21°C , Partly cloudy | Kigali-Rwanda
Umunyamabanga wa Leta muri Minisiteri y'Uburezi ushizwe amashuri y'inshuke, abanza n'ayisumbuye, Dr Munyakazi Isaac

MINEDUC yasabye amatorero kubaka amashuri y’inshuke angana n’insengero

Yanditswe na Mugisha Benigne

Ku ya 09-11-2018 saa 06:59:24

Umunyamabanga wa Leta muri Minisiteri y’Uburezi (MINEDUC), Dr Munyakazi Isaac, yasabye abanyamadini kubaka amashuri y’inshuke menshi angana n’insengero bubaka.

Dr Munyakazi yavuze ko abana 20.6% ari bo biga mu mashuri y’inshuke, mu gihe abana bagera kuri 75% bageze igihe cyo kwiga amashuri y’inshuke ntibajyayo.

Ababyeyi banenzwe kudashyira imbaraga mu kohereza abana mu mashuri y’inshuke kuko hari abumva ko nta cyo bimaze cyangwa se ari uguta umwanya.

Ku rundi ruhande Dr Munyakazi yasabye abanyamadini guteza imbere amashuri y’inshuke, akangana byibuze n’insengero bafite, dore ko mu tugari twose tw’igihugu uzihasanga.

Yasabye kandi abanyamadini kwigisha abayoboke bagizwe ahanini n’ababyeyi ku kamaro k’ishuri mu rwego rwo kubafasha guhindura imyumvire, bakumva ko kwiga ari ingenzi.

Yabivyugiye mu nama yahuje MINEDUC n’abafatanyabikorwa ku uburezi bw’inshuke mu rwego rwo kurebera hamwe uburyo bwatera imbere ndetse amashuri akegerezwa abana.

Yagize ati: “Uburezi bw’abana b’inshuke bufasha gutegurira umwana uburezi bw’ejo hazaza, akaba agomba kubifashwamo n’ababyeyi n’abarezi, bufasha abana gutera imbere mu bumenyi.”

Nchimatata Oreste, umupadiri wa Kiliziya Gatolika uyobora Ishuri rya Les Hirondelles riri i Rebero, yavuze ko nka Kiliziya uburezi babushyize ku mutima, kandi babushyiramo imbaraga uko bashoboye, dore ko bafite amashuri menshi mu gihugu.

Pasdiri Nchimatata yakanguriye andi matorero gukomeza gushyira imbaraga mu burezi, cyane cyane bw’abana b’inshuke, kuko umwana iyo arezwe neza akiri muto bimufungura mu mutwe.

Nshuti Bosco, umuyobozi w’ishuri ry’Itorero Anglican rya ‘Nyamata Bright School’ avuga ko Anglican yakoze byinshi mu gushyiraho iri torero, birimo no gukora ku mature.

Iri shuri avuga ko ryatangiye ari rifite abana b’inshuke 14 gusa, kuri ubu rikaba rifite ikiciro k’inshuke n’icy’amashuri abanza, kubera amaturo yakusanywaga mu itorero akaza kurifasha.

Yasobanuye ko ryatangiye rifite abana 9 mu mwaka wa mbere w’amashuri y’inshuke na 5 mu mwaka wa kabiri, ngo ibintu ntibyari byoroshye.

Ati “Twakoze urugendo rurerure kugira ngo ishuri rigere aho riri ubu, twabifashijwemo n’ababyeyi n’umushumba w’Itorero Anglican ari na ryo nyir’ishuri, ariko mu myaka mike ishuri ryari rigeze ahashimishije, n’ubu iterambere ryaryo rirakomeje.”

Abanyamadini biyemeje gushyira imbaraga mu burezi bw’abana b’inshuke batangiye, Leta ibemerera kubaha ibikoresho bikenewe ndetse ikanashyiramo abarezi, dore ko hari benshi bize iby’uburezi bw’inshuke batari mu kazi.

Dr. Munyakazi avuga ko kutitabira amashuri kw’abana bato bituruka ku kuba amashuri y’inshuke ari make akaba ari kure abana b’inshuke ntibabashe gukora ingendo ziyaganamo.

Umunyamabanga wa Leta muri Minisiteri y’Uburezi ushizwe amashuri y’inshuke, abanza n’ayisumbuye, Dr Munyakazi Isaac

Umuyobozi w’Ishami ry’Umuryango w’Abibumbye mu Rwanda ryita ku bana, UNICEF, Ted Maly, yagarutse ku kamaro ko kujyana abana mu mashuri y’inshuke, avuga ko bahakura ubumenyi bubafasha kwiga neza amashuri abanza, bagatsinda neza.

Avuga kandi ko kwiga amashuri y’inshuke bifasha umwana kugira imikurire myiza kandi yihuse y’ubwonko, kwishimana na bagenzi be, gukina no kwisanzura mu byo akora kandi akishimira kubana n’abandi.

Umunyamabanga uhoraho muri Minisiteri y’Uburezi, Mulindwa Samuel, yatanze ingero z’ibyagezweho mu burezi bw’inshuke n’icyuho kikibugaragaramo.

Yashimiye abanyamadini ko bagerageza kwifashisha insengero mu kwigisha inshuke, avuga ko hari byinshi Minisiteri y’Uburezi yateganyije mu gufasha kugera ku burezi bw’inshuke bwuzuye.

Ati “Abarimu bamaze guhugururwa uburezi bw’inshuke ni 1600, abayobozi b’uburezi mu mirenge no mu turere na bo barahuguwe, nyuma y’ubukangurambaga ni ngombwa gushyira mu bikorwa.”

Yavuze ko ibikenewe byose mu mashuri y’inshuke Minisiteri y’Uburezi yamaze kubishyira ahagaragara, dore ko ibikoresho byo mu mashuri y’inshuke bisaga 4.000 bimaze kuboneka.

Mulindwa kandi avuga ko mu mwaka wa 2017, amashuri y’inshuke yari 5.207 intego ihari akaba ari uko mu mwaka wa 2.019 ibyumba bigomba kuba ari 6 039 n’abarimu 773.

Umunyamabanga Uhoraho muri Minisiteri y’Uburezi akomeza avuga ko amashuri y’inshuke yagiye yiyongera bitari cyane mu myaka 10 ishize, kuko mu mwaka wa 2008 abaganaga amashuri y’inshuke bari ku kigero cya 8% kuri ubu bari ku kigero cya 20.6%.

Bamwe mu bitabiriye iyi nama

TANGA IGITEKEREZO

Leave a Reply

Your email address will not be published. Required fields are marked *