishusho igaragara neza y’ibishobora kuhakorerwa, Guverinoma y’u Rwanda igafasha ba rwiyemezamirimo gushoramo imari”.

Muhire Louis Antoine ukuriye Ubunyamabanga bw’ Ibikorerwa mu Rwanda muri MINICOM

Ikindi kibazo bagaragaza kirebana no kubona amafaranga yo gutangiza inganda.

Ati: “Inganda nyinshi zo mu Rwanda zimaze imyaka iri munsi y’icumi, zikeneye amafaranga kandi banki zacu nta bwo zari zatangira gutanga inguzanyo ku buryo bworoshye muri urwo rwego”.

Avuga ko ku bufatanye bw’iyi Minisiteri na Minisiteri y’Imari n’Igenamigambi, Ikigo k’Igihugu gishinzwe Iterambere (RDB) na Banki Nkuru y’ u Rwanda (BNR) barimo kureba uburyo bwo gufasha abanyenganda kugera ku mafaranga y’inguzanyo aciriritse atuma bazamuka batagonzwe n’inyungu ya 19% ku nguzanyo bahabwa.

Muhire agaragaza ko urugendo rwa gahunda ya “Made in Rwanda” rukomeje; hari byinshi bizagerwaho kandi n’ibyagezweho bishimishije kuko ubu hari ibintu byinshi bikorwa kandi bikaba ari ibikorewe mu Rwanda ku 100%.

Ati: “Urebye imyumvire yari iriho muri 2015 n’ubungubu tumaze gutera intambwe ishimishije”.

Ibyagezweho bituruka ku kuba harashyizweho buriya Bunyamabanga bukurikirana umunsi ku wundi gahunda ya Made in Rwanda binyuze mu intego 3 bufite:

  • Gukangurira Abanyarwanda kuyoboka ibikorerwa mu Rwanda ntibakomeze kumva ko ari ibintu bibi cyangwa ari igitenge gusa nta bindi bihari;
  • Gutega amatwi Abanyenganda n’abacuruzi bakamenya imbogamizi bafite ku mategeko ashyirwaho kugira ngo hageho abafasha gutera imbere aho kubasubiza inyuma.

Abakora mu ruganda rwa UFACO rukora imyenda na bo bavuga ko babonye ubwunganizi bwa MINICOM bagahabwa Stand y’ubuntu

Gufasha Abanyenganda kuzamura ubuziranenge mu byo bakora binyuze mu bigo nka RSB (Ikigo cy’Igihugu gitsura Ubuziranenge) na NIRDA (Ikigo k’Igihugu cy’Igihugu cy’Ubushakashatsi n’Iterambere mu byerekeye Inganda) inafasha abafite ubushobozi buke ibagurira imashini bakazajya bazishyura buhoro buhoro.

Muhire Louis Antoine arahamagarira Abanyarwanda kurushaho gukunda ibikorerwa mu Gihugu cyabo kuko bifite uruhare runini mu kwihesha agaciro no kwigira, inganda zigakura zigatanga akazi kandi bikagabanya icyuho kiri hagati y’ibyoherezwa mu mahanga n’ibitumizwayo.

Uwamahoro Nadege uyobora kompanyi Braimpire itunganya ikawa ashima ubwunganizi bahabwa na MINICOM

Mwizerwa Bienvenu Umuyobozi Mukuru wa Greenhillis Tea & Coffee itunganya icyayi n’ikawa yishimira iterambere agezeho kubera Ubuyobozi bwiza bw’Igihugu

Ammar Alhamasi ukorera ALMAHA Group ikora cooker n’ibindi bikoresho

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.