22°C , Partly sunny | Kigali-Rwanda

Leta y’u Rwanda yemeye kwihutisha gusinya amasezerano y’i Marrakesh

Yanditswe na Gisubizo Gentil M.

Ku ya 31-07-2020 saa 08:26:57
Umuyobozi Nshingwabikorwa w’Umuryango w’Ubumwe Nyarwanda bw’Abatabona (RUB) Madamu Kanimba Donatilla

Leta y’u Rwanda yemeye kwihutisha gahunda yo gushyira umukono ku masezerano mpuzamahanga y’i Marrakesh (Marrakesh Treaty), agamije koroshya itegeko ririnda ibihangano mu by’ubwenge kugira ngo n’abafite ubumuga bwo kutabona babashe kubona/gusoma ibihangano mu buryo buboroheye bitewe n’ubumuga bafite.

Ayo masezerano yabereye i Marocco mu 2013, asaba ko hashyirwaho ibigo bizwi bizajya bihindura ibitabo bigezweho mu nyandiko ya Braille ariko ntibitere ikibazo, nko guhindura ibitabo by’imfashanyigisho n’ibindi.

Mu biganiro byahuje Umuryango w’Ubumwe Nyarwanda bw’Abatabona (Rwanda Union of Blind/RUB) n’intumwa za Leta ku wa Kane tariki ya 30 Nyakanga 2020, hagarutswe ku nyungu z’ayo masezerano mu kubahiriza uburenganzira bw’abafite ubumuga bwo kutabona.

Iyi nama yahuje abahagarariye RUB, abahagarariye Urwego rw’Igihugu rushinzwe Iterambere (RDB), Minisiteri y’Ubucuruzi n’Inganda (MINICOM), Minisiteri y’Ubutabera (MINIJUST) na Minisiteri y’Ububanyi n’Amahanga (Minafet).

Umuyobozi Nshingwabikorwa w’Umuryango w’Ubumwe Nyarwanda bw’Abatabona (RUB) Madamu Kanimba Donatilla, yasabye ko hakwihutishwa amasezerano y’ i Marrakesh mu rwego rwo kurengera uburenganzira bw’abafite ubumuga bwo kutabona.

Abanyeshuri bafite ubumuga bwo kutabona bakeneye ibikoresho bigezweho bibafasha mu myigire

Mu kiganiro yagiranye n’Imvaho Nshya, Kanimba yagize ati “Twaganiriye ku masezerano mpuzamahanga yasinyiwe i Marrakesh muri Morroco, arengera ibihangano mu by’ubwenge byabafite ubumuga bwo kutabona mu rwego rwo kubirinda ababyigana, twasabaga ko Leta yakwihutisha ishyirwa mu bikorwa by’aya masezerano kugira ngo uburenganzira bw’abatabona bwubahirizwe.”

Ikindi kandi haba abana cyangwa abantu bakuru bafite ubumuga bwo kutabona, bafite uburenganzira bwo kwiga no kurengera uburenganzira ku mutungo mu by’ubwenge.

Dr. Donatile yakomeje agira ati “Kuba Igihugu cyarasinye amasezerano mpuzamahanga y’abafite ubumuga, avuga ko n’abafite ubumuga bwo kutabona bagomba kugira uburenganzira bwo kwiga, ni byiza kandi turabishima ariko nta mfashanyigisho zihagije zifasha abafite ubwo bumuga.”

Michel Minega SEBERA, Umunyamabanga uhoraho muri Minisiteri y’Ubucuruzi n’Inganda ifite inshingano zo kurengera iby’umutungo mu by’ubwenge, yasezeranyije abitabiriye iyi nama ko mu gihe cya vuba ubusabe bagejejweho buzaba bwashyizwe mu bikorwa.

Ati: “Mu gihe cy’amezi 3, u Rwanda rufite ikizere ko ruzaba rwamaze kuba kimwe mu bihugu binyamuryango by’ayamasezerano y’i Marrakesh.”

Yongeyeho ko mu gihe aya masezerano azaba ashyizwe mu bikorwa, Abanyarwanda bafite umubuga bwo kutabona bazaboneraho amahirwe yo kwigaragaza mu ruhando mpuzamahanga, berekana impano bafite zitandukanye.

Yakomeje abizeza ko hagiye kurushaho kuzamura imikoranire y’inzego za Leta ndetse n’inzego zishinzwe gukurikirana abafite ubumuga bwo kutabona mu rwego rwo guharanira kuzamura imibereho yabo.

Umwanditsi:

Gisubizo Gentil M.

One Comment on “Leta y’u Rwanda yemeye kwihutisha gusinya amasezerano y’i Marrakesh”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.