18°C , Mostly cloudy | Kigali-Rwanda
Kwizera Pierre Marshall (iburyo), wari umutoza wa REG VC yagaragaye ku rutonde rw'abazayikinira umwaka utaha w'imikino

Kwizera yashyizwe mu bakinnyi REG izakoresha mu mwaka utaha w’imikino

Yanditswe na NKOMEJE GUILLAUME

Ku ya 12-10-2018 saa 15:15:48

Kwizera Pierre Marshall wari umutoza wa REG VC muri uyu mwaka w’imikino 2017-2018 yagaragaye ku ru rutonde rw’abakinnyi iyi kipe izakoresha mu mwaka w’imikino utaha wa 2018-2019.

Kuri uru rutonde rwashyinzwe kuri uyu wa 12 Ukwakira 2018, Kwizera Pierre Marshall azaba ari mu bakinnyi bazaba bitezweho gufasha REG VC mu kibuga hagati.

Kwizera umaze kugira ubunararibonye muri Volleyball y’u Rwanda yageze muri REG VC avuye muri Gisagara VC mu 2018, akaba yari yahawe inshingano zo gukina akanaba umutoza wungurije.

Yaje gusigarana iyi kipe umwaka w’imikino ugana ku musozo, asimbuye Mana Jean Paul, wari umaze gutandukana na REG VC anahabwa inshingano zo kuba umutoza mukuru kugeza umwaka w’imikino urangiye.

Kwizera Pierre Marshall wabaye umukinnyi ukomeye w’ikipe y’igihugu nkuru ya Volleyball, yafashije REG VC gutwara igikombe k’irushanwa ryo kwibuka irushanwa ryo kwibuka Rutsindura Alphonse “Memorial Rutsindura 2018”, ryabaye tariki 23-24 Kamena 2018.

Mu bakinnyi 17 bazifashishwa na REG VC mu mwaka utaha w’imikino, barimo abashya nka Mukunzi Christophe, usanzwe ari kapiteni w’ikipe y’igihugu, wasinye umwaka umwe ushobora kongerwa avuye muri Gisagara VC.

Perezida wa REG VC, Zawadi Geoffrey avuga ko igihe kigeze ngo nabo bagire ikipe ikomeye ndetse ishobora kuzahatanira ibikombe bitandukanye birimo na shampiyona.

Abakinnyi 15 b’ikipe ya REG VC izakoresha mu mwaka utaha w’imikino ni; Mukunzi Christophe, Ndamukunda Flavien, Ntagengwa Olivier, Atama Saviour, Irene Jacob Cyusa,Twagirayesu Peacemaker, Rwigema Simon, Ndayambaje Friend,. Sangwa Patience, Ndayisaba Sylvestre, Nkezabahizi Fabrice, Niyonkuru Groile, Moses Omondi, Iyarwema Pacifique na Kwizera Pierre Marshall.

Mugisha Bavuga Benon, ni we mutoza mukuru, azaba yungirijwe na Peter Kamasa, Rusika Emmanuel, umuganga w’ikipe ndetse na Ndabikunze Robert uzaba ashinzwe ubuzima bw’ikipe.

TANGA IGITEKEREZO

Leave a Reply

Your email address will not be published. Required fields are marked *