16°C , Partly cloudy | Kigali-Rwanda

Madamu Jeannette Kagame yitabiriye umuhango wo kumurika igitabo kivuga kuri Jenoside

Yanditswe na KAYITARE JEAN PAUL

Ku ya 16-04-2018 saa 07:30:38

Umuhango wo kumurika igitabo  kivuga kuri Jenoside‘Le Mal Rwandais: De la racine au paroxysme du Genocide des Tutsi’ witabiriwe na Madamu Jeannette Kagame uhora ashishikariza urubyiruko kugira umuco wo gusoma ibitabo ndetse n’abanditsi gukomeza kwandika ibitabo byinshi.

Madamu Jeannette Kagame ari kumwe na Minisitiri w’Umuco na Siporo, Uwacu Julienne (ibumoso) n’Umunyamabanga Nshingwabikorwa wa Komisiyo y’Igihugu yo Kurwanya Jenoside, Dr Bizimana Jean Damascène (iburyo)

CP Dr Nyamwasa Daniel, wanditse iki gitabo yamuritse mu mpera z’iki cyumweru yagaragarije urubyiruko amateka y’ukuri kuri Jenoside yakorewe Abatutsi mu 1994 no kurufasha kuyigiraho, bigakorwa hifashishijwe abanditsi b’ibitabo bitandukanye mu gikorwa kiswe Kwibuka24 Café Littéraire.

CP Dr Nyamwasa avuga ko mu myaka ya 1990, Inkotanyi zafashe iya mbere zikaza gushaka amahoro mu Rwanda. Anavuga ko mu myaka 31 yibazaga icyo ari cyo mu bandi kuko aho yageraga, yasangaga atari umwenegihugu agasanga atari n’umunyarwanda, icyo ni cyo cyamubabaje atangira kwibaza icyo bahunze.

Zimwe mu mpamvu zatumye yandika igitabo, yagira ngo amenye inkomoko y’ibyabaye mu Rwanda Isi yose irebera Inkotanyi zitagiraga umubare uhagije w’abasirikare n’ibikoresho akaba ari zo ziyemeza guhagarika Jenoside yakorerwaga Abatutsi.

Ati “Ibintu byabaye mu Rwanda abantu barenga miliyoni bagapfa, ni ibintu utagira uko uvuga, ibyo bintu nasanze bitababarirwa ariko Isi yarabibabariye,  i Rwanda ntibikwiye kuba ariko byarabaye Isi yose irebera, nkibaza kuki ibidakwiye kuba ahandi, byabaye mu Rwanda? Icyo ni ikindi cyatumye nshaka kumenya ibyo bintu ngo mbyandike noneho n’umwana uzavuka azaze amenye ukuri, utari mu Rwanda amenye ukuri”.

Dr Nyamwasa akomeza yibaza impamvu Isi itatabaye Abatutsi bakorerwaga Jenoside yibaza niba byari ubugome cyangwa ubushake buke. Ati “[…]abantu bagapfa, Jenoside ikaba amahanga yose atureba, ese ni abanyabwoba, ni ubugome, ni ubushake bwo kutaza nibaza rero icyatumye bataza, abantu bose ku Isi bikananirana ariko Inkotanyi zidafite umubare uhagije, ibikoresho bihagije zigashobora zonyine guhagarika Jenoside yego birumvikana kuri zo kuko byari ugupfa no gukira ariko zigakiza abantu, ni ibyo bitatu nashatse kumenya”.

Icyo yifuza ngo ni uko Abanyarwanda bamenya ko ari Abanyarwanda kuko nibamara kumenya icyo, u Rwanda ruzagira amahoro. Ashimangira ko Jenoside yakorewe Abatutsi yari yarateguwe.

Ati “Ibintu byari byarateguwe muri manifesito aho bavugaga yuko Abatutsi, biranditse, bazemere tubane ariko babeho nk’abanyamahanga. Ni imbuto mbi batubibyemo abana badakwiye gukurikira, abana bakwiye kumva ko u Rwanda ari umunyarwanda. Nitwemera kuba umuntu umwe tuzabaho neza, nitwemera kubaho uduce uduce natwe tuzaba turiho twiyangiza, abana ndabasaba ko bakomeza kwibumbira hamwe”.

Umuyobozi Mukuru wa Polisi y’u Rwanda, IGP Gasana Emmanuel na we wari witabiriye uyu muhango, yabwiye urubyiruko ibanga ingabo za RPA zakoresheje mu guhagarika Jenoside yakorerwaga Abatutsi no kubohora igihugu.

Ati “Ntibisaba Umugaba w’Ingabo kohereza ingabo ku rugamba gusa ahubwo Umugaba Mukuru ajyana na zo ku rugamba. Ni ryo banga RPA yakoresheje mu guhagarika Jenoside yakorewe Abatutsi n’urugamba rwo kubohora u Rwanda”.

Umunyamabanga Nshingwabikorwa wa CNLG, Dr Bizimana Jean Damascène, yasobanuye ko urubyiruko rwitabwaho kuko ari rwo rukeneye kumenya cyane amateka no kuyigiraho kandi bigatuma na rwo rutinyuka rukandika.

Mu mezi atatu (Mata, Gicurasi, Kamena) hari gahunda yo gukora iki gikorwa gihuza abanditsi n’urubyiruko muri za Kaminuza zose n’amashuri makuru, aho urubyiruko rwo muri Campus 46 ruzaganirizwa, mu gihe muri gahunda nk’iyi yo guhuza urubyiruko n’abanditsi umwaka ushize, yahurije hamwe urubyiruko 169 889.

Umwaka ushize kandi ibigo by’amashuri yisumbuye byahawe ibiganiro ni 185, na kaminuza 38 abanyeshuri bose hamwe 142 537  bakurikiranye ibyo biganiro.

TANGA IGITEKEREZO

Leave a Reply

Your email address will not be published. Required fields are marked *