18°C , Mostly cloudy with thunderstorms | Kigali-Rwanda
Seminega Augustus, Umuyobozi Mukuru wa RPPA

Leta imaze kugura ibikorerwa mu Rwanda birengeje miliyari 12-Seminega

Yanditswe na admin

Ku ya 19-02-2018 saa 07:31:39

Umuyobozi Mukuru w’Ikigo gishinzwe gutunganya amasoko ya Leta Seminega Augustus atangaza ko kuva aho gahunda ya ‘Made in Rwanda’ itangiriye inzego za Leta zimaze kugura ibikorerwa mu Rwanda birengeje miliyari 12 z’amafaranga y’u Rwanda.

Seminega Augustus, Umuyobozi Mukuru wa RPPA

Nkuko yabigaragarije inzego za Leta mu kuzikangurira gukomeza kugura ibikorerwa mu Rwanda, Seminega ashimangira ko kuva aho mu mwaka wa 2018 utangiriye, inzego za Leta zimaze kugura ibikorerwa mu Rwanda birengeje miliyari zisaga 12 mu gihe mbere atari ko byari bimeze.

Atangaza ko inzego za Leta zisigaye zibanda mu kugura ibikorerwa mu Rwanda igihe zitegura amasoko, aho raporo yakozwe na RPPA mu gukusanya ibintu Leta igura bikorerwa mu Rwanda, yagaragaje ko bimaze kugera ku rwego rwa miliyari 12 z’amafaranga y’u Rwanda.

Seminega asaba inzego za Leta gukomeza guha imbaraga ibikorerwa mu Rwanda (Made in Rwanda) mu gihe bategura amasoko bakazirikana y’uko bazagura ibiri mu Rwanda kandi bikandikwa mu gitabo ko ibikorerwa mu Rwanda bizahabwa amahirwe hakanarebwa ko byujuje ubuziranenge.

Bamwe mu bateza imbere ibikorerwa mu Rwanda bavuga ko bahagaze neza haba ku buziranenge bw’ibyo bakora, mu bwiza ndetse no guhaza isoko mu Rwanda no hanze yarwo.

Rugwizangoga Cyriaque ufite uruganda rwa FARUMARADE Ltd agira ati: “Guhaza isoko turabishoboye uretse no guhaza iryo mu Rwanda twiteguye kandi dufite ubushobozi bwo kubijyana hanze yarwo, haba muri Kongo, Tanzaniya na Uganda. Vuba aha twari mu kumurika ibikorerwa mu Rwanda i Dubai kandi abantu bakunze ibintu byacu cyane baranabyishimira ku buryo mu minsi mike tugiye kugera aho indege zacu za Rwanda-Air zigera kuko dufitanye imikoranire n’abantu bo muri Cameroun, Cote d’Ivoire, Guinee n’ahandi.

Nzeyimana Jean Paul, akorera uruganda rwitwa Strothec Builiding Solution rukora ibikoresho byo kubakisha binyuze mu bisigazwa by’umuceri n’iby’ingano, na we yishimira ko bagiye kubona umwanya wo kugaragaza ibyo bakora, bafungurirwa amarembo mu gihe Leta iba yifuza ko ibikoresho bya ‘Made in Rwanda’ bikoreshwa cyane mu bwubatsi bwo mu Rwanda kandi n’abantu bashinzwe kugurira ibigo bya Leta cyangwa iby’abikorera babone ko ibikoresho mu Rwanda bihari bihagije byakwifashishwa.

U Rwanda ni kimwe mu bihugu bikomeje gushishikariza abagituye gukoresha ibikoresho bikorewe imbere mu gihugu kugira ngo bibashe gutezwa imbere ku buryo imibare itangwa na RPPA igaragaza ko bimaze kwitabirwa.

 

 

 

TANGA IGITEKEREZO

Leave a Reply

Be the First to Comment!

avatar