Leta n’abikorera baraganira ku buryo  abiga TVET babona aho bimenyereza umwuga

Yanditswe na Mugisha Benigne

Ku ya 14-02-2020 saa 15:55:00
Minisitiri w'Uburezi Dr Mutimura Eugene

Minisiteri y’Uburezi ibinyujije mu Ishuri rikuru ry’imyuga n’ubumenyingiro (RP) yagiranye ibiganiro n’abikorera bagamije kurebera hamwe uko abana biga mu mashuri y’imyuga n’ubumenyingiro (TVET) bazajya babona aho bimenyereza umwuga.

Afungura ku mugaragaro iyi nama, Minisitiri w’Uburezi, Dr Mutimura Eugene yavuze ko iyi nama nyunguranabitekerezo igamije kurebera hamwe uko abana biga muri TVET bajya bimenyereza umwuga mu bigo cyangwa mu nganda z’abikorera mu rwego rwo kugira ubumenyi buhagije mu bumenyingiro.

Yagize ati “Kwimenyereza umwuga ni ingenzi mu myigire y’imyuga n’ubumenyingiro, kwigira mu ishuri ni kimwe no kwigira ku murimo cyangwa mu nganda ni ikindi. Turi hano ngo tuganire n’abikorera ku buryo abana biga imyuga n’ubumenyingiro bajya babona umwanya mu bigo no mu nganda wo kwimenyereza umwuga.”

Yavuze ko ikerekezo k’igihugu ari ukwigisha imyuga Abanyarwanda  mu rwego rwo kwihangira umurimo no kuyiha abandi.

Dr Mutimura avuga ko Urwego rw’abikorera ari rumwe mu bagomba kugira icyo bakora ngo abana biga imyuga n’ubumenyingiro bagire ubumenyi buhambaye mu byo biga bazavemo ba rwiyemezamirimo b’ejo hazaza, bikazahesha akazi imbere mu gihugu no mu karere u Rwanda ruherereyemo.

Ati “ Intego yacu ni iyo gufasha amashuri ya TVET  kubona aho abana bakorera imenyerezamwuga kugira ngo bazasoze amasomo yabo bafite ubushobozi bwo kwihangira imirimo, babashe kuzamura ubukungu bwabo n’ubw’igihugu muri rusange.”

Dr Gashumba James, umuyobozi mukuru wa RP, avuga ko kwiga imyuga birimo ibice bibiri, harimo igice cyo kwigira mu ishuri harimo n’igice cyo kwigira mu nganda kandi inganda zifitwe n’abikorera

Avuga ko abanyeshuri biga amashuri y’imyuga n’ubumenyingiro bakeneye inganda zo kwimenyerezamo umwuga nyuma y’ubumenyi bahabwa n’abarezi mu ishuri.

Ati “ Kwiga imyuga ni ukugira ubushobozi bwo gukora uwo mwuga nyine, kugira ngo bikunde rero ni uko umunyeshuri abona amasomo asanzwe yo mu ishuri akabona n’ayo kwigira ku murimo mu nganda, birasaba rero ko Leta ifatanya n’abikorera kugira ngo bishoboke kuko ari bo bafite inganda.”

Bayigamba Robert, ni umuyobozi w’Ikigo Manumetal, akaba umwe mu bikorera wari witabiriye iyi nama, avuga ko nk’abikorera kandi nk’abafatanyabikorwa ba Leta biteguye gufasha abana biga amashuri y’imyuga n’ubumenyingiro bakabona  aho kwimenyereza umurimo, ngo ariko bagomba kuganira na Leta uburyo bwo kubinoza kugira ngo abanyeshuri baze mu gihe k’imirimo  myinshi iba ikeneye gukorwa no kumenya igihe kitari ik’imirimo myinshi kuko byatuma abaje batabona icyo bakora.

Ati “ Uruhare rwacu nk’abafatanyabikorwa ba Leta ni ugufasha abana biga TVET, dusanzwe tubafasha kubona aho bimenyereza umurimo, ndetse abakoze neza bagaragaje ubushobozi turabakomeza bakadukorera bakabona imirimo, ariko ni ngombwa ko baza mu gihe nyacyo kirimo akazi kenshi kuko baje mu gihe tudafite akazi kenshi kubamenyereza no kubaherekeza byagorana.”

Impande zombi zishimangira imikoranire myiza mu gufasha abana kubona imenyerezamwuga, ariko ngo bikomeje kunozwa kugira ngo bihabwe umurongo mwiza ufasha abana bimenyereza umwuga ukanafasha ba nyiri inganda n’ibigo.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.