22°C , Mostly cloudy | Kigali-Rwanda
Iburyo ni Angelina Muganza, Umunyamabanga Nshingwabikorwa wa Komisiyo y'Abakozi ba Leta ari mu bitabiriye imurikwa ry'ubushakashatsi ( Foto James R.)

Leta yahombye asaga miliyoni 500 kubera imicungire mibi y’abakozi

Yanditswe na MUGISHA BENIGNE

Ku ya 05-05-2018 saa 08:52:26

Ubushakashatsi bwakozwe na Komisiyo y’Abakozi ba Leta (PSC) bugaragaza ko Leta yahombye miliyoni zisaga 500 z’amafaranga y’u Rwanda n’ibihumbi 17 by’amadorali y’Amerika ku mpamvu z’imicungire mibi y’abakozi kuva mu mwaka wa 2012 kugera mu 2017.

Iburyo ni Angelina Muganza, Umunyamabanga Nshingwabikorwa wa Komisiyo y’Abakozi ba Leta ari mu bitabiriye imurikwa ry’ubushakashatsi ( Foto James R.)

Nk’uko byagaragajwe  na Twizere Bernard, Umushakashatsi uyoboye itsinda ryakoze ubushakashatsi bugamije kumenya impamvu z’ibihombo Leta ihura na byo biturutse ku bakozi bayirega bikarangira hari abayitsinze, bityo ikishyura, yagaragaje ko mu buryo bw’imicungire y’abakozi habayeho impinduka nziza, ariko ko bitabujije ko mu myaka itanu ishize Leta yagize igihombo gisaga miliyoni 500 z’amafaranga y’u Rwanda na 17 000 by’amadorali y’Amerika yishyuwe abanyamahanga bayitsinze.

Ati “Ubushakashatsi bwagaragaje ko amategeko n’amabwiriza mu micungire y’abakozi atubahirizwa n’abakoresha ari byo byatumye Leta igira igihombo kingana kuriya. Bivuze ko uburyo bwo guhana abakozi no kubaha ibyo bemererwa n’amategeko bitagiye bikorwa neza ku buryo hari abajyaga kurega Leta bakayitsinda, bigatuma yishyura abakozi bahanwe mu buryo budakurikije amategeko.”

Ubushakashatsi kandi bwagaragaje ko ubujurire bwiyongereye muri iyi myaka 5 ishize, ariko ubufite ishingiro bwagombaga gutuma Leta Itsindwa bwaragabanutse.

Mu buryo bw’imibare, ubushakashatsi bugaragaza ko mu mwaka wa 2013-2014, ubujurire bw’abakozi buturutse ku micungire yabo mu bigo bya Leta, Minisiteri n’uturere, bwari 304, mu mwaka wa 2014-2015 ubujurire bwari 397. Mu mwaka wa 2015-2016  ubujurire bwari 416, muri bwo ubugera ku 142 bungana na 34%  ni bwo bwonyine bwari bufite ishingiro.

Ubushakashatsi bwakorewe kuri Minisiteri zirindwi, ibigo bya Leta 14, uturere 11 n’ibitaro by’uturere 5, bukorwa ku bagore 155 n’abagabo 138.

Ubushakashatsi kandi bugaragaza ko mu micungire y’abakozi ba Leta byagaragaye ko ikiza ku isonga gituma Leta icibwa amafaranga mu gihe itsinzwe n’abakozi bayireze byaturutse ku kutubahiriza amategeko n’amabwiriza mu gusezerera  abakozi mu kazi, kigakurikirwa no  kudasubiza ibibazo abakozi bafite n’ubumenyi buke bujyanye no gucunga abakozi.

Muganza Angeline, Umunyamabanga nshingwabikorwa wa Komisiyo y’abakozi ba Leta, yavuze ko ubushakashatsi bwakozwe bugamije gushyira ahagaragara imicungire  n’imiyoborere y’abakozi ba Leta. Ni nyuma y’uko bigaragaye ko mu myaka 10 ishize ubujurire bwagiye bwiyongera ku bakozi babaga bahawe ibihano.

Ati “Kuri iki kibazo twibajije impamvu amategeko atagiye yubahirizwa kandi ahari bikagera n’aho bigusha Leta mu gihombo cyavuzwe haruguru.”

Avuga ko iyi raporo itegerejweho imyanzuro izafasha gukemura ikibazo kigaragara mu micungire y’abakozi ba Leta mu gihe kiri imbere, bityo irusheho kunozwa hirindwa icyatuma Leta igira igihombo biturutse ku makosa y’abakoresha.

Muganza avuga ko hari n’itegeko ryagiyeho riryoza abayobozi b’imirimo n’ibigo igihombo Leta yahura nacyo biturutse ku micungire mibi yabo, bityo hakaba hari ikizere ko abakoresha cyangwa abayobozi b’imirimo bazajya bakora ibyubahirije amategeko mu gufatira abakozi ibyemezo.

Ikindi cyagarutsweho muri ubu bushakashatsi, ni uko hashyirwaho ikiguzi ku bashaka kujurira, kuko bigaragara ko kuba nta kiguzi na kimwe kiriho no kuba bikorwa mu buryo bw’ikoranabuhanga bituma ujurira yoroherwa akaba yanajurira adafite icyo ashingiyeho, ari ukugira ngo arushye abantu gusa.

Umwe mu bitabiriye imurikwa ry’ubu bushakashatsi akaba ashinzwe abakozi mu Karere ka Gakenke Kalisa Justin, avuga ko kuri ubu bagererageza gufatira umukozi ibyemezo hakurikijwe amategeko mu rwego rwo kwirinda ko byaba intandaro yo kurega Leta mu gihe byaba bifashwe bihubukiwe.

Ati “Twatangiye kuvugurura uburyo bwo gufatira abakozi ibyemezo, turagerageza kwisunga amategeko n’amabwiriza kugira ngo hatagira uwo duhutaza, akaba yajya kurega Leta.”

Gusa yemeza ko mu micungire y’abakozi hakirimo imbogamizi zimwe na zimwe zituma hari ubwo imicungire itagenda neza biturutse ku kutamenya amategeko n’amabwiriza y’imicungire y’abakozi ku bashinzwe gucunga abakozi.

TANGA IGITEKEREZO

Leave a Reply

Be the First to Comment!

avatar