Leta yahombye asaga miriyari 136 mu masezerano yadindiye 

Yanditswe na Twagira Wilson

Ku ya 30-04-2019 saa 08:09:01
Biraro Obadian, Umugenzuzi mukuru w'imari ya Leta

Umugenzuzi Mukuru w’imari ya Leta Obadiah Biraro avuga ko mu mwaka w’ingengo y’imari ushize, Leta yahombye amafaranga asaga miriyari 136 na miriyoni 171.

Icyo gihombo cyabazwe mu gaciro k’ibikorwa birebana n’amasezerano yadindiye ba rwiyemezamirimo baba baragiranye n’inzego za Leta harimo n’uturere.

Biraro yabivugiye mu Nteko Ishinga Amategeko kuwa  29 Mata 2019, ubwo yagezaga ku mitwe yombi y’Inteko Ishinga Amategeko raporo y’ubugenzuzi bukuru bw’imari ya Leta  y’umwaka w’ingengo y’imari ushize 2017/2018,  aho yagaragaje zimwe mu nzego zacunze nabi umutungo wa leta. Icyakora, agereranyije n’imyaka yashize, asanga hari intambwe irimo guterwa mu micungire y’imari ya Leta.

Biraro yagarutse ku bigo n’inzego byagarayemo  ibibazo mu mishinga ya Leta yadindiye cyangwa yatinze kurangira, yatanze ingero z’Umujyi wa Kigali, Akarere ka Bugesera, Gasabo, by’umwihariko Akarere ka Bugesera gafite miriyari zisaga 2  nk’agaciro k’imishinga yadindiye.

Ati “Miriyari 136 ni izo ku masezerano yadindiye, cyangwa ayakererewe kurangira, by’umwihariko harimo Akarere ka Bugesera gafite miriyari zisaga 2. Ibikorwa bidindira ni iby’inyubako ba rwiyemezamirimo bagirana amasezerano n’Uturere.”

Avuga ko uyu mwaka igenzura ryagaragaje ko hari amafaranga yakoreshejwe nta nyandiko zisobanura ibyo yakoze, inyandiko zidahagije, amafaranga yasesaguwe, ayasohotse nta burenganzira, ayasohotse mu buriganya yose hamwe ni 5.681.814.498.

Biraro ati “Muri rusange ibyavuye mu bushakashatsi mu nzego n’ibigo bya Leta bikora imirimo y’ubucuruzi n’ibindi bigo byerekana ko hakiri byinshi byo gukosorwa, kandi ni bo bashyira mu bikorwa gahunda z’ingenzi z’igihugu. Rero hakenewe ko ibyo bigo bihuza imbaraga, by’umwihariko ibigo bya Leta.”

Mu mwaka w’ingengo y’imari wa 2016/2017 hagenzuwe inzego 173, zingana na 86.6% by’ingengo y’imari y’igihugu, naho umwaka ushize  w’ingengo y’imari hagenzuwe 86.4 % by’ingengo y’imari y’igihugu.

Muri rusange Umugenzuzi Mukuru w’Imari ya Leta Biraro avuga ko imbaraga zashyizwe mu bigo bigira uruhare runini mu buzima bw’Abanyarwanda nka RSSB, REG, EDCL, EUCL na WASAC, n’ibindi bigo 9, Uturere 30 n’Umujyi wa Kigali, imishinga 74, hamwe n’ibitaro by’uturere 26.

Biraro Obadian, Umugenzuzi mukuru w’imari ya Leta

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.