22°C , Mostly sunny | Kigali-Rwanda
Twizerimana Frodouard ukoresha izina rya Limu mu buhanzi

Limu yiyemeje gukoresha mu buhanzi akabyiniriro yahawe n’ababyeyi

Yanditswe na NDAMYIROKOYE FRANÇOIS

Ku ya 30-06-2019 saa 08:13:55

Twizerimana Frodouard ukoresha mu buhanzi izina “Limu”  mu kiganiro yagiranye n’Imvaho Nshya yavuze ko izina akoresha mu buhanzi ari akabyiniriro yahawe n’ababyeyi be yinjiye mu buhanzi yiyemeza kurikomeza.

Uyu muhanzi  uvukana na  Tuyisenge bakunzi kwita “Intore” avuga ko  ako kabyiniriro  bakamwise ngo kuko no mu muryango wabo harimo undi witwa “Limu” akaba avuga ko bamubwiye ko bisobanura umunyamugisha.

Yagize ati :“Bambwiye ko ari izina risobanura umunyamugisha ngo kandi no muryango hari hari undi witwaga uko, ubwo rero ntangiye ubuhanzi niyemeje kurikomeza”.

Ku rundi ruhande Limu avuga ko indirimbo ya mbere yayikoze muri  2012 ngo kandi kuva icyo gihe ntiyigeze acika intege yakomeje gukora ibihangano bitandukanye kugeza n’ubu.

Nubwo atigeze acika intege avuga ko abamucaga intege batigeze babura ngo ariko yakomeje kwihangana kuko yari azi icyo ashaka.

Kuba ari umuvandimwe kandi wa Tuyisenge avuga ko hari imbaraga nyinshi byamuteye  ngo kuko hari naho yajyaga ajya kuririmba bakajyana.

Muri iki gihe kandi amaze mu muziki avuga ko yabashije gukora  Alubumu igizwe n’indirimbo 18 arayirangiza none ngo yatangiye no gukora Alubumu ya kabiri.

Indirimbo aheruka gusohora arimo gutegura mashusho yayo avuga ko yitwa “Uragiye”.

Alubumu ya mbere yakoze avuga ko atabashije kuyimurika ngo ariko ateganya ko azahuza Alubumu ya mbere n’indi arimo gukora akazafata umwanya wo gutekereza  igihe yazamurikira nyuma yo kuzafata umwanya uhagije akabitegura.

Indirimbo arimo gukora muri iyi minsi avuga ko uburyo azikoramo bufite ikerekezo cyo kuzimenyekanisha ku rwego mpuzamahanga kuko zizajya zumvikanamo Afurika yose muri rusange.

Mu buhanzi bwe, Limu yagiye atsindira ibihembo bitandukanye birimo  icyo yatsindiye mu 2013  mu irushanwa ryari ryateguwe  n’Ikigo k’Igihugu gishinzwe guteza imbere amakoperative muri  2014 atsindira igihembo mu irushanwa ryari ryateguwe n’umujyi wa Kigali  no mu 2016 atsindira igihembo nk’icyo  nabwo mu irushanwa ryari ryateguwe n’Umujyi wa Kigali  na Polisi y’Igihugu.

Ikerekezo ke avuga ko ari ukuba umuhanzi ukomeye ngo kandi agomba kubikorera akabigeraho afatanyije n’abakunda umuziki we.

Umuhanzi Limu avuga ko afite inzozi zo kuzaba umuhanzi ukomeye Afurika yose ikamumenya.

Mu mishinga kandi afite yavuze ko harimo kuzakorana indirimbo n’abandi bahanzi.

Abahanzi nka The Ben ndetse na Bruce Melody avuga ko ari bo akunda cyane uburyo baririmba, ariko ngo ntiyahita abasaba gukorana indirimo kuko agikeneye kubanza kuzamura urwego.

Twizerimana Frodouard ukoresha izina rya Limu mu buhanzi

TANGA IGITEKEREZO

Leave a Reply

Your email address will not be published. Required fields are marked *