22°C , Partly sunny | Kigali-Rwanda

Lee yasobanuye icyo irushanwa rya EAGT ryasize n’ahazaza haryo

Yanditswe na Gisubizo Gentil

Ku ya 09-10-2019 saa 14:24:36
Ndayisaba Lee asanzwe ari umuyobozi wa Clouds Tv

Irushanwa rya East Africa’s Got Talent (EAGT) 2019 ryatangijwe muri Mata uyu mwaka, ryitabirwa n’abanyempano baturutse mu Rwanda, Kenya, Tanzania na Uganda, bahawe umwanya buri wese agaragaza icyo ashoboye.

U Rwanda rwaserutse mu mpano zitandukanye, benshi bitabiriye amajonjora bavamo rugikubita, abandi bavamo urusorongo kugeza ku munsi wa nyuma w’irushanwa kuwa 6 Ukwakira 2019.

Intayoberana zaserutse gitore nubwo zitabashije kwegukana irushanwa

Mu kiganiro kihariye umuyobozi w’iri rushanwa, Ndayisaba Lee, yagiranye n’Imvaho Nshya, yavuze ko ashimira Imana ko ryagenze neza muri rusange.

Ndayisaba yagize ati “Irushanwa ryagenze neza turashima Imana, kandi n’abaryegukanye bari barikwiriye, ikindi cyo kwishimirwa ni uko ari irushanwa ryarebwe cyane mu karere k’Afurika y’Uburasirazuba ku nshuro yaryo ya mbere.”

Itorero Intayoberana ryegukanye umwanya wa kabiri muri East Africa’s Got Talent

Yakomeje avuga ko kandi bivuze ikintu kinini kuri buri muntu, wateguye akanashyira mu bikorwa irushanwa rya East Africa’s Got Talent 2019, kuko ryagize ubwitabire ku rwego rushimishije.

Abajijwe niba iri rushanwa rizahoraho Ndayisaba yagize ati “Birashoboka, kandi ni byo twifuza.”

Yongeyeho ko imitegurire yafashe imyaka myinshi, avuga ko bitari byoroshye, anemeza ko uretse kwamamara ku wegukanye irushanwa, rishobora no kumuhindurira ubuzima.

Twamubajije kandi niba abona ibihembo byatanzwe bihagije, Ndayisaba yagize ati, “Twakoze ibyo twari dushoboye ariko bidukundiye nta mpamvu bitakwiyongera mu myaka iri imbere.”

Ndayisaba Lee uyobora EAGT ubwo yavugaga ku migendekere y’irushanwa

Arasaba abanyempano kwitinyuka bakigaragaza kuko impano ipfukiranywe na nyirayo iba ipfuye ubusa, ngo abona babishoboye kandi n’amahirwe agenda yiyongera.

East Africa’s Got Talent 2019 irushanwa ryari rigamije gushaka abanyempano mu byiciro bitandukanye nk’umuziki, ubufindo, kubyina n’ikindi icyo ari cyo cyose umuntu ashobora gukora kidasanzwe, rikaba ryaregukanywe n’abavandimwe bo mu Bugande Esther na Ezekiel begukanye amadorari y’Amerika 50.000, Itorero Intayoberana rikaza ku mwanya wa kabiri.

Esther na Ezekiel babaye aba mbere muri East Africa’s Got Talent 2019

Reba video y’uko byari bimeze mu gusoza iri rushanwa ku Cyumweru tariki 6 Ukwakira 2019.

Umwanditsi:

Gisubizo Gentil

Tanga Igitekerezo

Email yanyu ntigaragazwa ku rubuga. Amazina na Email ni ngombwa.