21°C , Partly sunny | Kigali-Rwanda
Marc Ravalomanana (ibumoso) na Andry Rajoelina, abakandida 2 bahatanira umwanya wa Perezida mu matora yo ku nshuro ya kabiri ateganyijwe ku wa 19 Ukuboza 2018 (Foto AFP)

Madagascar: Barifuza ikinyuranyo mu matora ya Perezida

Yanditswe na Kayira Etienne

Ku ya 06-12-2018 saa 11:24:29

Muri Madagascar, amatora y’Umukuru w’Igihugu yo ku nshuro ya kabiri ateganyijwe ku 19 Ukuboza 2018, hagati y’abakandida Andry Rajoelina wagize amajwi 39,23%, na Marc Ravalomanana watowe ku rugero rwa 35,35% amatora ya mbere yabaye ku itariki 7 Ugushyingo 2018.

Abaturage bo muri iki gihugu batangaza ko muri ayo matora nkemurampaka, ngo bifuza ko hazabamo ikinyuranyo gifatika hagati y’uzatsindira umwanya wa Perezida n’uzatsindwa.

Ibi ngo byazafasha cyane abenegihugu batuye muri iki kirwa cyo mu Nyanja y’u Buhinde kutajya mu mvururu nk’izigeze kuhaba mu myaka yatambutse zikomoka mu kurwanira ubutegetsi kw’abanyapolitiki.

Radio Mpuzamahanga y’u Bufaransa RFI, itangaza ko abaturage ba Madagascar baganiriye, ngo bagaragaje impungenge z’uko havuka imvururu mu gihe uwatsindira kuba Perezida yaba atarushije amajwi menshi uzatsindwa kuko ngo batagira umuco wo kwemera gutsindwa.

Hari uwagize ati, «Hagati ya Andry Rajoelina na Marc Ravalomanana, hari ikinyuranyo kitageze kuri 4% mu matora ya Perezida yo mu kiciro cya mbere yabaye tariki 7 Ugushyingo. Nubwo nta n’umwe muri aba ba kandida wagize amajwi amuhesha insinzi, buri wese yateye hejuru avuga ko yibwe amajwi ».

Ubwitabire bw’Inteko itora ntibwari bushimishije, dore ko bwanganaga na 54%.

Ibitangazamakuru byo muri Madagascar n’ibyo mu mahanga bimenyesha ko impamvu umubare w’abatora uri hasi cyane, ari uko hari umubare munini w’abenegihugu uvuga ko nta n’umwe muri aba bakandida perezida bategerejeho kubagirira umumaro.

Mu kiganiro yagiranye na RFI, Tatiana umugore ubana n’abana be 4 muri karitsiye ya Manarintsoa Atsinanana yiganjemo abakene yo mu murwa mukuru, yagize ati «Ndi mu bantu Marc Ravalomanana na Andry Rajoelina badashobora kugira icyo banyemeza. Nta n’umwe muri bombi ntezeho icyo kurya kuko nzi neza ko nta mpuhwe bagirira Abanyamadagasikari. Nta kizere mbafitiye na gito kuko igihe bayoboye iki gihugu nta cyo bakoze kiduteza imbere, n’abandi bategetsi benshi ntacyo bamaze. Ntawe nzatega amatwi biyamamaza kuko nzi ko ibyo bizeza ababumva ari ikinyoma gisa.»

Marc Ravalomanana (ibumoso) na Andry Rajoelina, abakandida 2 bahatanira umwanya wa Perezida mu matora yo ku nshuro ya kabiri ateganyijwe ku wa 19 Ukuboza 2018 (Foto AFP)

RFI yaganirije n’uwitwa Joseph yasanze agurisha amakara muri iyo karitsiye imwe abazwa ikizere afitiye abiyamamaza agira ati « Nta cyo bariya bakandida bambeshya. Nikenereye umutekano, n’igiciro cy’umuceri gihendutse. Ibindi byose bavuga biyamamaza, nzi neza ko nta na kimwe bazakora ku nyungu z’abaturage».

Icyo aba bakandida barimo gukora ubu mu kwiyamamariza amatora ya Perezida yo ku nshuro ya kabiri, ni ukugerageza kureba uburyo bakwigarurira abatoye Marc Rajaonarimanpianina waje ku mwanya wa gatatu n’amajwi 8,8%, n’andi 13% yagabanye abakandida bandi bagera kuri 30 batsinzwe.

Abo bose ngo baricecekeye kubera gutinya kugaragaza uwo bashyigikiye ngo batazabizira.

Abavuga ko bakeneye ikinyuranyo gifatika muri aya matora ni abavuga ko nta kizere bafitiye abiyamamaza, bose ngo babiterwa no gutinya ko havuka imvururu za politiki muri Madagascar mu gihe haba utishimiye ibizatangazwa bya nyuma.

TANGA IGITEKEREZO

Leave a Reply

Your email address will not be published. Required fields are marked *