19°C , Partly cloudy | Kigali-Rwanda
Bene izi modoka zizwi nka cable cars ni zo Leta irimo gutekereza kuzana mu Rwanda

Leta iratekereza ubwikorezi bw’utumodoka tugenda ku migozi muri Kigali

Yanditswe na MUKAGAHIZI ROSE

Ku ya 09-10-2018 saa 14:31:05

Uburyo bwo gutwara abantu mu migi cyane cyane mu Mujyi wa Kigali hifashishijwe utumodoka tugenda ku migozi (Cable Cars), bushobora gukoreshwa mu Rwanda mu gihe kiri imbere.

Minisiteri y’Ibikorwa Remezo (MININFRA) iravuga ko ubwo buryo burimo gutekerezwaho mu rwego rwo guca umuvundo no kugabanya igiciro k’ingendo.

Umuyobozi w’ishami rishinzwe gutwara abantu n’ibintu muri MININFRA avuga ko ubu buryo butagoye kubugeraho kuko ari bizinesi izajya yinjiriza abazashoramo imari.

Byiringiro Alfred yabwiye Imvaho Nshya ko Cable Cars zigendera ku nsiga zikoreshwa n’amashanyarazi, ati “Imbanzirizamushinga y’utu tumodoka yatekerejweho.”

Yakomeje agira ati, “Turashaka ko ubwo bari gusubiramo igishushanyo mbonera cy’Umujyi wa Kigali, bashyiraho n’imirongo izo ‘cable cars’ zizanyuramo.”

“Duteganya ko icyo gishushanyo kizabyerekana, hanerekanwe uburyo abantu bagenda batiriwe babyigana mu muhanda.”

Byiringiro avuga ko izi modoka zikunze gukoreshwa cyane mu bijyanye n’ubukerarugendo ariko ngo zinakoreshwa no mu gutwara abantu mu buryo bwa rusange.

Bene izi modoka zizwi nka cable cars ni zo Leta irimo gutekereza kuzana mu Rwanda

Cable Cars ni imodoka zikoreshwa cyane mu bihugu nk’u Busuwisi, Leta Zunze Ubumwe z’Amerika n’ahandi.

Ati “Ikiza cyabyo ni bizinesi ikorwa n’abashoramari ku giti cyabo bitabaye ngombwa ko leta ishyiramo amafaranga bityo na bo baba bunguka.”

Kuba ngo izo modoka zidakoresha lisansi cyangwa mazutu ahubwo zikoresha umurimo muke w’amashanyarazi ngo bizatuma nta muntu utazabasha kwigondera ibiciro byazo.

Umuyobozi w’ishami rishinzwe gutwara abantu n’ibintu muri MININFRA avuga ko hari abashoramari batangiye kwegera Leta bashaka gushora imari muri utwo tumodoka.

Cable Cars zitegerejweho gutanga umusanzu mu gukemura ikibazo cy’ubwikorezi gisanzwe kivugwa mu mugi wa Kigali, aho abagenzi bagorwa no kubona imodoka.

Mukamana Rosine ukorera mu mugi rwagati ataha ku Kimironko avuga ko agifite ikibazo cyo kumara umwanya munini bategereje imodoka.

Kubona imodoka biragorana, n’aho ibonekeye zigatinda mu nzira kubera umubyigano ukunze kubaho cyane cyane mu masaha y’umugoroba na mu gitondo.

TANGA IGITEKEREZO

2 Comments on “Leta iratekereza ubwikorezi bw’utumodoka tugenda ku migozi muri Kigali”

    1. Utu tuntu dukoreshwa mu guterera imisozi cyangwa kwambuka ahantu h’imanga. Ntidushobora kugabanya ikibaxo cya traffic na gato. Ni duto cyane, turitonda cyane, kandi dukunze kugira impanuka ku buryo dukenera umumechanissien uduhora hafi. Abakeka ko batwifashisha mu kugabanya ibibazo by’imodoka, mubajyire inama basubize amerwe mu isaho.

Leave a Reply

Your email address will not be published. Required fields are marked *